Täli - Blog

-offline-

2010-04-08T09:55:00.004+02:00

Dr letsch Post isch scho wieder länger här und es wird äuä ou so läär bliebe do. Mit em "Inside" und dr aktualisierte Homepage si gnue Infos ume Verein. D Fotos vo de Spiu wärde über d Homepage www.shcgrenchen.ch ufgschaute. I däm Sinn "Merci" a die wo zwüschdüre mou inegluegt hei!

Off Topic

2009-12-01T13:18:00.002+01:00

Z Bloge chunnt chrad chli z churz im Momänt. Für anderi Blog's z konsumiere längts aber no. Hie e sehr sehr gueti und ou tragischi Metapher usem Läbe:

http://ccsstreethockeyblog.blogspot.com/2009/12/quo-vadis.html

(hoffe mou i dörf dä eifach so verlinke...)

Seetal (H)

2009-11-02T15:33:00.008+01:00

"Pflichsieg" tönt sehr arrogant, und i ha dr Usdruck nid würklich gärn. Es hei i däm Spiu gäge Seetal aber jeglichi Emotione gfäut. 12:1 Sieg gäge z Schlussliecht. Und es isch nid so eifach gange wie z Resultat schlussändlich het usgseh. Ämu im erschte Drittu hets hert gha. Mi isch zwar Fäudüberläge gsi und het Chance gha, aber ou d Seetaler sie z einte u andere Mou am Tom gschieteret. Uffällig isch ou gsi das die meischte vo üsne Chance und Einzuaktione enstande si. Die technisch starche Spieler hei chönne brilliere a däm Sunntig, aber ou si hei im Abschluss gsündigt Z 1:0 isch e Troum gsi für ne Trainer. No em Fritig Obe het dr Mono d 5:4 Situation ahgluegt mit de Spiler, und dr Lars schiesst genau wie i däm Training scho 2 Mou bewiese, ou em Sunntig es Goal... Wes nume immer so eifach wär ;-) Ei Strof ahzeigt, eini usgsproche... wie gseit, d Emotione hei gfäut i däm Spiu. Blaui Fläcke hets aber gliech gä Z Fazit us däm Match:
-2 Punkt wo me sehr guet cha bruche!
-Mit em Tom isch e Goali hingerem Dave parat! Fiertage si mit Hockey dopplet so schön (Merci ad Schütteler!).
-Und de steut sich no d Frog ob me mit eim Goal im PP und emne zwöite bi ahzeigter Strof vo 200 cha rede? ...ok zu zwöihundert cha me fasch nid gumpe, aber das nume so am Rande. ;-)

Linieüberlegige

2009-10-27T10:56:00.007+01:00

Het sich öper scho mou überleit wie mir aus Trainer d Linie zämesteue? Klar het sich das jede Zueschouer scho mou. Meischtens i de Situatione wos nid so gieget wies söt. Dört weiss jede haargenau wie mes besser chönt mache. Oder no schlimmer gseit: Dört weiss jede "Hockeyexpert" am Spiufäudrand genau dass d Zämestellig vo de Linie tschuld isch, sigs 4:4 sigs Power- oder Boxplay. "Wieso spiut dä ou mit däm, wieso spiut dä dört" "dasch eh dr Liebling vom Trainer" "dasch nume wiu si zäme i Usgang si".
Wieso chunnt das? I de Ouge vo Zueschouer chasch aus Trainer nume verliere. Uf 2 Linie reduziere, Goali wächsle, Timeout nä, Linie umsteue... aus das machsch während de Spiu. Do derzue hesch 1000igi vo Ihrdrück, Emotione, Meinige, Gründ, usw. Cha mes aune Rächt mache i dene Situatione? Muess mes aune Rächt mache? Cha me Kompromisse ihgo? 1000 Froge wo eim düre Chopf gö aber niemer cha e Antwort gä. Objektivi Sache, subjektivi Sache, Experimänt, Erfahrige.... aus chunt zäme. Für das hesch paar Sekunde und de muesch entscheide. Und du weisch vo vorhinein: I chas nid aune rächt mache und i cha eigentlich nume verliere: Wes guet chunnt si d Spiler d Heude, wes nid guet chunnt de bini dr Löu. Schreg oder? Paralelle zu de Schiedsrichter? Klar! Wie jede Schiri säuber tschuld isch dass är sich das Sunntig für Sunntig ahtuet si mir Trainer das ou. E Liedeschaft, ä Kick, oder wienis so gärn ghöre: "D Liebi zum Spiel" machts us. Wär usser dr Trainer söt süsch so Entscheide träffe? Es git niemer uf dr ganze Wäut wo sich so intensiv mit sim Team beschäftigt wie är, auso lö mr ne doch si Sach lo mache. Und är wot nüt anders aus mir ou: Gwinne! Muess me das rächtfertige? Oder ischs nid besser am ne Trainer eifach z vertroue?
Mache mir Liniezämestellige hurti schnäu im Usgang, oder ir Fahrt vorem Spiu? Hie d "Gsprächsnotize" vom Trainer und coTrainer nachem Abschlusstraining vorem 2. Spiu Playoffinal 08/09: Es isch nid würklich eifach. Im Nachhinein isch me viufach gschieder. Reflexion isch z A und O bi de Trainer, e ändlose Prozäss wo immer optimiert cha wärde, immer! I däm Fall hie hets verha, dasch aber nid d Garantie dass das e Wuche oder 24 Stund spöter wieder funktionier! U genau das machts us aus Trainer genau das ewige Sueche nachem Otimum. Das git eim dr Kick...
...vorwärt aber mängisch ou rückwärt ;-)

Oberwil

2009-10-19T16:41:00.006+02:00

Erfolgriechs Oberwilweekend? Jo? Nei? Schwirig zum säge. Es isch e Reaktion gforderet gsi vom Team. E Reaktion wo d Niederlag gäge Aegerten nid vergässe cha mache, aber eini wo me gseht dass meh im Team steckt aus e Wuche vorhär isch zeigt worde. Und d Mannschaft ume Mono het Charakter zeigt! Und wie! 12:6 Sieg gäge Schwiezermeischter. Uswärts! Ufem Grossfäud! Und das isch villecht grad eine vo de wässentliche Punkte gsi wo zum Sieg gfüehrt het. Läuferisch si mr derbi, das isch jedem bewusst. Bi Oberwil het das Elemänt gfäut. I kenne d Gründ nid, aber die loufstarche Spiler si nid derbi gsi a däm Spiu und das het me gmerkt. Und vor auem het mes chautblüetig chönne usnütze. Dä Sieg isch aues andere aus gstole gsi. 100% (hundert, hundert hundert...) Powerplayusbüti. I weiss nid warum me nid reagiert het ir Unterzahl. D Schwächi isch offesichtlich gsi, aber do muess jede säuber druf cho... Üs het pässerlet uf dere Hammertribüni. E schöne Platz hei si häre gsteut z Zug. Würd em Täli ou guet stoh so öpis ;-) ! Gschicht vom Spiu isch schnäu verzeut. 4:1 nach 10 Minute. Jedes Powerplay usgnützt, paar Unterzahle überstande. 4 Minute vor Schluss isch 12:4 gstande, d Zuger hei aui ihri Goal bis denn i Powerplay gschosse. Bullystatistik, Schussstatistik, z Wätter ;-) aus het für üs gsproche a däm Tag. Umgekehrt Bild am Sunntig. Z Problem oder dr Vorteil vo Doppuweekend. Mi cha sofort reagiere. Dass es Klasseteam wie Oberwil cha isch me sich bewusst gsi. Und gliech het me az Wunder vom ne 4 Punkte Weekend gloubt. Fürs Ego isch dä Sieg sehr wichtig gsi. Mit em Steve, Geru, Cedu, Ste het nach wie vor extrem viu Erfahrig gfäut bi üs. Trotzdäm hei mr chönne mitspiele. Es isch zwar schnäu mou 0:3 gstande, aber ou hie het me Charakter zeigt und reagiert! Respäkt vor dere junge Mannschaft. Dases schlussändlich de doch nid glängt het das het anderi Gründ. Z PP het ou a däm Tag verha. Bis ufs letschte, 3 Minute vor Schluss. I dere Situation isch z 100% gheit und dr 8:8 Usgliech isch nüm gfaue, leider. Jo mir wäre gärn nomou gumpet ;-) Mi cha us Fruscht no d Schiris erwähne, aber das hät nüt me gänderet am Resultat. I meine si annulliere vorhär es sunneklars Goal vo Oberwil... I steue mr aber gliech paar Froge: Wieso gits im glieche Spiu wäge Reklamiere einisch e schwäri Disziplinarstrof gäge Oberwil, einisch e 10er gäge üs und de einisch e 2er gäge üs? I weiss dass d Schiri chöi gä was si wei (ou we si nüt hei gseh oder wes nachträglich isch, hei mr jo im Final erläbt), aber die Linie hiuft ihrem Ahsehe nid würklich. Und no öpis anders frogi mi: Wieso steut me Froge ar Schririprüefig wie: "Was passiert we e Spiler voremne Penalty si Stock verschlot?" und sörige Mischt we 2 SSHR (!) Schirine nid usefinge wo dasses Bully git we si e Strof pfiffe hei ir Offensivzone? Sorry, aber das si Basics und mit so Sache macht me sich eifach lächerlich. Do cha me sich im Nachhinein lang froge wieso me sich das jedes Weekend ahtuet... Lo häufe wot me sich jo eh nid...
Aber nomou schnäu, und dasch mi ärnscht: Mit em Resultat het das für einisch nüt ztue gha. Mir heis säuber verdublet und ou do lige paar Gründ uf dr Hand wo im Team diskutiert müesse wärde...
dr Victoria Cup isch nume e billigi Kopie gäge üse schön Stockhuufe...

Güggelitag

2009-10-19T16:36:00.001+02:00

Samstag 24. Oktober ist in Limpach Güggelitag:

Kernenried (A)

2009-10-06T10:43:00.013+02:00

10:5 z gwinne uswärts im Derby isch nid so schlächt. Wobi me "uswärts" natürlich mit Vorsicht muess gniesse. Die meischte Spiler vo üs hei weniger wyt gha aus ad d Heimspiu. Uswärts isch im Sinn vo: Mi muess sich eifach paar "Sache" meh ahlose aus deheim... aber das ghör jo derzue... So wie die "Kabine" wo immer wieder es bsunders Erläbnis isch. Z zwöite Spiu die Saison, dr zwöit Sieg. Es macht fröid däm Team zuezluege, ou vor andere Siete vom Spiufäud. Taktisch no chli usgriefter, und läuferisch sicher öpis vom beschte wo mr im Momänt gseh. We me bedänkt wär das Team aus no wird ergänze de cha me scho liecht euphorisch wärde. Villecht isch aber ou grad das dr gliech Effekt wie letscht Johr. Verletzti Spiler als Chance für die Junge... Im Momänts klappets. Dr Mono het e Mischig häre brocht wo Erfolg het, wo üs no es Zytli wird fröid mache! Aber zersch steit z nöchschte Derby a. Mit Aegerten steit e sehr schwirige Gägner ufem Programm am Samschtig. Dört wird sich zeige ob üsi Jungs es Mittu gäg "eini vo de drei beschte Verteidigungen vor Schwiez" wärde finge.
Die junge maches vor: Mit löiferischer und kämperischer Stärki zum Erfolg! Sie hei aui Gründ zum juble, wie mir ou. Wieter so! E biegi Foto häts no hie

Juniore B

2009-10-04T12:05:00.016+02:00

Hie paar impressione vo üsne chline: z ganze album wär hie

Impressione

2009-09-11T10:34:00.026+02:00

Nei, es git ke nöie Bricht über nes Spiu und ou ke Saisonvorschou. Dä Blog wird die Saison zimli sicher nüm wieter gfüehrt, usser villecht mou z einte oder andere Föteli oder Video, oder villech mou e "chline" Kommentar...

Föteli hets gä am Fründschaftsspiu gäge Kernenried. Hie die paar Imressione:

WM in Pilsen

2009-06-10T20:10:00.004+02:00

Bielertägu

Senioren

2009-06-10T12:08:00.002+02:00

Sonntag 28.06.2009 La Chaux de Fonds
10.00 La Chaux de Fonds Belpa 1107
10.45 Kernenried-Zauggenried Grenchen-Limpachtal
11.30 Belpa 1107 Bonstetten-Wettswil
12.15 La Chaux de Fonds Kernenried-Zauggenried
13.00 Bonstetten-Wettswil Grenchen-Limpachtal
13.45 Belpa 1107 Kernenried-Zauggenried
14.30 La Chaux de Fonds Bonstetten-Wettswil
15.15 Belpa 1107 Grenchen-Limpachtal
16.00 Bonstetten-Wettswil Kernenried-Zauggenried
16.45 La Chaux de Fonds Grenchen-Limpachtal

Sonntag 19.07.2009 Kernenried
10.00 Grenchen-Limpachtal Kernenried-Zauggenried
10.45 Belpa 1107 La Chaux de Fonds
11.30 Grenchen-Limpachtal Bonstetten-Wettswil
12.15 Kernenried-Zauggenried La Chaux de Fonds
13.00 Bonstetten-Wettswil Belpa 1107
13.45 Grenchen-Limpachtal La Chaux de Fonds
14.30 Kernenried-Zauggenried Bonstetten-Wettswil
15.15 Grenchen-Limpachtal Belpa 1107
16.00 Bonstetten-Wettswil La Chaux de Fonds
16.45 Kernenried-Zauggenried Belpa 1107

Finalturnier 09.08.2009 Kloten

Abschluss

2009-05-17T11:31:00.007+02:00

Nach dem Spiel ist vor dem Spiel. Oder nach dr Saison isch vor dr Saison. D Gspräch und d Planig für 09/10 si am loufe. Grüchtli gö ume wie nes Füür. Leider isch mi Wunsch, dass d Mannschaft zäme bliebt, nid i Erfüllig gange. Schad! I ha mr viu erhofft vo mim Rücktritt, e "Ruck" söu dür d Mannschaft go. Nöii Ufgabe, nöii Rollene si z vergä, und es isch für jede öpis do...

Aber dasch nid dr Grund für das "Nachsaison Posting". Nei! I ha nomou wöue merci säge a mim Team, und a de Häufer! Ohni öich wirds zimli läär: Geschtr hei mr nomou i Gedanke dörfe uf die Saison zrug blicke. No einisch zäme philosophiere unds no einisch gmüetlich ha zäme. Hie, am Limpach no, isch letsch Summer dr Grundstei gleit worde für eini vo de erfolgriechschte Saisons. Ob im Training mit em Team, ob i de individuelle Trainins, ob bim Ih/Usloufe oder i de Leischtigstescht. Die Strecki do dürs Täli kennt jede vom Eis in und uswändig. Die schönschte 10km ;-) Aues hei mr äuä nid fautsch gmacht letsch Summer, und es isch doch schön nomou uf die Strecki dörfe z luege wo mr soviu Schweiss hei lo lige... Hammerzyt gsi. Es isch jo eh kes Gheimnis dasi absolute Fan vo Summertraining bi. :-)

Jo, und im Name vom Team hie no einisch es riese riese Dankeschön a aui wo näbem Fäud mitghulfe hei i de letschte paar Monet/ de letschte paar Johr: Und de hie no einisch z Trainertrio vo de letschte 3 Johr... Mir hei viu diskutiert, viu Spass gha, viu Problemli glöst, viu gfieret, viu gschaffet, viu planet, viu umgsetzt, si Fründe worde, aber vor auem: VIU GNOSSE und VIU FRÖID gha!! Thanx Schläppi u Mono! De Spiler no es Merci für die "Brautips" uf de Fläschli. Und no eis het mi extrem gfröid: Die paar Sinatra Ziele vo "My Way" ufem Holz. Schön möget dr nech dra erinnere und dä Text breichts haut einisch meh! :-)

Wies mit däm Blog wieter geit weiss ig nid. Möglich dass ne paar Spiler wieter füehre... Mir wärdes gseh. Es git sicher anderi Boustelle wo Priorität hei im Momänt.

Z letschte Spiu

2009-05-11T12:52:00.006+02:00

Irgendeinisch chöme de villech no paar Ziele und paar Bilder zu däm Finalweekend oder zu dere Saison. Di letschte 10 Monet mit em Team si e absoluti Hammerzyt gsi! Oder andersch gseit, di letsche 7 Johr si prägt gsi vore super Kameradschaft, Teamgeischt, Zämehaut, Liedeschaft... Nid nume mit de Spiler, sondern ou im Verein, Häufer (nume das d Nathalie u z Meli ou mou erwähnt si: Merci!), Fanclub, Betröier, ...
Es isch jetz aber ar Zyt i die zwöiti Reihe zrug z stoh und e "Pouse" ihzlege. Z Spiel vo usse chli ahzluege, aber dr Verein und z Team wieter dörfe z gniesse und villecht z unterstütze! I wirde nech vermisse!

Z letschte Weekend

2009-05-07T16:27:00.003+02:00

Mir hoffe: No nid "z letschte Spiu" und wärde ou derfür kämpfe! No einisch bewiese was es Team cha bewege, no einisch sich verbünde, no einisch z Ego vergässe und sich i Dienscht vo sine Kollege steue! Dr Räschte use hole! Stolz si vor de eigene Zueschouer, Fründe, Verwante sini Liedeschaft dörfe z präsentiere! Mit emne Lächle nomou zeige, dass me es Teili isch i däm schöne Puzzle. Oder wies das Johr zeigt, e chline Stei i däm riese Viadukt! Das cha üs em Samschtig niemer me näh. Das Gfüehl lot sich mit keim Gäut vor Wäut choufe! Für das hei mr Monate/Johre trainiert. Nomou 60 Minute dörfe mr das am Samschtig gniesse! Mir fröie üs wäuts!! 100% GreLi ;-)

Playoff Final Spiel 1

2009-05-03T11:32:00.014+02:00

Mit dr Qauli zu däm Finalspiel hei mr üs üse Troum scho verwürklicht. Aber natürlich wet me bir Pokalübergab nid nume zueluege, mi wet gärn das Team si wo das begehrte Objekt ou gwinnt. Leider si mr do aber nid allei, ou Oberwil sträbt nach däm. D Vorzeiche si klar gsi vor däm Spiu: Oberwil isch dr gross Favorit. Mir stö lediglich mit Ussesieterchance do. Mit em Märe, Flips, Rämsi, Steve vier Langzytverletzti mir internationale Erfahrige, mit em Lars und Kris zwöi gsperrti Natispiler und derzue no dr eint u ander ahgschlagnig. Mir wäre sicher ou so dr Ussesieter gsi, aber dasch scho grad chli viu gsi. D Vorzeiche hätte auso eigentlich nid viu schlächter chönne sto vor däm Mätch (...)
U gliech hei mr üs viu vorgno! Weni mr 3 Sache hät dörfe wünsche i däm Final de wär ei Wunsch sicher gsi dass dr Dave "dr Tag seines Lebens" ihzieht... Das isch de ou i Erfüllig gange. Ungloublich wieviu Schüss das är pariert het. Spricht natürlich nid grad für üs we mr de trotzdäm 11:3 verliere... Aber dasch sicher die Position wo mr besser si gsi i däm Final. Jo äbe, dass bringt nume nid soooo viu. Oberwil isch das Team gsi wo über die bessere Einzuspiler verfüegt. Nüt nöis i däm Sinn. We d Entwiklig so wird wieter go wies im Momänt louft de wird das für paar Johr so bliebe. Wär wot Meischter wärde dä wächslet iz Zugerland oder investiert e Stange Gäut. So eifach isches. Nei, das wär natürlich z simpel. Oberwil tuet gnue füre Erfolg und arbeitet im Verein sehr professionell. D Spiler (ämu die woni unter anderem i Kürs ha dörfe kenne lehre) läbe natürlich ou füre ihre Sport!
Eigentlich isch fruschtrierend. Andersiets muess me Realischt bliebe. Vor auem aber muess me gniesse was me het. 10 Monet lang si mr zäme im Team: Sekle, schwitze, kämpfe, liede.... u de aber: Feschte, fröie, fiere, heis guet mitenang... GNIESSE :-) I de Playoff isch de no aus chli intensiver.... Sorry, schweife ab...
Zum Spiu: 3:1 hinge nachem erschte, 6:2 hinge nachem zwöite Drittu. 11:3 am Schluss. 2 Goal vom Ludo eis vom Geru, zahlriechi Parade vom Dave... Derzwüsche e zimli gueti (kompakti) Teamleischtig wos aber dür unkonzentriertheite immer wieder Fähler gä het. Fäupäss, verlorni Zwöikämpf und dummi Strofe si d Folg gsi. Das mas gäg Oberwil nid liede! 6 Goal hei mr i Unterzahl bercho, und somit eini vo üsne eigene Vorgabe ganz klar nid erreicht. I wet nid meh zu däm Spiu schriebe, tönt aues chli nach Resignation. Das isches aber bestimmt nid. Mir hei eis Spiu verlore und nid meh! Und z guete dran? D Fähler lige uf dr Hand und d Chance zur Verbesserig chöi mr scho nöchscht Samschtig nutze. 2 Spiler chöme derzue und das verteilt d Verantwortig scho wieder uf meh Schultere. D Detail zum Spiu weti dasmou lieber nume mit em Team bespräche.
Heimvorteil hei mr übrigens scho z Oberwil gha. Mi cha 500 Zueschouer ufe Matchraport schriebe (es verbesseret d Position im Dorf und dr Politik natürlich chli meh, uf de Föteli si maximal 250, und i zeue relativ grosszügig...), mi cha vo "nid gstilltem Erfolgshunger" rede (d Oberwiler Spiler hei dä ganz sicher, dass hei mr leider ihdrücklich gspürrt, aber bi de Zueschouer bini mr do nid so sicher. Dr Meischtertitu wird vorusgsetzt und darum isch ou es nid grössers Interässe vorhande aus die paar Lüt usem Umfäud. Usnahm? Dä Drittu vo de Zueschouer wo vom Täli ahgreisst isch und het Lärme gmacht):

Merci viu Mou, es isch einisch meh es Hammergfüehl gsi, ou we mr Öich Resultatmässig entüscht hei (das Video isch übrigens 1 Minute vor Schluss entstande und nid vorem Spiu...)
Nöchscht Samschtig geits i Rundi zwöi. Ou dört si mr Ussesieter und ou dört hoffe mr uf breiti Unterstützig. Es muess jede a sis Limit cho i däm Spiu, ansonste isch d Saison am Obe beändet. Wär schad, wiu no einisch 60 Minute meh üse Sport gniesse wär scho no fräch!

Sierre (H) Playoff 1/2 Final Spiel 3

2009-04-27T13:31:00.008+02:00

10:6 Sieg im dritte und entscheidende Playoff Hablbfinal gäge Sierre, juhui! Do dermit isch es Ziel erreicht wo mr fasch nid hei dörfe usspräche vor dr Saison. FINALE!! Unter de zwe beschte Mannschafte vor Schwiez. Oder anders usdrückt: Die beschti Mannschaft näbe Oberwil! Oberwil isch z Mass aller Dinge. Si si gsetzt gsi für dä Final, jo si si scho fasch gsetzt aus Meischter. Hinge dra hei 9 Teams um dä Platz kämpft wo mir erreicht hei. Es Hammergfüehl! Wieviu Arbeit, wieviel Liedeschaft derhinger isch weti gar nid hervorhäbe, do gits gnue anderi Teams wo dä Ufwand ou triebe. Umso glücklicher si mr aber, dass es grad bi üs klappet het! Wie wichtig dr Heimvorteil isch, dass hei mr scho lang gwüsst. Das Sierre dr Gägner chönt si (und dr Heimvorteil darum no wichtiger), het me ou chönne usrächne. Das d Rächnig aber so guet ufgeit, do derfür hets chli meh brucht. 14:00 Dr Platz isch gschmückt, dr Lärmpegu isch höch und d Spiler si bereit. Taktisch hei mr natürlich wieder üses Spiu chönne spile, nid wie d Wuche vorhär z Sierre ufem Grossfäud. 20x40 si üsi Mass! Konditionell si mr sicher parat für grösseri Distanze, aber d Spielwies isch haut scho ganz anders! 1:0 nach paarne Minute, e Schuss vom Römu us fasch unmöglichem Winku. So isch z Spiu lanciert worde und mir hei das Spiu ou gstautet. Jedoch hets einisch meh sehr viu Ufwand brucht. E Konter nach ere churze Unufmerksamkeit het zure 2:1 Situation gfüeht und zum erschte Goal vor Sierre. Mit ere Backhandaktion het üs dr Ludo aber wieder i Füehrig brocht. Leider het die aber nid lang gha. Usere Überzahlsituation, zersch 4:2 und nähr 4:3 het Sierre z Optimum usegholt und si mit ere 3:2 Füehrig i die erschti Pouse.
Ahfangs zwöits Dritu hei mr aber no chönne Überzahl spile und dr Schäume het i dene 2 Minute wieder usgliche. Das isch dr Startschuss gsi für nes Offensivspektakel. Leider ohni Torerfolg. Und wie mes de aube so erläbt si mr 2 mou i dummi Konter gloffe... 5:3 hinge! Und das mit emne riese Ufwand!! Zum Glück het das nid uf d Moral gschlage und genau das isch dr (chli) Unterschied gsi dä Sunntig. Z Bewusstsi das mr dä Match chöi gwinne! Üse Platz, 20x40! Nomou zäme 120 Minute dörfe z spile! Nomou 2 Spiu gniesse... dr Ludo u dr Schäume hei de mit ihrne Goal chönne zum 5:5 usgliche. 5:5 nach zwöine Drittu, nume no 20 Minute spile und irgendwie hani richtig fröid bercho i däm Spiu. 20 Minute vor nem mögliche Final, und mir si no im Renne. NUME no 20 Minute! Dr Geru het üs mit em 6:5 i Füehrig brocht. Dr nöi "Mister A3" ;-) Und wies i Märli aube so drin steit het de mit em Ste eine z "Game Winning Goal" gschosse wo süsch nid mit Scorerqualitäte uffaut. Defensiv zeigt är fählerfrei Spiu, aber mit däm Effort het är zwiefulos z wichtigschte Goal gschosse i sim (no junge) Läbe! 10 Minute z spiele und 2 Goal vore, das muess länge. Mitti Ahspiu und 7 Sekunde später z 7:6... Schockzuestand. Und jetz het Sierre druck gmacht und wie!! Dave sei Dank, Defens sei Dank hei mr däm Druck standghaute. E erschte Wächsufähler vo Sierre isch unbestroft blibe. Dr zwöit aber (dr Spiler wo uselouft stoppt dr Ball mit em Fuess) het 3 Minute vor Schluss z erlösende Powerplay brocht. Dr Ludo het die Chance packt und het sis dritte Goal zum 8:6 erzielt. Goali use, 5 Fäudspiler... bevor i das richtig gschnauet ha uf dr Trainerbank het dr Züri scho ids lähre Goal gschobe: 9:6! Es paar unschöni Szene si gfolgt. Es paar Strofe hets gä. Dr Mauli het de z Stängeli no kompletiert (Merci!) 10:6 im ne spannende Spiu. Im ne Spiu wo nid viu gfäut hät und mir wäre aus Verlierer vom Bitz. Isch dr Ball für üs gloffe? Eher nei. Mir hei unzähligi Chance gha. Erkämpfti Chance wo mr im Abschluss verseit hei! Kläglich zum Teil! Dr Sieg isch aber durchus verdient, mir si bereit gsi dr nötig Ufwand z triebe. Dasch das gsi woni im Wallis bemänglet ha, dasmou si mr parat gsi. Parat für Schmärz z ertrage, für Spiler z ersetze, für üs dä Troum vom Finalspiu wahr z mache! Es folgt dr Final gäge Oberwil nöchscht Samschtig. Üsi Chance? Keni! Keni? Oberwil het es Team wo us vier Linie besteit wo seinesgleichen suecht. Jedi Position isch meischterlich bsetzt und het no e meischterlichi Redundanz. Si müesse Meischter wärde und das weiss jede. Nid nume im Kanton Zug, sondern ou ir ganze Streethockeyschwiez. Gäbe mir üs de scho gschlage? Nei sicher nid, aber Druck hei mr grad gar kene. Mit dere Qualifikation füe Final hei mr d Überraschig gschaft, üses Ziel erreicht.
Z schöne a üsem Sport isch aber, dasses viufach nid nach so "Berächnige" oder nach "meischterliche" Spiler geit. Isch Bayern erscht ir Bundesliega? Isch dr SCB Meischter worde im Ischhockey? Isch Holland Europameischter worde? ;-) 2 Tage, 120 Minuten, 1 Ziel --> Gniesse! Oder wies em Flips si Spruch unter sine "Glückshort" ir Kabine zeigt: I 14 Tag si mr schlauer, und i fröie mi extrem uf die Spiu.

Sierre (A) Playoff 1/2 Final

2009-04-20T08:00:00.004+02:00

5:10 Niederlag im zwöite 1/2 Finalspiu gäge Sierre. E Niederlag wo sehr schmärz, aber no nid dr Wäutuntergang bedütet.
Ahgfange het das Spiu sehr konzentriert. Und scho mit em erschte Powerplay si mr 1:0 i Füehrig. Leider hei mr üs de grad säuber usem Rhythmus brocht. D Schirine hei üs druf higwise das me ou bim ne Vollgsicht näbscht de 2 Befestigungsriemli es Kinnriemli brucht, was ou nach Reglemänt korrekt isch.
Mi müesst aber villech ou gältend mache das d Schirine d Usrüschtig vor de Spiu sötte kontrolliere --> Abschnitt 3 vom Reglemänt: "Bis spätestens 20 Minuten vor dem Spiel haben die Schiedsrichter die Ausrüstung der Spieler auf Vollständigkeit, Spielverwendbarkeit und Einheitlichkeit der Tenüs (je nach Liga) und zu überprüfen und gegebenenfalls Anpassungen anzuordnen". Oder gilt das nüm? Wenn nid, warum nimmt mes nid usem Reglemänt? Item, bi üs hei sis nach 4 Minute im erschte Drittu gmacht (Fingerspitzegfüehl? Warum hets dr gliech Schiri i de vordere Spiu nie verlangt? Warum die letschte 10 Johr niemer?). Da d Kabine z Sierre 400 Meter entfärnt isch und 4 Spiler dervo betroffe si gsi hei mr de doch chli müesse improvisiere mit de Linie und si zimli usem Tritt cho. Wie gseit, do si mr säuber tschuld. Z Reglemänt kennt jede und das me sich uf Fingerspitzegfüehl vo de Schirine cha verlo isch grad chli naiv dänkt.
Es si de aber no dummi Strofe derzue cho. I ma gar nüm froge wenn das es Stockschlag git u wenn nid. 2 mou gäge Stock --> Strofe, und es steit 2:1 und 2 mou gäge d Bei --> ke Strof und mir si immer no 2:1 hinge. Voilà, Tatsachentscheide nennt sich das. Frässe! Biesse! Ufs Spiu konzentriere!
D Specialgames si entscheidend gsi a däm Tag 11 Goal vo 15 si entschtande wo mindischtens eis Team nid komplet isch gsi. Aber jo, Reflexion vo üs säuber hani mr mou lo säge die Saison. Und jo, i ha würklich öpis glehrt i däm Spiu. Mi cha aus Trainer am ne Schiedsrichter dr ganz Mätch uf wäutsch Schlämperlige ahhänke, jo mi cha sogar Fläschene uf die anderi Spilerbank übere schiesse (het das e Natispiler nötig?). Aber we e Schiri mit Fakte konfrontiersch de fassisch e Bankstrof. Quint essence us mire Reflexion? Schirine hei nid gärn we si merke das e Trainer oder e Spiler rächt het. De zieh si gärn d Notbräms und zeige ihri Macht! I ha 7 Saison müesse Trainer si bisi das schnaue :-)
I wirde d Schnörre haute im nöchschte Spiu, a mir söus nid/nüm lige. Usser es chöm wieder e Fläsche cho z flüge, das hani nid soooooo gärn....

So fertig gläschteret, und fertig Fruscht abbout. Wär jetz meint mir heige wäge däm verlore dä isch fautsch: Bitte wieterläse und nähr nid kommentiere mir sueche d Usred i de Schirine. Wiu das isches definitiv nid gsi. Über so Sache muess me sto, bi so Sache muess me no meh biesse. Spötischtens i de Playoff muess me sowiet si das me sich ufenes Spiu cha konzentriere. Einzig und allei ufens Spiu. We me sich vo so Sache lot lo drus bringe de isch me sicher fäu am Platz. Und das isch eis Problem wo mr gha hei, nid nume geschtr. Konzentriere ufs Wäsentliche. I hasse Interview a WM oder Olympia wo Spiler ihri Leischtig begründe mit de Wort: "Mir si nid parat gsi". Genau a dene Turnier, genau i dene Spiu (wie Playoff) muess me parat si. Genau das isch d Ufgab vo üs Trainer und vo jedem Spiler säuber. Mi darf sich do ou nid säuber ahlüge, das isch tödlich. Mir hei aus probiert für parat z si i däm Spiu, und i bhoupte i de Chöpf si mrs ou gsi! Was isch de z Problem gsi? Warum si mr 1:4 hinge nachem erschte Drittu? D Antowrt isch eifach: Sierre het z Mässer am Haus gha und het ou so gspiut. Kampf u Louf um jede Ball!! Mir si zwar parat gsi i de Chöpf, aber nid gwillt dä Ufwand z triebe wo nötig wär gsi für ne Sieg. Jo i weiss, i fordere do viu vo mine Spieler. Ufem Grossfäud vo Sierre isch dr Ufwand no viu grösser aus uf üsem Platz. Aber geschtr (i däm erschte Drittu) si mr defninitiv nid gwillt gsi das uf üs z näh. Es wär aber dringend nötig gsi! We me nid gwillt isch 100% z gä, de muess me zuegä dass me e Final nid verdient het. Z Spiu isch nachem erschte Drittu aber entschide gsi. Wäge däm, und nume wäge däm! Z Zwöite isch de besser worde, ufs mou het me Kampf gseh und ufs mou hei mr de meh gmacht für dä Mätch. Ou z dritte Drittu isch guet gsi (obwohl mrs verlore hei) uf dene 40 Minute cha me sicher ufboue. Leider si mr nie meh aus 2 Goal dra ane cho, immer wieder isch grad bi üs eine "ine gheit". So wieni letscht Wuche ha gseit dr Ball isch für üs gloffe, so isch dr Ball i dene letschte 2 Drittu für Sierre gloffe.
E Car vou Zueschouer, diversi privati Outo voll Lüt hei das Spiu zum ne Heimspiu gmacht für üs. Merci für d Unterstützig. Das mr meh Zueschouer hei gha als d Walliser säuber isch doch es ihdrücklichs Zeiche gsi!

Es isch fürs nöchschte Spiu jetz leider nid gmacht mit de guet gmeinte Rät: "Deheim packet dirs, ufem Heimplatz sit dir besser gsi" die Sprüch gäbe e fautschi Sicherheit. Mir müesse jetz z Härz id Hand nä und jede muess 60 Minute bewiese dass är i dä Final wot. Nume das zeut. Aues andere isch blablabla. 2 Goaline, 14 gsundi Spiler, die verletzte Spiler und dr komplett Staff, jede muess das wöue, jede isch gforderet sich z steigere mit dene Mittu wo ihm zur Verfüegig stö! Nume so chöi mr dr Toum vom Finalihzug verwürkliche!

Thanx für d Unterstützig!!

PS nachem x-fache düreläse und korrigiere darf me das Posting gloub so veröffentliche. Es hei mi paar Zueschouer ahgsproche was gloffe sig uf dr Bank wius so "unruhig" sig gsi und darum darf me üsi (mini!) Sicht sicher ou so verträte.

Sierre (H) Playoff 1/2 Final

2009-04-07T10:07:00.003+02:00

"So soll es sein, so kann es bleiben, so hab ich es mir gewünscht, alles passt perfekt zusammen, weil endlich alles stimmt" Die erschte beide Strofe vo däm Lied (Ich+Ich) beschriebe so zimli guet d Gfüehlslag vo letscht Sunntig. 12:4 Sieg gäge Sierre. Vor dr Saison no hei mr z Magglingen diskutiert ob äch Sierre u Oberwil z schlo si. Skeptisch hei mr den gseit, jo doch, we aues stimmt de chöi mr eine vo de "zwöi Grosse" chutzele. Dass das i de Playoff Haubfinal sowiet isch u das grad mit 12:4, hei mr üs denn aber nid lo ertröime.
Perfekts Wätter, viu Zueschouer, motivierendi Transparänt, Ballön, Musig, ... hei dr Rahme bote für das Haubfinal. Aus Spiler e Troum zum ufloufe! Jede hets gnosse und jede het no chli zuesätzlichi Energie tanket dür au die Detail. Thanx!

Zum Spiu: Dr Mono het z Team perfekt ihgsteut. Die 2 Training, z Coaching am Sunntig... I muess zuegä i ha wieder mou Hüehnerhut übercho ir Kabine bir Matchvorbereitig. Z Team isch parat gsi, das het me gspürt. Parat es chlises Wunder z vollbringe. Erscht Ihsatz: 1:0 düre Schäume! D Weiche si uf Sieg steut gsi. Paar Sekunde später dr Schock vom Tag. Dr Rämsi wird checket, schreit und uf dr Bank hei mr sofort gwüsst was passiert isch: D Schultere usgränkt! Schmärzhafti Sekunde wo sich zu schmärzhafte Stunde zieh. Nid scho wieder e Usfau!!! Nach paarne Minute i somne Spiu scho d Linie umsteue. Mit em Römu het somit dr viert 90er Johrgang gspiut. Ufem Spiufäud het me das aber nid gross gmerkt. D Motivation isch dür dä Usfau no chli grösser worde und dr Ball isch für üs gloffe. 2:1 vore nach 20 Minute. Vom Ufwand här es sehr magers Resultat. 4 gäge 4 hei mir z Spiu gmacht, aber d Goal si nid gfaue. Das het sich de aber im zwöite Drittu gänderet. Z Tämpo isch gliech blibe, aber d Gägewehr het chli noche glo, und ufs mou passe d Schüss wo vorhär no dernäbe si. 7:2 vore nach 2 Drittu. Das hei mr doch hie z Gränche scho mou gha gäge gliech Gägner? Spricht me das a ir Kabine? Gwüsst hets jo schliesslich jede. Dr Unterschid a däm Tag isch aber gsi dass mr die erschte 40 Minute sehr starch gspiut hei. Mit däm Säubschtvertroue isch üs dr Sieg fasch nüm z näh gsi. Sierre hets üs de im letschte Drittu eifach gmacht. Dummi Strofe hei zu paarne Powerplay gfüehrt. Und das het a däm Tag klappet. Allei dr Ludo het 4 vo sine 5 Goal i Überzahl gschosse. Goal wo fasch nid z beschriebe si. Die Drü im letschte Drittu si au genau gliech ine... hei eifach passt. Wahnsinn gsi! 12:4 nach 60 Minute! Näbscht em Ludo hei Goal gschosse: Züri, Schäume, Geru (je2) u dr Römu eis.
Nachem Spiu het dr eint u ander vo "Glück" gredet. "Si hei haut eifach ahghänkt" si so Sprüch gsi. Jo, isch eso. Wie gseit: Dr Ball isch für üse gloffe a däm Sunntig. Mi darf aber eis ou nid vergässe we me vo "Glück" redet. Mir hei mit em Steve, Rämsi zwe Nativerteidiger wo usgfaue si die Saison u mit em Märe, Cedu, Flips drei wieteri Langzytsfäu. Das relativiert das "Glück" gloub wieder um einiges!!

1:0 vore ir Serie. Nid meh und nid weniger. Nach dem Spiel ist vor dem Spiel. Ob mit eim oder acht Goal gwunne spiut ke Rolle me. Z Sierre unge gits e nöie Mätch wo bi null afot. Nid nume das: Uf em grosse Spiufäud ischs fasch e anderi Sportart. Mir wärde gseh wie mr mit dere Situation z schlag chöme. Sierre isch sich die Infrastruktur vo de Training här gwöhnt, für üs wirds es sehr schwirigs Spiu. I de Chöpf si mr sicher für nes "zwöits Wunder" parat. Taktisch müesse mr üs aber zimli heftig ahpasse. Am Sunntig 19. April ischs sowiet. Vor 3 Johr hei mrs scho mou vollbracht i de Haubfinal, mit dr Unterstützig vom ne Car vou Lüt. Wär schön we dr eint oder ander ou das mou derbi wär :-)

Aegerten (A) Playoff 1/4 Final

2009-03-23T10:07:00.012+01:00

Churz zämegfasst: 20 Minute "guets" Hockey hei glängt für dä 13:8 Sieg gäge Aegerten. Z Spiu gwunne, d Serie gwunne und somit für d Halbfinal gäge Sierre qualifiziert! Z Minimalziel für die Saison isch somit gschafft! Juhui! Es isch aber e "Zangegeburt" gsi. Ufs Tämpo drücke, mit Härz kämfe, im erschte Drittu d Entscheidig sueche... dasch mi Plan gsi... aber mit däm hani wieder mou am Team verbi predigt. Üse Ihsatz isch z chli und d Gägewehr vo Aegerten isch z gross gsi! No vorere Wuche hei mr es Pressing chönne spile wo seinesgleichen suecht, und nume 7 Tag spöter verliere mr jede Zwöikampf und bringe i de erschte 10 Minute ganzi 2 Schüss ufs gägnerische Goal. Was isch do passiert i dere Zyt? Arroganz? Unterschätzt? Hei mir üs überschätzt? Äuä vo auem chlei! Und dene wo mit dere liederliche Ihstellig a das Spiu si cho git dr Sieg jo no rächt. Es het nid meh brucht, stimmt. Oder anders gseit äbe: Es guets Powerplay, es guets Mittudrittu, und e starchi dritti Linie hei dr Unterschid gmacht zu Aegerten. Mi muess sicher nid aues hingerfroge nach däm Spiu. D Gründ für die schlächti Leistig lige uf dr Hand. Und es si Sache wo üs gäge Sierre nüm wärde passiere! Zum Spiu: 3:2 vore nachem erschte Drittu. I schätze mou das Aegerten 70-80% vom Spiu gmacht het. Mir hei aber e sehr guete Ertrag gha us däm Mischt wo mr gspiut hei (2 PP Goal). Z Mittudrittu isch de z eigentliche Highlight gsi i däm Mätch. Zur augemeine Überraschig hei mr vom Startbully a chöne 3 Gäng höcher schaute und hei ändlich z Spiu id Häng gno. 6:1 gwunne zum Zwüscheresultat vo 9:3! D Entscheidig isch somit gfaue und mir hei d Halbfinal chönne bueche. Z letschte Drittu isch es leben und leben lassen gsi. Mir hei (wieder zu Überraschig vo aune) paar Gäng zrug gschaute und Aegerten het öpis für d Resultatkosmetik gmacht: 4:5 hei mr die 20 Minute verlore. Somit ischs 13:8 gstande am Schluss. Es Resultat wo niemer me wird derno froge änds Saison. Torschütze i däm Spiu si gsi: Kris, Nicku, Züri, Römu je 2 mou, und dr Ba, Schäume, Ludo, Geru, Rämsi (you're welcome) je einisch.
Was nimmt me us so Spiu mit? Während dr Ski WM hani es Interview mir em Ambrosi Hofmann gseh woni ha müess schmunzle. Nach sim erschte verpatzte Renne het är uf d Frog, was är jetz machi gantwortet: "Z Video luege, analysiere, und de aus vergässe" I gloube z Video luege lö mr lo si, z analysiere schiebe mr ufe Früehlig und somit bliebt z vergässe! Stärchine pflege und nid uf de Schwächine ume hacke! Jetz fot d Saison ersch richtig a und mir brueche üsi Chräft nid nume körperlich, sondern ou Mental. Es Merci no a üsi zahlrieche Zueschouer! Es geit wieter mit de Haubfinal gäge Sierre am Sunntig 5. April z Gränche. Wär schön we mr ou dört wieder chönnte ufe "6. Ma" am Spiufäudrand zeue! D Spiler hei viu gschaffet die Saison für dä Momänt vor ihrne Fründe/Bekannte/Verwante chönne z gniesse. U i dänke si hättes verdient. Thanx!! Z Rückspiu wär de nach Oschtere em 19. April z Sierre und es allfälligs dritts Spiu am 26. April z Gränche.

Aegerten (H) Playoff 1/4 Final

2009-03-16T08:04:00.011+01:00

Es git Lüt, i däm Fau es Chind, wo aus merke unds nachem Spiu ufe Punkt bringe: Jedes Drittu heige mr es Goal weniger gschosse und ersch no eis meh übercho!!
...isch gloub aber bi dene Spiuständ nid sooooo tragisch. Drittusresultat vo 5:0/4:1/3:2 lö sich doch lo zeige! Wie isches zu dene Resultat cho? I muess für einisch wyt go ushole. Nachem letschte Weekend hani uf gueti Training ghofft. Das am Mittwuch isch scho mou guet use cho. Das em Fritig isch de grad no mou e Liga höcher gsi. Es isch äuä vor Intensität z beschte gsi sit letsch Novämber und das het doch sehr zueversichtlich gstumme für dä Playoffstart. Z sehr schöne Wätter isch de derzue cho und so hei mr das Spiu perfekt i Ahgriff chönne nä. Einzige Negativpunkt: D Verletzigslischte wird mit em Usfau vom Cedu eifach nid chliner! So ischs cho das mit em Fäbu e Verteidiger sis Debüt im Sturm het chönne gä: Mir hei z Spiu vo Ahfang a i üsi Hand gno und hei ufs Tämpo drückt. Es Bullygoal vom Marti und es Goal vom Lars isch dr Ertrag gsi us däm. Ahschliessen hets de chli "herter" gha für Goal z schiesse. Z Spiu hei mr gäng no gmacht, d Chancene ou gha, aber im Abschluss het aues chli verspiut usgseh. D "Chrampfer" wie Kris, Geru,... hei de no chli me müesse kämfe das sich das gänderet het. Dr Geru isch uf au Fäu vor 16. Minute a so richtig i Flow cho und het üs mit emne lupereine Hattrick no vor dr Pouse mit 5:0 i Füehrig brocht. 3 Goal i paarne Minute, i eim Drittu, ohni Gägegoal und andere Goal derzwüsche... Irgendwo zwüsche de Ziele i de Statute steit gloub was me do müess zahle nachem Mätch ;-) Das Spiu isch nach däm Spiustand gloffe gsi. Wieter Tämpo mache, d Glägeheit vom Ärnschtkampf nutze, GNIESSE! So hätts söue wieter go, und so ischs ou wieter gange. Lars, Züri, Marti (wo isch dä här cho?), Geru sie die nöchschte Torschütze gsi und nach 40 Minute isch 9:1 gstande. 8 Goal Füehrig vorem letschte Drittu und mi macht sich natürlich im Trainertrio Gedanke was me no wet gseh die letsch 20 Minute. Goaliwächsu? Anderi Specialteams? Anderi Linie teschte? Für einisch hei mr üs aber gäge das entschide und so isch lediglich zum Ihsatz vom Trisu und Römu cho. D Lüt hei i ihrne Stammformatione nomou söue "Praxis"erfahrig sammle. Es chunt schliesslich es wichtigs Spiu nöchscht Wuche und we aues guet louft hoffentlich no mindischtens zwöi wieteri. D Gschicht vom letschte Drittu isch schnäu verzeut. Ahgfange hets mit em einzige Unterzahlgoal wo mr bercho hei. Dr Kris, Züri und dr Schäume hei de aber ou no chönne score. 12:3 isch z Ändresultat gsi. Es geit wieter nöchscht Sunntig. Es isch aber no nid ganz klar um weli Zyt. Dr Spiuplan isch sehr "lebändig" ersteut worde, es isch aber natürlich schwär aui "Wünschli" unter ei Huet z bringe. Das hei mr jo letscht Weekend z Martinach gseh. Item, Sunntig z Aegerten müesse mr die Leitisch bestätige. Oder no chli früecher: Die Wuche i de Training dr Grundstei derzue lege das mr für einisch i de 1/4 Final nid über 3 Spiu müesse. Das hätti scho lang nüm erläbt.

Zum Schluss no e "Trap" i Perfektion ;-) Hie usgfhüehrt vom Nicku:

Martigny (A)

2009-03-11T11:01:00.006+01:00

Vouständigkeitshauber hie gliech no paar Gedanke zum Martigny Spiu: Wie spiut es Team z letschte Spiu vor Meischterschaft we me genau weiss es geit um nüme. Und z ganze em ne Sunntig obe mit ere "reduzierte" Mannschaft?

a) Mi nimmt das Spiu zum Plousch u probiert villech z einte u z andere
b) Mi nimmt das Spiu aus Houptprob für d Playoff
c) Mi seit mi nimmt das Spiu aus Houptprob und spiut de zum Plousch

Genau, d Antwort c) wo eigentlich gar nid zur Debatte isch gstande isch gwäut worde i däm unwichtige Spiu. E riesigi Entüschig was mr erläbt hei i däm erschte Drittu. 1:4 hinge nach 20 Minute. Und es wiederspieglet genau z Spiu. I de Abschlüss sehr ungnau und hinge hei mr JEDE Zwöikampf verlore. Und für das fahre mr em Sunntig Obe iz Wallis? Für nes kollektivs Blackout? Es het de z ufböume vo zwe dreine Spiler brucht im Mittudrittu zum nid die letschi Hoffnig z verliere das Spiu doch no chönne z gwinne. Nume dank däm hei mr das Drittu mit 5:1 für üs chönne entscheide. So ischs nach 40 Minute 6:5 gstande. Im letschte Drittu hei mr de 8:6 chönne dervo zieh bevor Martigny 2 Minute vor Schluss dr Aschlussträffer zum 8:7 gschosse het. Mit 5 Fäudspiler hei si ufe Usgliech drückt, dr Geru het ne aber mit sim erlösende Goal e Strich dür d Rächnig gmacht. 9:7 gwunne im ne himmutruurige Spiu. Dr Züri (2), dr Ludo (2), dr Ba (2), dr Geru (2) u dr Yänsu si d Torschütze gsi. Ou we z Team nume es Durchschnittsauter vo 21i het, so hät doch im erschte Drittu sowie i de Specialgames viu me söue drinne lige.
Z Positive us däm Mätch? Mit em Marti Lüku, em Rothenbühler Daniel und em Sterchi Yannick si drei Juniore zu ihrne erschte Drittu bzw zu ihrne erschte Spiu ir NLA cho. Leider hei si vom Regiocup scho zimli schwäri Bei gha. Hei aber ihri Chance packt und doch paar sehr gueti Szene gha i däm Spiu. Dr Yannick het sogar düre gspiut und sis erschte Goal erzielt: Härzliche Glückwunsch! Das är ufem richtige Wäg isch um mou e ganz Grosse z wärde ir NLA weiss me jo gloub scho lang. Wie vorhär scho bim Lars u bi andere Juniore wäre mr natürlich froh we si dä Wäg bi üs gö und nid andere Verlockige erlige... dr Verein läbt schliesslich vo sim Nachwuchs.

Es geit wieter mit de Playoffs. D Date stö und i würd gärn säge mir si bereit. Nach däm Spiu bruchts aber i de Training e Reaktion, nume so chöi mr 100% abrüefe nöchscht Sunntig! Oder mir gloube mou a die goldigi Regle dass e misslungeni Houtprob d Garantie isch für ne guete Ärnschtkampf!

Martigny (A) Nachtragspiel

2009-03-05T20:01:00.004+01:00

Em Regiocup, em Nachwuchs, em Konzept Leistigssport und em Friede z lieb hei mr üs lo überrede (us Rücksicht darfi hie nid z Wort bruche wo besser würd passe):

Z Nachtragspiu z Martigny findet (trotz Sperrdatum) em SUNNTIG 8. März, 16:00 statt.

SSHA life

2009-03-05T13:16:00.003+01:00

News rund um d SSHA git jetz hie:

Bonstetten (H)

2009-03-02T11:20:00.008+01:00

D Vorzeiche für das Spiu? Bonstetten muess gwinne für das si nid 2 Plätz und somit z Heimrächt i de Playoff verliere. U mir? Ke Druck, dr zwöit Platz isch uf sicher. Es Spiel aus Houptprob für d Playoff... Und mir hei z Spiu gmacht vor erschte Sekunde a. 4:0 nach 6:19 und es isch eigentlich scho gloffe gsi. Dr Druck het d Zürcher sichtlich närvös gmacht. Nüt het funktioniert a däm Tag. Und dä Druck isch natürlich mi em Rückstand no grösser worde. 4 Goal und aui si vor glieche Position us gschosse worde, aues Slotgoal vo links (eigentlich nid grad üsi "Schoggisiete"). Dr Ludo 2 mou, dr Fäbu einisch und dr Lars hei troffe. D Überzahl isch eigentlich z einzige Mittu gsi wo Bosntette üs het chönne schlo. Dummi bis soudummi Strofe hei ihne die Möglichkeit ou gä. Und ufs mou ischs im Mittudrittu dür 3 Powerplaygoal 4:3 gstande. Innerhaub 10 Minute hei mr aber dank em Marti, Schäume, Ba (warum die 3 Verteidiger ou usschliesslich Slotgoal erziele sei mou dahingestellt) und em Ludo uf 8:3 chönne dervo zie. Z letschte Drittu isch de definitiv nume no Zugabe gsi. Aus Höhepünkt uf üsere Siete het mit em Marc Stettler (bitte merke!) dr Goali vo de Juniore sis NLA Debüt gä. Und jo, är het si Chance packt und het zeigt das sich die andere zwe Ersatzgoaline müesse warm ahlege. Somit isch die Saison scho dr 4 Goali zum Ihsatz cho (Dr Märe wo ir offizielle SSHA Goalistatistik ou erwähnt isch no nid mitzeut ;-) ) Dr Nicku, Geru und Ste hei im letschte Drittu no für üs troffe und z Ändresultat vo 11:4 vervollständigt.
Was nimmt me us so Spiu use? Säubschtvertroue für d Playoff? Z schlächte Unter-/Überzahlspiu? Z Wüsse mi cha gäge körperlich überlägeni Teams mit Schäuigkeit besto? Es git sehr viu us däm Mätch use. 2 Wuche und nähr gseh mr obs z richtige isch gsi. Den geits los! Juhui! Vorhär chunt no z Spiu gäge Martigny. Das isch vorere Wuche wäge Schnee verschobe worde. Leider het mes z Martigny bis hüt no nid nötig uf Ahfroge vo üs und em Verband z reagiere wen me das Spiu chönt nochehole, owohl nume dr Samschtig 7. März zur Verfüegig steit... Und ou d SSHA het sich bis jetz nid chönne düreringe dä Mätch ahzsetze :-( Unter dene Umständ goni dervo us das si das Spiu nüm wei düregfüehrt ha und mr somit es Weekend Spiufrei hätte.

Solothurner Tagblatt

2009-02-17T11:44:00.002+01:00

Hie dr Bricht us em Solothurner Tagblatt

Solothurner Tagblatt

2009-02-10T11:24:00.003+01:00

Hie dr Bricht us em Solothurner Tagblatt

Bettlach (A)

2009-02-08T00:21:00.007+01:00

Es Derby wies im Bilderbuech steit... Mit üs aus glücklichem 9:8 Sieger. Glücklich, aber sicher nid unverdient. Mir hei viu garbeitet i dene 60 Minute für das Spiu, sehr viu. Unnötigi Strofe hei üs de aber fasch ume Lohn brocht vo dere Arbeit! Die Wuche isch sehr viu diskutiert worde i de Training. Dasch sicher nötig gsi nach dere Schlappe im Cup. Was drus gno wird, wüsse mr nach däm Sieg no nid definitiv. Dr erscht Schritt isch aber sicher gmacht, und zwöi sehr wichtigi Pünkt füre Platz 2 hei mr ufem Konto. Sorge macht eim aber d Verletztelischte wo mitlerwiele bau länger isch aus d Mannschaftsufstelig. Näbscht de Langzytverletzte Flips und Steve si mit em Märe, Cedu, Rämsi, Züri nomou 4 wieteri usgfaue die Wuche. Sehr schlächti Vorzeiche we me sich so viu vorgno het für nes Spiel. So ischs cho das haut die jüngere hei müesse Verantwortig übernä. Mit em Römu ar Siete vom Trisu, und em Fäbu hingerem Kris, hei (inkl Lars) FÜF 90er Johrgäng vo Ahfang a gspiut. Und si hei ihri sach sehr guet gmacht. 2:2 nachem erschte Drittu, einisch dr Römu und einisch dr Fäbu ... Leider ischs de nid so z Spiel vo de Goaline worde. 9:8 isch jo doch eher es höchs Resultat. Einzig und allei 3 vo 17 Goal si usem Slot gschosse worde. Sogar 4 Goal si vor Mittulinie erziel gsi. Wietschüss wo üs vor allem im letschte Drittu hei z Läbe schwär gmacht. Im Mittudrittu si mr aber vorhär nid z letscht wägemne Hattrick vom Geru 7:4 i Füehrig. Sehr viu Strofe, unkonzentrierts Spiu und scho het Bettlach im letschte Drittu z Blatt gwändet. 4(!) Goal nachenand ir Überzahl und ufs Mou si mr 7:8 hinge gsi. Z Powerplay vo de Bettlacher isch extrem effiziänt gsi und somit isch dr Schlusspurt lanciert gsi. Hie hei mr "das Glück des Tüchtigen" i ahspruch gno und dankend YES gseit. Dr Schäume mit em 8:8, und dr Lars 3 Minute vor Schluss mit em 9:8 hei üs die beide Punkt gsicheret. (hie em Lars si Siegesträffer vor Mittulinie) Em Sunntig spile mr z Aegerten. Im Momänt wär das lut Tabäue üse 1/4 Final Gägner. Mi cha auso gspannt si was i dere Houtprob passiert. Guet, bis zu de Playoff chas no mängi Verschiebig gä, mir hoffe mou das mr dä 2. Platz chöi bhaute. Wie gseit, dr erscht vo 4 Schritte hei mr hüt gmacht.

Belp (H Cup)

2009-02-01T20:14:00.002+01:00

E diskusionslosi 7:11 Niederlag hei mr im Cup gäge Belp ihgfange. Wär gmeint het mir chönni 14 Tag nach dr letschte Schlappe reagiere, dä het ou dä Samschtig müesse enttüsch hei fahre. Genau gliech wie im Meischterschaftsspiu si mr wieder die schlächteri Mannschaft gsi und si mit em herte Spiu vo de Gürbetaler wieder nid z schlag cho. Leider. Phasewies si mr sogar vorgfüehrt worde. Erstunlich für ne Gruppe wo sich dr Cupfinal aus Ziel gsetzt het. :-(
Uf d Detail vo däm Spiu würdi gärn verzichte, d Enttüschig sitzt sehr tief...
Z Positive drus? Mir müesse feststeue das mr bi wietem nid dört stö wo mr eigentlich gmeint hei. Churz vor de Playoff isch no sehr viu Arbeit ume, Defizit wo si ufzeigt worde i dene 2 Spiu, Sache wo die nöchschte Training und Teambesprächige wärde präge. Jetz chöi mr no reagier, im ne Monet ischs z spät. Und es wird Reaktione gä, sicher scho dä Mittwuch!

Spielfrei

2009-01-26T10:47:00.012+01:00

Bi J+S Kids spötischtens lehrt me, dass Polisportiv z si, öpis sehr guets isch. Ok, das isch sicher nid d Überlegig gsi vo üsem Vorstand wo si das Skiweekend für üs organisiert hei ;-) Skifahre und Snowboarde isch gloub ou nid würklich dr bescht Usgliechssport so churz vor Playoffbeginn. Aber es isch doch mou e Abwächslig im Wuchenändrhythmus vom ne Streethockeyspiler. Und so ganz ohni Hockey geits ou a so Ahläss jo eh nid. So findet me zum Biespiu bim de Skiliftgspräch use, das me letscht Wuche het Seich bloget wo me gross gschribe het mir heigi d Diräktbegägnig gäge Belp für üs entschide, derbi ischs usgliche... Aber das si nume Detail.

Samschtig Morge 7i Abfahrt. Es schneit, het Näbu, d Wätterprognose seit schlimms vorus füre hüttig Tag... Paar Optimischte kämpfe sich gliech dr Bärg uf und wärde im Verlouf vom Tag mit söttigem Wätter belohnt: Keni Lüt, guete Schnee, und zwüschdüre super Bedingige. Ok, am spöter Nomi wo me chum me d Skispitze gseh het wägem Näbu hets ou mir nüm so pässerlet! Aber für das gits jo de "teambildendi Alternativprogramm". D Lokalität derfür isch schliesslich no gmüetlich gsi: (Quelle Foto: Tipibar.ch)
Und d Musig het ou keni Wünsch offe glo. Die einte hei ou hie chönne ihri Hockeygspräch wieter füehre, die andere hei sich chli mit Fremdsprache beschäftig (es isch aus chli anders bi de Wäutsche...) eine het sogar si Troum vom ne Stage-Diving sprung chönne erfülle ;-) und e andere het ändlich mou dr Muet zäme gno und em Drehner gseit was är vonim hautet (mi müesst haut aube luege das me z richtige Nummero wählt we me eim wot wüescht säge, oder haut z nöie Handy zersch mou chli kenne lehre... ) ;-) Wär dr ganz Tag sini Turnschueh im Rucksack het mitgschlept ("lo doch dä hie, mir chöme immer wieder do düre...") hets natürlich chli besser gha als die andere, aber was solls. ;-) Keni Verletzti nach däm Skitag isch doch z erfolgrieche Resume... Sigs uf dr Piste

oder "liecht" näb dr Piste ;-)

und ou z Freestyle isch ohni Material- oder ander Brüch über d Bühni.
Es isch es super Weekend gsi zum enand wieder mou chli näbem Fäud besser kenne z lehre ;-) :
Härzliche Dank vo aune Ahwäsende ad Organisatore vo däm Usflug!

Belp (H)

2009-01-19T11:15:00.005+01:00

3:6 verlore im Derby gäge Belp. Es het nid viu zäme passt i üsem Spiu dä Sunntig. Belp isch die besseri Mannschaft gsi. Het meh gmacht füre Sieg. Kämpferisch, technisch hei mr schlicht nid chönne mithaute. Si hei wöue gwinne und si gwillt gsi dä Ufwand derfür z triebe. Nid das mir das nid hei wöue, aber es si sicher nid aui gwiut gsi dr Pries derfür z zahle. Mi cha Usrede sueche im schlächte Wätter oder bi de (diplomatisch usdrückt) "unsicher würkende" ;-) Schiedsrichter. Das het aber weder Belp no üs e Vor-/Nachteil brocht. D Gürbetaler si dermit z rächt cho, und mir nid. Entschuldigunge gits auso keni. Bis ufene Entschuldigung a Zueschouer wo bi däm Mischtwätter das Spiu si cho luege und vo üs sehr entüscht si worde. Sorry!
E Blick uf d Statistik: 1:1 nachem erschte Drittu. Z 0:1 bei mr i Unterzahl bercho, z 1:1 het dr Lars gschosse. Nachem 2. Drittu isch 2:4 gsi: z 1:2 es Eigegoal i Unterzahl de 1:3 bi vier gäge vier und de z 1:4 wieder i Unterzahl. Dr Geru het vor dr Pouse no chönne dr 2:4 Ahschlussträffer schiesse. Är ischs de ou gsi wo nomou het Hoffnig lo ufcho mit em 3:4 im letschte. Doch z 3:5 het die Hoffnig zunichte gmacht und z 3:6 iz lähre Goal het nume no (unwichtige, da mr ir Diräktbegägnig gäge Belp besser do stö) statistische Wärt gha.
Symptomatisch für üsi Leischtig isch ou d Statistik i de Specialgames: 3 Goal bercho ir Unterzahl und i 3 oder 4 Powerplay kes gschosse. Bi 3 Goal Differänz im Schlussresultat chame sich säuber zämeriehme was do wär möglich gsi.
Es isch e Reaktion gfrogt, und zwar nid nume e chlini! Und die chöi mr gäge gliech Gägner am Samschtig 31.1. z Gränche grad säuber gä. Do cha jede wieder guetmache für das wo mir geschtr uf u näbem Fäud hei abglo!

Seetal (H)

2009-01-12T11:20:00.011+01:00

Es isch chaut gsi, sehr chaut... dasch mou z erschte Fazit. Z Zwöite isch: E verdiente 8:3 Sieg gäge Seetal. Z Dritte: Mit emne Rumpfteam und diverse Änderige cha me ou Spiu gwinne.
D Ufstellig isch sicher nid jedermanns Sach gsi. Schliesslich weiss es jo sicher jede besser aus die beide Trainer. Warum dr Rämsi nach nume 2 Training scho 60 Minute spiut, warum mir nid mit em Dave i Hochform spile, warum dr Schäume nachere Wuche Verletzig scho wieder spiut, warum nid ir Überzahl, warum 3 Stürmer ir Verteidigung spile usw. Problemli wo mr üs i ändlose Diskusione hei d Köpf zerbroche die Wuche. Mit em Steve, Flips, Ba, Marti, Fäbu si mitlerwiele 5 Verteidiger wo usgfaue si. Klar spiut do nüm jede uf sire Lieblingsposition mit sine gwohnte "Gspändli", aber mir hei doch z Beschte drus gmacht, do dervo bini überzoge. Schliesslich hei mr die 2 Pünkt z Gränche bhautet! Zum Spiu säuber: Taktisch ischs es ähnlichs Spiu gsi wie letscht Wuche z Bonstetten. Mir hei wöue z Spiu mache und hei wöue möglichscht weni Konter bercho. Quasi "Angriff aus Verteidigung". Dasch üb über fasch 60 Minute ou sehr guet glunge. Was wieder gfäut het isch dr letscht Biss, dr letscht Wille im Abschluss. Dr Killerinstinkt, oder no besser: Dr Keuleinstinkt. D Outomatisme i de Linie hei dür die vermischte Konstellatione sicher glitte. Do düre isch natürlich ou z Spiu gäge vore nüm so guet gange, aber aus Usred cha me das nid lo gäute. Em erwähnt 11er isch früecher egal gsi was är für 3 Spiler ir Linie gha het, mängischhet me sogar z Gfüehl gha är heig näb de Goaline no 7 anderi Gägespiler ufem Fäud... aber d Goal si gfaue, egal mit wäm, egal gäg wär! ...Aber wieder zur Gägewart ;-) Z Spiu isch jo bis uf d Abschlüss würklich guet gsi! Dr Reihe no dr Cedu, dr Nicku u dr Schäume hei üs im erschte Drittu 3:0 i Füehrig brocht. Im Mittudrittu het de dr Römu u nomou dr Cedu die Füehrig chönne usboue. Leider isch de aber nacher abgloffne Strof dr erscht Gägeträffer cho. 2:1 i däm Mittudrittu, 5:1 im Total. Z letschte Drittu het ou nüm viu nöis brocht. D Füehrig über d Rundi bringe ohni hinge Risiko ihzgo, auso das si nid Wort us dr Kabine, aber das wiederspieglet z Spiugscheh. Und z positive: Dr Lars u Geru hei zum 7:1 erhöt. I Unterzahl hei mr de aber no z 7:2 müesse ihstecke. D Schlusspünkt si gsetzt worde vom Ludo (8:2) und de nomou vom Gägegoal zum Schlusstand vo 8:3.
D Verspiltheit im Abschluss gseht me übrigens ou sehr ihdrücklich ir Statistik vo de Goal: 8 Goal, und aui 8 si usem Slot erzielt worde. Einzig em Geru sis Überzahlgoal isch meh aus 4-5 Meter vom Goal wäg gsi...
I dänke aber mi cha vore gschlossne, guete bis sehr guete Leistig rede unter dene Vorzeiche wo das Spiu gha het.
Dr Zäuer het i däm Spiu sis 60 Minute Debut ir NLA gä und het zeigt was mit viu Wille innerhaub vomne haube Johr aues möglich isch, ou wes nid immer so ring geit. Letscht Saison nöi i Verein, das Johr nöi iz Eis und scho wärde Tröim wahr. I dänke (no) nid dr "gröscht" Troum, aber es isch doch e Ahfang ufem Wäg derzue. Hoffentlich haute sich d Schmärze i Gränze die Tage ;-)
Em Sunntig chunnt Belp uf Gränche. Anders Spiel, anderi Taktik, anderi Vorzeiche. Bi gspannt was bis denn aus passiert und wie das Spiu über d Rundi geit. Mir wei parat si für das Derby und mir brüchti Pünkt gäge üsi diräkte Verfolger...

Chrafttraining (mou chli "andersch")

2009-01-06T08:46:00.009+01:00

Geschtr hei sich 12 Lüt im Eichholz ihgfunde mit emne gmeinsame Ziel: Bi 8 Grad Minus, e Platz bedeckt mit ca. 100 m3 Schnee und Isch, "Trainingsfähig" z mache. Und so het die Useforderig usgseh: Was chönt me ou süsch mache a somne Mäntig obe ;-) Dr Fäbu, Trisu, Pädu, Dave, Geru, Nicku, Mono, Joe, Yannick, Zäuer, Märe hei sich gopferet für die Ufgab. Schnee wär no eis gsi, aber obe düre gfrohre und unge düre Isch pur! Schufle um Schufle, Meter für Meter... Mir si doch zimli zügig Vorwärts cho. Es si no Wette gloffe wäm sis Wärkzüg aus erschts bricht, aber mir heis im Griff gha. Und das obwohl d Quote für mini Plastikschufle mit 11:1 am schlechtischte si gsi. Wie gseit "mit dere darfsch nid z fescht drücke, süsch schuflisch dr Belag ou grad furt" ;-)
Wär so guet mit ere Goalicheue cha umgo däm ligt ou z schufle (Grücht gö ume är heigs im Bonstettespiu scho mou güebt, aber das bhoupte nume ganz bösi Zunge...) Dases sich hie um ne Goali handlet gseht me i däm Biud ou a de Händsche... Stockhand bedeckt, aber mit Fanghändsche lot sich haut nid schufle ;-) Und apropos Goaline: z Ziel hie isch gloub e Schneebar uf dr Grundlinie gsi oder so öpis ;-)
Jo, und irgendeinisch nach ca. 2 Stund Chrampf si mr de gäge z Ändi cho
Merci a aui Häufer füre Ihsatz!!

Bonstetten (A)

2009-01-05T10:12:00.007+01:00

Nach Verluschtupunkt si mr ir Tabäue ufem gliech Platz gsi wie Bonstetten. Das allei het doch sehr viu versproche für das Spiu.
Ufs Tämpo drücke und üses Spiu mache isch dr Plan gsi. Das isch üs über grossi Teile vo dene 60 Minute ou glunge. Doch leider hei mr im Abschluss verseit. Einersiets wiu dr letsch Wiue gfäut het vorem Goal und andersiets wiu mit em Jerome eine vo de beschte Goaline vor Schwiez im Goal vo de Zürcher gstande isch. 0:0 nachem erschte Drittu, und das obwohl mr äuä 18 vo 20 Minute ir Häufti vo de Zürcher umekügelet hei. Nid viu ändere, Geduld ha und wieter Druck mache im zwöite Drittu! Und de ändlich isch z hoch verdiente 1:0 gfaue. Doch leider het die Füehrig nume 1 Minute ghaute. Nachem 1:1 isch aber z Spiel richtig lanciert gsi aber die grossi Show vo de Goaline isch wieter gange. Mindischtens 4 Mou isch e Bonstetter allei ufe Dave gloffe. Derzue no e Penatly... Aus het är pariert! Vore hei mr wieterhin chönne Druck mache und so het dr Kris mit em Züri zäme nachere herrliche Kombination chönne z 2:1 schiesse. I däm Drittu hei mr 2 oder 3 Überzahle schadlos überstande. Z Glück isch uf üsere Siete gsi. Aber d Füehrig isch nid gstole gsi, im Gägeteil, mir hei viu meh gmacht für das Spiu. Mit 2:1 iz letschte Drittu, aus isch offe gsi, aber mir si z stärchere Team gsi a däm Sunntig. No einisch 3 Überzahlsituatione hei mr überstande und im Gägezug üsi beide Poweplay verwärtet. 6:1 isch gstande am Schluss. Dr Züri isch mit 3 Goal und 2 Assist dr erfolgriechscht Punktesammler gsi. Dr Dave het sini sehr gueti Leistig ou no mit 2 Assits chönne chröne. Wieter hei dr Nicku, dr Kris und dr Ludo no Goal gschosse. hie z 5:1 vom Züri vo 20 Meter i ober Egge...

So chönts wieter go das Johr ;-) Aber scho nöchscht Wuche warte Seetal uf üs. I hoffe mir berchömi dr Platz irgendwie suber die Wuche und es läng no fürs einte und andere Training. Nötig hei mrs sicher sehr, ou nach däm verdiente Sieg!

Sierre (H) Cup

2008-12-23T13:17:00.005+01:00

Mis Troumlos: Sierre deheim! Wenn me sich scho es Ziel setzt im Cup de muess me ou so grossi Gägner schlo! Dass das aber sehr schwär wird, het d Leischtig z vordere Weekend im Wallis zeigt.
Dä Sunntig si mr aber topmotiviert iz erschte Drittu gstartet. Jede isch sich säuber, de Mitspiler, de Zueschour e Reaktione schuldig gsi. Und die Reaktion isch ganz ganz ganz Ihdrücklich gsi. 20 Minute Hockey wo seinersgleichen suecht! 4:1 vore! 4 Minute Unterzahl überstande und i beidne Powerplay Goal gschosse. Noch am "Perfect Game". Doch im zwöite Drittu hei mr müesse feschtsteue dass ou Sierre me z biete het aus i de erschte 20 Minute. Mir hei Zwöikämpf verlore und si nüm so konzentriert gsi. Mit em Timeout nach 30' hei mr probiert d Maschine wieder zrug uf d Schine z bringe... ohni Erfolg! 2:0 hei mr das Drittu verlore und so isch mit 4:3 für Spanning im letschte gsorgt gsi!
Mit liecht umgsteute Linie hei mr die letschte 20 Minute i Ahgriff gno (im Nachhinein sicher e Fählentscheid...). Nachemne Doppuschlag innerhaub eire Minute si mr aber ufs mou 4:5 hinge gsi und hei scho Angscht gha mir gö wieder läär us. Kämpferisch si mr aber die dominierendi Mannschaft blibe und hei aus gmacht füre Usgliech! 3:32 vor Schluss isch de dä ou verdient düre Züri gfaue. Leider hei mr üs nid lang chönne dran fröie und so isch Sierre 30 Sekunde spöter dür ne 2:1 Konter düre Duc scho wieder i Füehrig. Kämpfe Kämpfe Kämpfe..... Z zwöite Mou i däm Spiel hei mr überleit was für 5 Ma mr wei ufs Fäud steue füre Schlusspurt. Bully hole vore wär gwünscht gsi... Und das Bully het dr Nicku gholt: Mit em 6:6 Usgliech :-) so schön.
D Verlängerig het müesse d Entscheidig bringe. Und do gits nid viu z säge derzue user: Die glücklicheri Mannschaft het gwunne. Dr Geru het vor Siete gschosse und dr Ball het es chlises Loch gfunde am Philu verbi. Unglücklich für ne Goali, zumal das Spiel vorhär isch prägt gsi vo sehr guete Goalileischtige uf beidne Siete! Dä Bau isch so komisch ine dasi nid emou chönt säge da muesch/chasch ha, dasch würklich Päch für Sierre gsi u Glück für üs!

E chlini Statistik am Rande: Es cha si das e wäutsche und e dütsche Schiri das Spiu pfieffe, ke Problem. Besser aus letscht Wuche z Sierre wo d Schirine ke Wort dütsch chönne hei und dr Geru aus Käpten nid wäutsch... Aber darfs si das dr wäutsch Schiri ALLI Strofe und usschliesslich Strofe (8 Stück) gäg üs pfiefft und dr dütsch bi kere d Hand uf het? Darfs si das ig di 2 Herre uf das ahspriche (ohni Vorwurf, do hani Züge!!) und mir dr eint de zimli Heftig a Charre fahrt und mr z versto git mir söue nid immer grad Gränne wäge Mafia, Verschwörige... und mir sigi säuber Tschuld, es sig immer z glieche mit üs jammeri Cheibe usw.?
Isch das die Kommunikation wo die säubschtkontrollierendi SSHR wot oder wei si würklich ou d Meinige vo Trainer, Spiler und Vereinverantwortliche zum sich ändlich mou z verbessere und vom hohen Rosse abe z cho? Wär no schön, wiu egal ob Schiri oder Trainer: Em Samschtig/Sunntig söte mir nume e ganz ganz ganz chlini Näberoue spile i üsem Lieblingssport! I probiere mi dra z haute! (Achtung, dasch nid die offizielli Homepage vom Verein. Das si subjektivi Meinige und Froge vom Trainer. Kontakt isch rächts uf dere Siete und nid d Vereinsmail ;-) )

Solothurner Tagblatt

2008-12-17T19:54:00.003+01:00

Hie dr Bricht us em Solothurner Tagblatt zum Sierrespiu.

SSHA life

2008-12-08T20:24:00.002+01:00

News rund um d SSHA git jetz hie:

Solothurner Tagblatt

2008-12-02T07:15:00.002+01:00

Hie dr Bricht us em Solothurner Tagblatt

Solothurner Tagblatt

2008-11-18T14:21:00.003+01:00

Hie dr Bricht us em Solothurner Tagblatt

u wiu mr wenigschtens ir Zytig mou näbenand uf gliecher Ougehöchi, und mr jo ou fasch Nachbare si, hie no öpis vom wäutbescht Unihockeyclub:

Aegerten (H)

2008-11-16T16:30:00.008+01:00

Nach em (sehr) guet Konditionstescht die Wuche hei mr üs höchi Ziel gsetzt füre Mätch gäge Aegerten! Z Spiu mache, ufs Tämpo drücke, ufs Goal schiesse... Oder anders gseit: Eifach spile... Die erschte paar Minute si aber de nid würklich das gsi wo mr üs vorgsteut hei. Zviu Fähler u zweni Kampf het derzue gfüehrt das ke Spiufluss isch ufcho. Ersch nach sächs sibe Minute, nachdäm d Aegerter üsi 1:0 Füehrig hei chönne usglieche hei mr üs derzue düre grunge chli meh Ihsatz z zeige.
Und wie sogar. Vore si d Bäu ine gheit und hinge het dr Dave i höchschtform d Fähler vor Defensive usbüglet. Mit 6:1 (!) nachem erschte Drittu isch de z Resultat sehr schmiechelnd gsi für üs. Aegerten het im zwöite de chönne ufdräie und het das ou 2:1 für sich chönne entscheide. Mit em Stand vo 7:3 het auso z letschte Drittu ahgfange. D Unterzahllinie het i dere Situation vom Spiu müesse brilliere und het e längeri 4:2 Situation schadlos überstande. Im Gägezug het de dr Cedu im Powerplay z dritte vo sine vier Goal gschosse. Aus hät e höcheri Macht Regie gfüehrt über das Spiu isch ou z 10te ihm "vergönnt" gsi (Merci!). Wieteri Torschütze: dr Züri u Ludo je 2, dr Lars, Geru, Steve je eis. 11:3 isch dr Schlussstand gsi und dr Dave het sich ou no chli chönne zrug lähne die letschte 10 Minute: Nöchscht Weekend isch Pouse, oder besser gseit: Güggelifescht D Wuche druf chunt de z Team vo Martigny uf Gränche. Mir si gspannt wär aus derbi wird si und fröie üs ufenes interessants Spiu. Aber vorhär fröie mr üs Öich dörfe ihzlade uf Limpach a "üses" Güggelifescht.
Hie gliech no e chlini Impression vom "Überflieger" usem Aegertenspiel: Hügli, weni mi nid tüsche...

Solothurner Tagblatt

2008-11-11T13:07:00.001+01:00

Hie dr Bricht us em Solothurner Tagblatt

Kernenried (A+H)

2008-11-10T10:31:00.010+01:00

Derbyweekend gäge Kernenried... Mi chas vo zwöine Siete ahluege: Negativ: Ei Punkt vo erhoffte 4 verlore! der äbe positiv: 2 Punkt me gholt aus letscht Saison! I los mou so lo stoh und mi cha sich sini Gedanke mache.
Em Samschtig het aus sehr guet ahgfange. Topmotiviert si mr i das Spiu gstartet. Hei vo Ahfang a Tämpo chönne mache und si ou zu diverse Chance cho. Es eher schlächts Powerplay het de zum 1:0 gfüehrt. Dasch aber z einzig schlächte PP gsi. Au andere hei super klapet und nid weniger aus 5 Goal het d Überzahllinie gschosse. Ei einzigi Chance isch useglo worde. Das isch das wo dr Unterschid gmacht het i däm Spiel. Im Gägezug hei d Rieder 4 Möglichkeite usgloh und hei nume einisch breicht. Nach 2:0 si mr ou no 4:1 im erschte Drittu i Füehrig, Teil hei aber leider e Gang zrug gschautet. 4:2 nachem erschte Drittu längt nid, das isch me sich bewusst gsi, aber het scho denn nid chönne reagiere. Mir hei zwar Chance gha, aber viu zweni drus gmacht. Individuelli Fähler hei de zum 5:4 Ahschluss nach 2 Drittu gfüehrt. Im letschte Drittu isch de aber z erlösende 6:4 cho und de im Powerplay no z 7:4 (hie im Bild:) 2 Pünkt mitgno us Zauggenried... Juhui! Torschütz si gsi: Dr Steve 4x im Powerplay, und dr Schäume, Züri, Ludo je einisch.
Doppuweekend heis so a sich das ou d Regeneration chli planet wird. Gmeinsams choche und ässe isch de ufem Programm gstande (Merci de Chöch und em Ba!!) Schliesslich wei jo d Kohlehydrattänk ou wieder gfüllt wärde so schnäu wie möglich. Früsch gstärkt und usgrueht het de am Sunntig z Heimspiu ahgfange. D Parallele zum Samschtig si do gsi: Mir hei z Spiel gmacht und si 2:0 i Füehrig. Leider hei mr üs nie viu meh chönne absetze und leider hei d Secialgames überhoupt nüm klappet. 3:2 isch nachem erschte gsi, 4:4 nachem zwöite. 3 Goal i Unterzahl bercho und keis im PP gschosse isch die schlächti Bilanz gsi. Z letschte Dritu het auso d Entscheidig müesse bringe. Und ou dört hei mr müesse z Spiel mache und hei probiert ufs Tämpo z drücke. Leider si d Bäu uf dr andere Seite inegheit. I chas nid anders säge... Mir hei afoh hadere mit üsem Spiu, mit de SR und mit allem andere aus jede mit sire eigenen Leistig. Leider. Churz vor Schluss isch de die erschtmaligi fasch tödlichi Füehrig für d Kernenrieder cho... us nüt. U ersch denn hei mr z erschte Mou a däm Tag chönne reagiere. Hei (komischerwies ersch denn) chönne Energie frei mache und hei Einbahnhockey gspiut. 7:7 isch no gfaue (zum Glück) aber für meh hets nid glängt Torschütze si gsi: dr Steve u Geru je 2, Ludo, Kris, Cedu je eis.
Mir müesse üs sicher paar Gedanke mache nach däm Spiu. Aber sicher nid nume a dä Punktverluscht dänke. Immerhin hei mr Drei gholt und hei üs dr 2 Platz ir Tabäue gfeschtigt.
Es geit die Wuche i de Training wieter... und wie: Mittwuch dr viugliebt ;-)Konditionstescht (Yoyo Tescht) und de am Friti d Vorbereitig ufs Aegertenspiu!

Cup: Sion (A)

2008-11-03T10:34:00.011+01:00

"Dr Cup het sini eigene Gsetz...." Was dä Satz mit üsem Spiu z tüe het? I weiss ou nid, aber mi ghört doch das immer wieder ;-) Nei im Ärnscht. Obwohl jede seit mi näm die Spiel gliech wie Meischterschaftsspipu bini immer no nid überzoge dervo. Guet, spötischtens ir nöchschte Rundi warte jo de anderi Gägner. Es isch definitiv anders im Cup aus süsch. Über das hani jo aber scho (z)viu philosophiert. Z Los het üs a däm schön Sunntig uf Sion gschickt. Z Wätter im Wallis het vou und ganz mitgmacht und so hei mr bi T-Shirt Temparature das Spiu i Ahgriff gno. Sehr verhaute si mr de aber gstartet. Zwar hei mr es höchs Tämpo chönne spile, aber d Spielwies isch schlächt gsi. Unnötigi (Seniore-)Päss dür drei Verteidiger düre, zweni Wille vorem Goal, ... mir hei eifach aues viu z schön wöue mache! Chunnt derzue das mr am ne sehr guet spilende Goali mou für mou gschieteret si. Einzig ir Unterzahl hei mr glänzt. 4:1 vore nachem erschte Drittu isch z Resultat gsi. Obwohl mr üs chli meh hei vorgno i däm Drittu het dr Dave de Fürobe gha und dr Zäuer het die nöchschte 40 Minute i Agriff gno. Z Spiu het de chli besseret. Isch aber eigentlich scho entschide gsi. Goal für Goal isch gfaue, aber ine eigentliche Rusch hei mr üs ersch im letschte Drittu chönne spile. Und das leider ou nume vereinzelt. 10:2 oder 11:2 isch nach zwöine Drittu gstande. Obwohl mr de i de letschte 20 Minute no 2 Goal hei bercho sis eigentlich die Beschte gsi. Dr Geru/Lars/Züri si de doch no i Flow cho und hei afo kombiniere und wirble das mr d Jäggli doch no hei müesse ahlege wägem Durchzug ;-) 18:4 hei mr das sehr faire Spiu für üs entschide. Dr Züri isch mit 4 Goal dr erfogriechscht Schütz gsi. Dr Geru und Lars hei je 3 mou troffe. Dr Ste (Merci fürs 10te! )und dr Nicku 2 mou und dr Schäume, Kris, Flips, Marti je einisch. E Blick uf d Goalstatistik zeigt dass es mit paarne Usnahme fasch nume Slotgoal het gä. Das wiederspieglet eigentlich die (zu) verspielti Spielwies vo üs. Ou süsch gits für Trainer meh us däm Spiu useznäh aus mr üs eigentlich erwünscht hätte. Do derzue aber meh im Training. Fazit: E Rundi wieter wie au andere NLA Vereine ou. Jetz wirds de Ärnscht.
Nöchscht Weekend wartet e Doppurundi uf üs. Und nid nume das, sondern es wartet z Derby gäge Kernenried. 2 (sehr) gueti Training si gforderet und de luege mr was mr us dene Mätche chöu usehole... 2 (sehr) gueti Spiel bruchts Samschtig und Sunntig für nid wieder unterzgo gäge oft zitiert "Angschtgägner"!

Solothurner Tagblatt

2008-10-28T08:29:00.001+01:00

Hie dr Bricht us em Solothurner Tagblatt (Das mou mit korrigiertem Name...):

Bettlach (H)

2008-10-26T21:26:00.009+01:00

Z Spiel 1 nachem Sieg gäge Oberiwl... Und das ersch no z Derby gäge Bettlach... Am Mittwuch hets chli es lockers Training gä (meh derzue no die Wuche ;-) ) und am Friti hei mr de dä Mätch afo vorbereite. Leider aber zwenig guet! Die erschte zwe/drei Ihsätz si zwar nid schlächt gsi gäge üse Nachbar, villech aber sogar z guet, denn sofort hei mr e Gang zrug gschautet. Dass das nid wird länge hei mr spötischtens mit em 1:1 nachem erschte Drittu gmerkt. 2 Powerplaygoal hei zu däm Resultat gfüehrt.
Nach dr Pouse hed sich de z Team ufs spile und ufs sekle konzentriert. Die einti und anderi Strof isch de für Bettlach no erschwärend derzue cho. Mir hei i dene 20 Minute eigentlich üsi technischi Überlägeheit chönne ufs Fäud bringe. Kämperisch isch üs aber Bettlach sicher über wieti Phase vo däm Spiu überläge gsi. Und si hei mit ihrem Schlussma doch e grosse Trumph im Ärmu gha. Eis ums ander Mou si mr a ihm gschietteret. Ufs Mou hei de aber d Goal ahghänkt und mir hei das Drittu mit 6:0 chönne für üs entscheide. Mit 7:1 i die zwöiti Pouse, das muess doch länge! Und das hets ou. Z Spiu het de so ufghört wies ahgfange het. Mi het enang chli lo mache im Mittufäud und het houptsächli gmuuret hinge. 1:1 usgliche hei de ou die 20 Minute gändet. 8:2 isch z Schlussresultat. Einisch troffer hei dr Ste, Lars, Marti, Züri. Und je 2 Mou dr Geru und dr Schäume. Die letschte 10 Minute het de dr Dave no chönne pousiere und mit em Zäuer isch e jungi Nachwuchshoffnig zum Handkuss cho ;-) Oder chli anders gschribe: Die letschte 10 Minute het dr Dave em Zäuer Platz gmacht und ihm dermit si erscht NLA Ihsatz i üsem Dress ermöglicht. Ca. 200 Lüt hei dä Mätch gse. Und es isch doch sehr schön gsi wieder mou vor sore Kulisse dörfe z spile. Merci viu mou für die Unterstützig!! Es geit jetz wieter mit Cup nöchscht Sunntig z Sion. Und i chas vorwäg nä. Nachdäm mrs die letschte Johr doch sehr sehr locker ahgange si im Cup het me sich das Johr anderi Ziel gsetzt. I bi gspannt ob me das ou ufem Spiufäud gseht. Nöchscht Sunntig um die Zyt wüsse mr meh.
Es folgt de z Doppuweekend gäge Kernenried i 14 Tag. Bis denn hei mr aber no z einte u andere Training wo mr das nöchschte Derby chöi vorbereite. Juhui :-)

Off Topic ;-)

2008-10-22T14:17:00.003+02:00

Apropos gueti Teamleischtig....
Es git jo no z einte und andere wo mr näbe Training und Mätchle süsch no mache. Und das (oder nume das?) sogar sehr erfolgriech:

Solothurner Tagblatt 21.10.08

2008-10-21T07:22:00.003+02:00

Hie dr Bricht usem Solothurner Tagblatt (Dä Huegli dä sig no starch!) ;-):

Oberwil H

2008-10-20T10:20:00.005+02:00

Hunger uf meh! Dasch d Ihstellig gsi uf dä Mätch. Am Samschtig si mr 11 Spiler und ei Goali gsi. Am Sunntig isch mit em Fäbu dr fählend Verteigier zrug cho, dr Lärsu het dr Mono ersetzt, mit em Cedu isch e Rächtsschütz iz Powerplay cho, mit em Stev isch d Unterzahl umgsteut worde und mit em Römu u Trisu si no zwe wieter Spiler derbi gsi. Mir hei auso fasch ussem voue chönne schöpfe. I muess ou zuegä dasi extrem froh bi gsi dr Mono wieder näbe mir z ha. Es wird eim ersch bewusst we me mou allei (sorry Schläppi, du darfsch natürlich ou nid fähle...) ar Bande steit das irgendöpis fählt. Z Coaching wird sicher objektiver mit 4 Ouge betrachtet. Ok, tuet mr leid für die dummi Strof im letschte Drittu, wär nid nötig gsi. Mir si dört leider chli z fescht im Flow gsi!
Aber jetz zum Spiu: Wie gseit, dr Cedu het nume Überzahl gspiut... und die isch ou sehr schnäu cho und wär het z Goal gschosse? Genau, dr 45er. Wie scho am Samschtig bim Mono sim Goal hani gmeint so Sache gäbs nume im Märli ;-) Leider het ou Oberwil die erschti Strof chönne usnütze und het scho bau z 1:1 gschosse. Mit em ne Bully Goal het de aber dr Schäume z erschte vo sine 4 Goal erzielt. Mit dene 2 vom Samschtig luegt är doch ufenes persönlichs, sehr guets Weekend zrug. 6 Goal i zwöi Spiel heisst öpe 40 mou pöpperle. Und do si die zahlrieche Fäuschüss nonid ihgrächnet (sorry Schäume, het wieder mou müesse si...) 2:2 nachem erschte Drittu. Aber richtig iz Spiel cho si mr ersch im zwöite. I muess aber säge dass Oberwil nüm sones höchs Tempo het chönne vorlege wie am Samschtig. Für mi unerklärlich wie sone starchi Mannschaft so unterschidlich cha spile innerhalb zwe Tag. Do müesse sich aber glücklicherwies anderi Gedanke mache aus ig. Oder villech ou nid. I meine für Oberwil isch das ei Niederlag gsi nach sehr viele Siege und ere idrückliche Machtbehouptig im Schwiezer Streethockey. I dänke do chame gelasse ufene Usrütscher reagiere. Bi üs isch das scho chli anders, dasch eher z Gägeteil dr Fall: 4 Johr ca. 14 Spiu wo mr nüm hei gwunne gäge Zuger, und ufs Mou packe mrs! Juhuiiii! Aber zrug zum Spiu: Im zwöite Drittu het de das klappet wo am Samschtig no isch e negative Punkt gsi: Mir hei Goal gschosse ir Überzahl und hei ir Unterzahl die einti u anderi Strof überstande. Mir hei Bully gwunne und si us Zwöikämpf aus Sieger use. Ufs mou ischs 7:2 gstande für üs.Dr Lars het zwöi mou troffe (jo, d Kurvene gö ou gäge Oberwil), und dr Schäume 3 mou i däm Drittu. 7:2? Kenne mr das? Wär nid het Angscht gha i dere Situation dä müesst äuä lüege. Mir hei "bibberet" bis i die letschti Sekunde. Zumal mit em 7:3 und de em 7:4 (Shorthander!) vor dr Pouse no dr Ahschluss isch cho.
Dr Steve het de aber nach dr Pouse z erlösende 8te Goal gschosse für üs.
Leider het är i däm Mätch e sehr höche Pries mit sim Ihsatz zahlt. Mit emne mehrfache Nasebruch und emne verletzte Oug isch är im Spital glandet und het d Nacht dört müesse verbringe. Guete Besserig vo üsere Siete!!
I gloube es het no dr eint u ander paar blaui Fläcke meh aus nach andere Spiu. Es isch i Schüss grütscht worde wie säute! Super Ihsatz, super Teamleischtig. Oberwil isch de no bis zum 8:6 ane cho, aber meh isch dür blödi Strofe de ou nüm drin gläge.
Mi söu d Fescht fiere wi si faue. Die meischte si aber nach däm Weekend äuä z müed gsi. Es isch sehr sehr intensiv gsi, aber mit däm Sieg isch üs öpis ganz Grosses glunge. Härliche Dank a mis Team und es Merci uf Oberwil. Si sehr interessanti 120 Minute gsi.
Bis em 20:00 am Mittwuch dörfe mr no dervo läbe, nähr isch d Konzentration bim Derby vo nöchscht Weekend. Mit Bettlach wartet e sehr unagnähme Gägner wo mr scho sit eh und je gäng hei Müeh gha. D Tatsach dass si sich uf die Saison gezielt verstärkt hei macht die Ahglägeheit no chli schwiriger! Mir fröie üs aber uf üse Nachbar und hoffe dä Schwung chönne mitznäh!

Oberwil A

2008-10-20T09:43:00.006+02:00

Doppuweekend gäge Oberwil... Woni das ufem Spiuplan ha gseh het sich d Begeisterig doch eher i Gränze ghaute. Chame jo aber nid ändere und so hei mrs haut probiert. Z Ziel isch klar gsi: 2 Punkt us däm Weekend! Leider het sich das spätischtens am Fritig Obe aus doch sehr schwär z realisiere usegsteut. Dr Römu u dr Trisu hei mit em 2 chönne go spile. Dr Cedu, dr Züri, dr Lars, dr Flips, dr Marti hei sich verletzt. Dr Fäbu isch nid ume gsi, e zwöite Goali hei mr ou nid gha. Us Verlägeheitslösig het de dr Mono sini Sache wieder mou ahgleit. Verlehrt het är nid viu, und är isch de ou dr erscht Torschütz gsi uf üsere Siete. Z 1:1 i eim vo wenige Konter het är sehr rutiniert chönne ihschiebe. Es isch krass gsi das erschte Drittu. Oberwil het es Tämpo häre gleit woni sehr säute gseh ha im Streethockey. "Hockey usere ander Liga" isch mi Kommentar gsi nach em Mätch. Aber i/mir si stolz gsi hei mr bi dere Schnälligkeit und technische Überlägeheit chönne mithaute. Ok, mir hei üs voll und ganz uf d Defensive konzentriert und hei üses Glück i wenige Konter oder im Powerplay gsuecht. Das Powerplay isch aber für einisch dr Schwachpunkt gsi i üsem Spiu. Derzue chunnt e schlächti Unterzahl und sehr präzisi Wytschüss us Oberwiler Reihe. Z Resultat drus isch de e 4:2 Rückstand gsi nachem erschte Drittu. Mir hei Bully verlore und hei leider sehr weni Zwöikämpf gwunne. Si aber immer no im Spiu blibe. Änds zwöits Drittu isch 6:3 gstande und mir hei im Dritte chönne i Überzahl afoh. "Sofort z 6:4 schiesse und de isch z Spiel wieder lanciert" isch d Überlegig gsi ir Pouse und dä Plan het de ou funktioniert, dr Ludo het ämu z 6:4 erzielt. Doch leider hei de d Oberwiler reagiert und hei no e Zagge schnäuer afo spile. 7:4, 8:4, 9:4, 10:4.... mir hei wie i no jedem Spiu e Durchhänger gha und si gnadelos bestroft worde. Glücklicherwies hei mr üs aber wieder ufgfange und hei üs de doch wieder chli uf üses Spiu chönne konzentriere. Sogar z Powerplay het de no afoh funktioniere (bruchts Druck für das? ;-) ) Dr Schäume het üs mit 2 Wytschüss zum 10:6 wieder häre brocht. Me isch aber leider nid drin gläge. Leider? Jo scho, aber i dr (unüblicherwies grad nach Spiuschluss abghautene) Teambesprächig isch me sich schnäu einig gsi. Oberwil isch z schlo das Weekend: "Wenn nicht jetzt wann dann?". Mit dere Ihstellig und ere sehr guete Regeneration wirds möglich si am Sunntig! Z knitschtere im Team isch bim Znacht im Pflueg z gspüre gsi und mir hei nach däm Nomi hunger uf meh bercho ;-)

Solothurner Tagblatt

2008-10-14T10:08:00.001+02:00

Hie dr Bricht us dr wäutbeschte Zytig:

Seetal (A)

2008-10-12T22:14:00.013+02:00

Mir hei no nie gäge Seetal verlore, und gliech muessi zugä dasi gäng chli närvös bi vor dene Spiel. Das Mou aber unnötig. 14:4 hei mr z Lenzburg gwunne. Das Spiu het irgendwie vo Einzuleistige gläbt. Und dä sunntig hei mr sicher die bessere Spiler i üsne Reihe gha. Obwohl doch mit em Märe em Cedu und em Züri grad drei Stürmer gfäut hei. Aber ou d Goal vo Seetal si sehenwärt gsi. "Ufemne Jasstepich lo usnä" isch em Nicku si Kommentar gsi nachdäm 1:0 gäge üs. Es isch aber e Weckruef gsi fürs ganze Team und mir hei de doch z Schicksal i üsi Händ gno. Dr Lars allei het sich de vier füf Mou für die Aktion am Nicku revanchiert und isch Phasewies chum vom Bäueli z trenne gsi. 5 Goal gschosse, bi 9 vo üs ufem Platz isch sini persönlichi Bilanz.
Aber jetz nomou schnäu vo Ahfang a. D Lag vom Platz z Lenzburg isch dr Hammer. Z schönschte wos git ir Schwiiz und mir chöme jedes Mou iz schwärme we mr wieder dört häre dörfe. U mir hei üs viu vorgno für dä Mätch. Z Belperspiel, wo doch nid für aui 100% guet gloffe isch hei mr no nid vergässe. Do isch no öpis gsi wo dr eint oder ander het wöue korrigiere. Und dämentsprächend motiviert si d Spiler bir Sach gsi. Ok, z Ihschiesse isch chli es Glauer gsi, aber em 2 si mr parat gsi! 6:2 nachem erschte Drittu vore. Dass das aber no ke Garantie isch füre Sieg hei mr jo gäge Sierre erläbt. Gueti Uslösige, gueti Loufarbeit vore, aber doch z einte u andere Blackout gäge hinge isch churz zämegfasst üses Spiu gsi. U das nid nume im erschtte Drittu. Zum Glück si mr nid no meh gstroft worde für das. Eher z Gägeteil isch dr Fall gis. Immer zu de richtige Zytpünkt hei mr wieder chönne score und hei so eigentlich nie müesse Angscht ha e Punkt abzgä.
Wie scho erwähnt het dr Lars 5 gschosse.

Dr Ba 3, dr Geru 2,

dr Kris 2,

dr Marti 1

u dr Ludo ou 1.

Was nimmt me us so Spiu use? Schwirig zum säge! D Fröid villech? Z 60 Minute chönne z Tämpo z mache? Oder doch eher die schlächti Defensive? Mir hei 2 Training und de chunt dr Meischter! Am Samschtig geits uf Oberwil und am Sunntig chöme si zu üs. Das wird de e andere Gradmässer si aus das Weekend. I muess aber ou ehrlich zuegä dass 5 Pünkt us de erschte 3 Spiu scho mou nid schlächt si. Mir wärde aber sicher aus Ussesieter i Kanton Zug fahre und mir wei mou luege ob mr dr übermächtig Gägner chli chöi ärgere. I go dervo us das mr dasmou chöi komplet ahträte und dasch doch scho mou es guets Zeiche.

Solothurner Tagblatt

2008-10-07T07:59:00.001+02:00

Hie dr Bricht usem Solothurner Tagblatt:

Belp (A)

2008-10-05T21:42:00.009+02:00

Mir hei üs mit de Ussage nach em letschte Spiu zimli viu Druck gmacht. Und däm hei mr im Spiel gäge Belp wöue stand haute. Nid es liechts Unterfange im Derby... Aber nach 60 Minute si mr aus (i gloube) verdiente Sieger vom Platz. 6:3 gwunne! Mir hätte üs aber nid dörfe beklage wes anders ume wär cho. Es hei die wenigschte Spiler a ihri Leistig vom Sierrespiu chönne ahchnüpfe. Aber eine vo de Wichtigsche het sich no chönne steigere. Dr Dave het wieder mou z Spiel seines Lebens zeigt! Ihm gägenüber dr Reist im Belper Goal wo genau so guet gspiut het. Jo, es isch so chli dr Mätch vo de Goaline gsi. Es hätte beidi Mannschaft allei i Überzahlsituatione dopplet so viu Goal chönne schiesse. Aber was die beide Schlussmänner ufe Platz zouberet hei isch Klasse gsi!
Ohwohl d Chanceuswärtige i de Specialgames schlächt si gsi isch das Spiu i dene Situatione entschide worde. 4 Überzahlgoal vo üs (ok, bi eim isch d Strof grad abgloffe), 2 vo Belp, und no ei Shorthander (!) vo Belp derzue. Nume 2 Goal auso bi 4:4... Und die si beide vo üsere dritte Linie erzielt worde.Dr Märe im erschte u de het sich dr Kris si Fruscht vor Nidnomination im letzte Spiu chönne vom Lieb schiesse mit sim Goal im letschte Drittu. I dänke es isch nid z letschte Mou gsi wo die zwe hei zäme gspiut. Zumal mr ou uf dr Bank hei fröid gha ab gwüsse Dialoge zwüsche Märe u Vogu.
Dr Ludo und dr Cedu hei leider nid chönne spile. Guet isch aber das mr mit keim Usfall i däm Spiu 3 mou besser do stö aus no gäge Sierre ;-) Näbscht em Märe und em Kris hei d "Überzahlspiler" 4 Goal gschosse: dr Geru (2), dr Steve, dr Schäume. D Drittusresultat us üsere Sicht: 2:0 nachem Erschte, 4:2 nachem Zwöite und äbe 6:3 nachem Dritte. Mir hei üs übrigens (erfolgriech) vorgno dr Schiri nid z kommentiere während em Spiu. Jetz bini nid sicher obis nachem Mätch darf ;-) Nei, nume churz: Es isch sehr chlinlich pfiffe worde, aber i dänke uf beidne Siete gliech, so hei si doch e guete Linie drinne gha. I muess zwar ehrlich zuegäg dasi drü vier mou nid ha gwüsst ob jetz eine vo üsne oder e Belper use muess... Aber das nume so am Rande.
Chunt derzue das z Spiu gloub ou nid so hochstehend isch gsi. I dänke es si beidi Teams nid ganz zfride mit em Ihsatz. Do wärde mr dran schaffe und die nötige Ahpassige ahluege. 2 Training bliebe Zyt und de steit d Reis uf Lenzburg a. Leider fäut dr eint und ander i däm Mätch, aber das git de junge Spiler ou d Chance sich ufzdränge. Eine hets hüt gschafft, und die andere wärdes ihm wöue gliech tue. I fröie mi druf :-)

Solothurner Tagblatt

2008-09-30T11:32:00.002+02:00

Hie dr Bricht usem Solothurner Tagblatt:

U de nachträglich no d Saisonvorschou:

Sierre (H)

2008-09-29T16:11:00.004+02:00

Es hei mi jetz doch zimli viu ahgsproche ob die saison nüm bloget wird… Mou, i wet eigentlich scho, i dänke es wär no guet für die wo sich fürs Team interessiere. Jo und für die andere wos süsch eifach läse, dene wete mr natürlich d Möglichkeit ou gä sich chli z amüsiere ab „alltägliche“ Trainersörgeli.

Irgendeinisch chunt de no e Bricht vom Summertraining. Limpach, Gränche, Magglinge… Mir hei viu erläbt und es het doch z einte oder andere Föteli gä wo me dörft veröffentliche. Aber jetz zum Spiu… oder doch no nid ganz. I weiss zwar nid ob me darf drüber schriebe oder nid. Mou, i dänke mi darf, wiu i muess schlussändlich de gliech am Mittwoch vor mis Team stoh und ihne säge das mr säuber z blöd si das mr dä Vorsprung nid es Drittu chöi verwaute. D Frog wieso das so isch gsi steut sich jede. Und i müesst lüege weni nid würd säge das die Herre Schiedsrichter ihre wäsentlich Teil derzue bietreit hei.
Aber jetz doch zersch zum Spiu:
Em Friti Obe ischs los gnage mit em ne sehr guete Training. Mi het gspürt was d Spiler wie, mi het gspürt das aui froh si wes ändlich los geit. Und so ischs de ou los gange am Sunnti. 1:0 düre Schäume im erscht Ihsatz. 4:0 nachem erschte Drittu! Was wotsch no meh gäge Vizemeischter! Z 5:0 nach dr Pouse isch em Züri sis dritte Goal gsi und mi hät chönne meine es sig d Entscheidig. Schlussändlich hei mr ou das Drittu gwunne mit 3:2. So hät me eigentlich nume dr letscht Abschnitt no über d Bühni müesse bringe. Leider tönt das eifacher aus es isch gsi. Mit em Cedu, Märe und Steve si scho drei Spiler verletzt usgfaue und mit de sehr schlächt pfieffende Schiedsrichter hei mr no 2 Gägespiler meh bercho. Eidütig zviu Lascht für dä Tag erfolgriech abzschliesse! 8:8 ischs Schlussresultat gsi.
Eigentlich müesste mr jo zfride si. Gäge Sierre ei Punkt gholt, 2 super Drittu gspiut. Und die letschte 2 Minute im Spiu hei mr no e Unterzahl schadlos überstande. Das isch das wo mr us däm Spiu wärde usenäh. Aber dr Fruscht isch würklich riessig. D Art u wies isch widerlich gsi.
Vor 3 Wuche hei mr es Mail bercho vom Schiriobmann. D Prüefige loufi schlächt, mi sig nid vorbereitet usw. Und dr gliech wo das Mail verfasst het, verpfiefft em Sunntig das Spiu. Isch scho no schreg. I weiss nid ob öper Detail brucht. Aui (u si doch paar a däm Mätch gsi) chöi das bezüge. I meine Gränche - Sierre. Mi kennt enand unter Trainer, Spieler, Zueschouer. Vo Kürs, vor Nati, vom Usgang… Mi respektiert enand, cha nach em Mätch eis zäme trinke, z Spiu analisiere. Geschtr hets derbi aber nume eis Thema gä: Und es isch keim vo Sierre rächt gsi was do gloffe isch. Das seit doch gloub aues über die Leischtig vo Schiedsrichter. Aber schlussändlich wärde mir wieder e Rapport bercho wie schlächt mir üs verhautet heige… Logisch, mr si jo am chürzer Hebu. Komischerwie spiusch aus Spieler/Trainer nume e Näberolle i dere Sach... Aber i weiss nid wo das häre füehrt. Z Ufträte vom Schiriobman isch a Arroganz chum z überbiete. Vor erschte Sekunde a dr König ufem Bitz, so muess es si i sine Ouge. So loufts aber nid, sorry. Mir wäre wöhler mit emne pfieffende Spiler wo kes Schriebzüg derbi het gha ar Prüefig und ihgschlofe isch derbi und de 42 Fähler gmacht het… Warum? Wiu me schlächter nid cha Ufträte! Damit i nid nume Kritik usüebe weti ou öpis konstruktivs schriebe:
KOMMUNIKATION isch öpis vom Wichtigschte wos git!!! Rede mit Trainer, rede mit Spiler!! Do derfür gits Kürs und Literatur: Kommunikation, Konfliktmanagement usw. Villech wär das no wichtig für ne SSHR Schiri. Das würd i autägliche Situatione häufe. Aber weme z Schwärgwicht immer no uf so brätschhole Prüefigsfroge het wo nie ihträffe, de chame jo nid zviu erwarte. D Kommunikation het sich uf Verwarnige und Strafe beschränkt. Mir si z tief unge für sis Niveau. Ou we me uf regutechnischi Fähler wot ufmerksam mache wird eim mit Bankstrofe droht. (ou weni mr hie keni Fründe schaffe: Es isch mr paar mou so vorcho wie die drei...)

2 Bispiu no: Z erschte Mou vor Spilerbank Icing inegmöget (ok, ghört sich nid...)Verwarnt worde! Zimlich hässig isch är zur Bank cho und het üs ahgmöget är wöug kes Wort me ghöre, si öpe 2 Minute gspiut gsi... Uf dr Gägesiete schreit eine 2 Mou im ne Zwöikampf „aua“ und beidi Mou muess üse Spiler use! Hallo!? Wie funktioniert das? Anders Bispiu: Spile ohni Händsche: 2 Minute gäge üs. Szene fertig spile gits nid! Nachemne Stockschlag 20 Sekunde mit emne brochne Stock wiiter spile uf dr Sierrer Siete? Ke Strof! Uf d Frog vom Captain wird ou är hässig zurächtgwise, är söu ändlich Stiu si… Mi cha säge es isch Fruscht woni do ablo. Schlussändlich aber hei mr im letschte Drittu 3 Goal i Unterzahl bercho und hei ei Punkt verlore. Di Strofe si lächerlich gsi. Jo, es würd sogar es Video vo däm Mätch gä...
Dr dritt Schiri het de no gfunde mir söue üses Verhaute hingerfroge und nid d Schirileischtig. Säubschtreflexion isch aus Trainer z allerwichtigschte und öpis alltäglichs für mi. Aber i fänds doch schön we dr eint oder ander Schiedsrichter das ou mou würd mache. Wiu wie gseit: We beidi Mannschafte sich einig si das dr Schiri z Spiu verpfiffe het, de chönt doch chli Wahrheit derhinter si oder?
Dr Ufwand wo mr tribe isch effektiv z gross für so Sache. We 2-3 Training machsch ir Wuche und für di Sport läbsch, de erwartisch das ou vo dine Spiler. Und i gloube es isch nid zviu verlangt weme das ou vo Schiedsrichter darf erwarte. Wie heissts aube so schön: Sit Vorbilder. Aus Trainer vorem Team, aus Spiler vor Fans und Juniore… Ufem Fäud, im Usgang, immer wieder. Schön we das SSHR Schirine ou würde läbe. Geschtr ischs ne nid glunge, leider! Und leider hei mr üs dervo lo ahstecke. Dasch üse Fähler

So, fertig Fruscht. Hi muessi no schnäu erwähne dass das mi subjektivi Meinig isch. Das repräsentiert weder d Meinig vo de Spiler, no d Meinig vom Verein. Guet, dr Rapport wird jo eh aus Rundumschlag a Verein oder Vereine go…

D Saison geit witer. Dr Fahrplan stimmt und mir fröie üs ufs zwöite Spiu. Sehr viu cha me us em letschte Match use näh. Mir wärde dä sicher ou bau mou uf Video gniesse. Am Sunntig geits de uf Belp. Im Fründschaftsspiu ischs e klari Sach gsi für üs. Aber das zeut nüme. D Bärner hei ihri Lehre drus zoge und wärde ganz anders ufträte nöchscht Weekend. Das hei si mit ihrem erschte Sieg ihdrücklich zeigt.

Wieder z Gränche

2008-08-26T10:39:00.004+02:00

D Summerferie si verbi! Zyt auso sich wieder dr zwöitliebschte Beschäftigung z witme: Em Hockey. Letscht Wuche si d Stocktraining losgang. Ändlich, dänke di meischte Spieler! Leider isch mit däm Startschuss ou wieder z schlächte Wätter zrug cho. Am Friti hets auso us Chüble gosse und dr Dave het sich leider nid chönne düre setze ;-) . So isch haut trainiert worde! D Schwärpünkt lige im Momänt bim bäuele und intermittierender Usduur. Es wächslet aber jetz de i taktischi Bereiche.
Schad het sich d Armee immer no nid chönne düre ringe aune Spiler Urloub z gewähre süsch wäre mr fasch komplet. Aber hie gspürt me trotz Swissolympic haut immer no ihdrücklich das mr e Randsport si...
Übernöchscht Weekend isch Trainingslager ir Region Biel/Magglinge/Gränche. Dört hei mr de Zyt üs chli meh mit üsem Spiel und de Ziel z befasse!

Summertraining

2008-07-23T10:17:00.011+02:00

So, es isch los gange! Näbscht au de "Chäfer"feschtli im Täli wird ou no chli gschwitzt. Z Summertraining isch sit emne Monet vou im Gang. D Grunlage für ne erfolgriechi Saison wird i de Monet Juli/Ouguscht erarbeitet, das weiss mitlerwiele jede. Obs jede ou umsetzt sei mou dahingestellt. I ha se uf au Fäu sehr gärn. Die Training wos no häu isch am obe, wo me so richtig cha d "sou" uselo und eifach druf los schwitzt. Es isch warm, es isch gmüetlich und mi cha mit guete Kollege no chli dus höckle und philosophiere. Dr schönscht Näbeeffekt vo üsem Sport... Oder für Teil äuä sogar z Wichtigschte im Sport! Wie jedes Johr isch nid eifach nume Kilometer abspuele ufem Programm sondern es git es paar Houttheme. Houpsächlich handlet sichs do um die konditionelle Komponänte (Kraft, Usduur, Schnäuigkeit) und derzu no Koordination. Dases eifachi Übige git wo alles beinhalte gseht me do ;-)

Dasch dr Versuch gsi im "Tosiostil" über d Hürde z go... Aber es geit ou seriös zur Sach, ämu we mr nid grad Bluetgrätschene üebe oder üs im Volleyball probiere. Hie paar Impresione: Ok, Stilnote vergäbe mr ou hie keni, aber es git scho dr eint oder ander Koordinationsmeischter I gibe zue, es si primitivi Trainingsgrät, aber si si effiziänt und Gäut chöi mr dermit ou spare Es Novum isch z Schnäuigkeitstraining: U no paar "bewegti" Bilder vom mine Lieblings"trainingsgrät" nid das öper z Gfüehl het mir stöngi nume ume:

So wiiter geits bis i Ouguscht und de chunt dr lang ersehnt Momänt wo jede si früsch isoliert Stock, sini nöi gnäite Hände, sis früsch gwäschne Trainingsdress und sini (gäng no) schlächt duftende Schoner cha füre näh! Ok, isch nid bi aune so, d Erfahrig het zeigt das dr eint oder ander sini Täsche gäng no packt het vom letschte Playoffmätch, und Grücht gö ume die Täschene loufe fasch vo säuber uf Gränche ;-) Ab em 13. Ouguscht si mr wieder im Eichholz und hei dr erscht Meilestei düre!

Off Topic: Merci CC!

2008-07-05T21:55:00.013+02:00

Es isch sit längerem bekannt. Vo hüt a, em 5. Juli 08 beginnt e nöii Ära Streethockey. Oder andersch gseit, es geit eini z Änd. Wort derfür z finde isch fasch nid möglich. Und gliech weti Dir, Christopf, es riese Merci widme für au das wo mir hei i de letschte 18 (!) Johr dank Dir dörfe erläbe. I ha Juniore im Team wo no nid so aut si wie dä Verband. Es komisch Gfüehl.
Es het 1990/91 ahgfange woni Di die erschte Mou ha z Biel uf und näbe Streethockeyplätz gseh. I ma mi ehrlich gseit erinnere aus wärs geschtr gsi. So hei mr damals gspiut. Keni Bande, (fasch) ke Usrüschtig, keni Markierige am Bode, im ideale Fall einheitlichi Dress, Tennisball...
Du hesch schnäu mou z Rueder überno im damalig Verband. Aus TK Chef mit ere Vision im Chopf. E Vision wo nid au Lüt hei verstande. Mou, verstande äuä scho, aber vielmal isch me sich z bequem gsi e Ufwand z betriebe wo üs würd wieter bringe. Dr gross Teil het aber vo Ahfang a volls Vertroue i di gha und het probiert umzsetze was Du Dir vorsteusch! I ma mi a gross Umbruch i de 90er Johr erinnere. I bi damals säuber im Vorstand vom Verband gsi und Du bisch gäng die triebendi Chraft gsi. Em Resu sini Ussag bliebt mr immer no im Chopf vo damals: "Soviu Ouge wie mir zue drücke (inklusiv Hüehnerouge) hei mr gar nid". Aber das nume am Rande bemerkt ;-) Du hesch gwüsst wenn und für was mr Kompromisse müesse ihgo. Es isch e schöni Zyt gsi damals, ohni Natel ohni Internet... Di "grossi" GV im Allmändstadion: Fusion zwüsche zwe Verbänd, umstellig ufe Fieselball, höchi Bande... Aus isch uf Wiederstand gstosse. Aber aus hesch düre brocht. Zum Glück! Merci für die Wiitsicht wo üs zum Teil gfäut het damals! Z Resultat us Dire jahrelanger Arbeit dörfe mr hüt gniesse. I gloube zwar das Arbeit bi Dir nid dr richtig Usdruck isch. Passion - Liedeschaft triffts äuä besser. Du hesch nid nume ungloublich viu (ehreamtlichi) Zyt investiert i üse Sport, nei, Du hesch ou viu Gäut investiert. I ha mi mängisch gfrogt warum Du das machsch. D Antwort druf chani mr nid anders erkläre aus: Passion! Du läbsch für dä Sport! So wies mir Trainer vo üsne Spiler wünschti ;-) hesch Du nume ei Gedanke: Was isch z Beschte für üse Sport! Nid was isch z Beschte für Di, sonder äbe: Was bringt Streethockey wiiter? Die Ihstellig isch beniedenswärt! Und genau do chame mit Wort äuä nid gnue Merci säge! Bim stöbere nach Foto bini uf z einte u andere gstosse us alte Zyte. Hie grad mis Lieblingsbild: Natürlich hei mir Di i dene Situatione am liebschte gse we mr e Pokal hei dörfe entgäge nä ;-) Und i dim Lache isch sicher ou z Wüsse, dass jede Pokal wo vor SSHA ane Verein geit ou e Verdienscht isch vo Dir und Dire Liedeschaft!
Jo, Du hesch aber ou anders gmacht. We Lüt gfäut hei de bisch überall ihgsprunge: I weiss nid ob das allne Bewusst isch. Aber mir wäre hüt nid e J+S Sport, und scho gar nid dr Swissolympic Association ahgschlosse we nid so viu gopferet hättsch füre Verband! Es geit schnäu mou vergässe was aus isch derfür gmacht worde über all die Jahr! Du hesch aber für die Troum kämpft und hesch au die Ziel erreicht! Für üs!!
Es isch nid übertribe weni säge dr "Mr. Streethockey" het hüt si Rücktritt gä. Aber so wie me Di kennt und d Spatze scho vo de Dächer pfieffe geisch üs zum Glück nid ganz verlore.
Üs (em J+S Team) jo so oder so nid! Und hie darfi jetz sicher im Name vom Rämsi und em Rony ou schrieb. Aus Fachleiter bliebsch du üse "Chef". Do si mr natürlich sehr froh. Die Chance wo Du üs gä hesch isch unbezahlbar. Z Vertroue i üs, dass mir dini Philosophie wiiter zieh, macht üs extrem stolz. Merci viu Mou!!
Usem J+S Leiterkurs z Tenero stammt ou das Bild: Wär meint das sig grad chli übertribe, däm sig no gseit: Dasch nume eini vo drei oder vier Bigine Büecher wo dr Chrigu het mit gschleppt iz Tessin ;-) i fröie mi uf die nöchschte Kürs und ufene gueti Unterhaltig nach de Lektione. Sigs z Tenero oder z Magglinge. Und apropos Magglinge: Hie no mis persönliche Merci: I ha Di vor knapp 3 Johr ängschtlich gfrogt ob mi aus Sportfachbetröier dür d Trainerusbildig vor Swissolympic würdsch begleite... Ohni lang z überlege hesch zuegseit und mir dermit e wunderbare Troum erfüllt! Du chasch Dir hüt no nid vorsteue was mir die Usbildig und die Erfahrige woni dört ha dörfe mache bedüte.
!!!!!MERCI CHRISTOPH FÜR AUES!!!!!

Junioremeischter

2008-05-19T16:27:00.008+02:00

SI HEIS GSCHAFT! Juhui!! Nachem zwöite Mätch z Sierre hei si zwar no chli skeptisch dri gluegt... ...aber si heis am Samschtig z Gränche packt! Dr Meischtercoach mit zwöi vo sine drei Häufer. Dr Steve, Pädu, Zäuer, (und ohni Bild) dr Küre. Si hei nach däm Weekend e Grund meh zum lache. Schwiezermeischter ir höchschte Junioreklass! Härzlichi Gratulation vom ganze Eis für die Leischtig die Saison. Bis i Final het me nid gwüsst wo me würklich steit. Z einzige wo gsi isch, isch e riese Druck. Und es isch am ne dünne Fade ghange i däm dritte und entscheidende Spiel. Bis 15 Minute vor Schluss hets usgseh aus chäm dr Meischter usem Wallis, aber de isch d YB ... ups sorrry, si heis am Samschtig i "Täli Viertustund" umbenennt, cho. 7:2 Schlussresultat! Was wot me me säge aus z gratuliere. Respäkt vor dene junge Manne und Ihrne Trainer! Öich söu nid nume d Gägewart, sondern ou d Zuekunft ghöre! Mir si stolz uf öich!

Rückblick

2008-05-01T21:43:00.011+02:00

Ahgfange het aus am 16. Mai 07. Auso no drü Tag bevor die eigentlichi Abschidsfier isch gsi vo letschter Saison. Mir hei üs bi öpe minus 15 Grad bim Ba deheim troffe (Merci nomou fürs organisiere!!) hei brättlet und hei dr eint oder ander Plan gschmidet wie das mr i d Saison 07/08 wei starte. Das Plakat isch z Ergäbniss us däm gmütlich obe gsi. Usklappbar si aui Commitments wo mr usgarbeitet hei und wo mit e Grund hei söue si dass es e erfolgriecheri Saison git aus die Vergangeni. Obs würklich so isch sei mou dahingestellt, aber i dänke es isch es grosses Teili wo passt het i üses Puzzle.
Wie gseit: 3 Tag spöter de d Abschlussfier aus Highlight vor letschte Saison: Paar Wuche Pouse und de aber Mitti Juni ischs losgange. Dr erscht Yoyo Tescht... Durchzoge... so söus ou si ;-) mi muess jo e Verbesserig gseh im Herbscht. D Ziel si definiert gsi: Level 19 erreiche und dr 10km unter 50 Minute. Mir hei Kilometer um Kilometer abspuelet. Diversi Lüt hei es freiwilligs Mäntitraining id Wäut grüeft für uf das Niveau z cho! Und schlussändlich heis de ou etlichi gschaft. Nid au, aber doch paar. Es isch e Willensfrog und nid e Frog vom Können. Mi het scho i dere Phase gseh wärs wot wüsse u wär mitlouft.
Chli lockerer ischs de bim Usflug i ne anderi Sportart gange: Mitti Ouguscht isch de ou z Ändi gsi vor Grundlageusduur. D Stöck füre näh und vollgas ab i taktischi Theme. Ussdur hets nume no i intermittierender Form gä (usser die individuelle Training natürlich). Scho bau si d Teschtspiu ahgstande. I bi nid würklich Fan vo dene Mätche. Si wärde viu z locker gno, u dämentsprächend chani ou nid würklich viu use nä. Schad für d Zyt und für d Training wo druf gö. Wie aber scho letscht Saison hei mr zwöi Spiu gmacht wiu mr taktisch e nöii Usrichtig hei wöue teschte.
Z Hochzyt vo üsem Präsi, dr Gwinn vor erschte Senioremeischterschaft und schlussändlich z erschte Meischterschaftsspiu si ou no ahgstande i däm Monet. A jo, nid z vergässe em Mono und mi "Teambildigsusflug". ;-) Momou, mir hei scho zimli viu über Hockey gred. Sit em Juni hets äuä eh ke Wuche gä wo mr nid mindischtens 2 Stund (näbe Training u Spiel) no über üse Lieblingssport und üsi Lieblingssörgeli philosophiert hei. D Natelrächnig lässt grüssen. U übrigens: Merci Mono, bisch dr bescht Co Trainer wo me sich cha wünsche... U i bi froh fingsch z Hotel de aube gliech no ;-) und ersch no mit Proviant. Hie no es chlises Souvenir vo däm Usflug: Aber zrug zum Hockey: 14:2 gwunne z erschte Spiu... 5 Spiu i Folg gwunne... das isch die ihdrücklichi Bilanz gsi bis i Novämber. Nei, mir si nid abghobe. Im Gägeteil. Wie oft hei mr üs hingerfrogt. Was isch anders aus letscht Johr? Was macht dr Unterschid? D Transfers? D steigerig vo de Junge? Die nöii Taktik? Goaline i Höchschtform? E viu eifachere Spielplan aus no die letschti Saison? Viu Sache si üs i Sinn cho. Leider hei mr de nach 3 Niederlage i Folg ganz anderi Problem gha. Immerhin hei mr üs aber wieder gfange! Zum Glück! 7 Mou nachenand ungschlage vom Platz. Das hets scho lang nüm gä. E wieteri ihdrücklichi Serie und gliech hei mr gäng no a auem grüblet. Mir hei gwüsst mir müesse üs no verbessere. Tenero het d Platform derzue bietet. Leider ischs viu z churz gsi. Gmeinsam mit em Bus uf Locarno... Obwohl dr Rämsi und i säuber nid dra gloubt hei, hei mr no öpis gfunde zum eis go z trinke. U de via FM (wär het so öpis scho mou gseh?)de wieder iz Centro zrug. Genial gsi! Es isch zwiefulos es Highlight gsi das Johr. Dr Hari het churzfrischtig müesse go schaffe und süsch si AUI derbi gsi. Dr HAMMER. Thanks!
U de si scho bau d Playoff ahgstande. Dr "Angschtgägner" Kernenried im 1/4 Final. Es Derby wo aues bote het. Mir hei üs "glücklich" aber verdient füre Haubfinal qualifiziert. Leider hei mr aber dört gäge Oberwil kei Chance gha. Churz zämegfasst: Spilerisch si mr zweni starch gsi und i de Chöpf nid bereit für nes Wunder z vollbringe.

...we mrs gfunde hei de hei mrs gschafft! Dä Satz begleitet dä Blog sit Ahfang a. Und? Hei mr gfunde? I dänke: Jo! Mir si letscht Johr ufem 9 Platz gsi und si das Johr ufem Dritt. Mir hei meh Goal gschosse und weniger bercho. Es git Stimme wo bhoupte mir heig dä Dritt nid verdient. Aber Tatsach isch: Mir hei z Bonstetten ei Punkt abgä aber all andere Mannschaft hinger üs hei mr 2 Mou gschlage die Saison! Und das isch nume dr statistisch Wärt. Aus Mannschaft hei mr üs ou wieter entwiklet. Es hei 4 Juniore ihri erschte Spiu und erschte Goal gschosse das Johr und d Mannschaft isch dadurch bedütend breiter worde. Mi cha gspannt si ob sich das nöchscht Johr uszahlt und ob dä 3. Platz cha bestätigt wärde. D Konkuränz wird jo ou nid schlächter. Ou süsch hei mr 10 interessanti Monet chönne zäme verbringe. Viu nöii Erfahrig sammle, gueti Kollege finge, zäme schwitze, zäme schaffe, zäme fiere und zäme Spass ha... Jo, es isch e tolli Zyt gsi woni aune härzlich derfür wet danke: This, Fäbu, Römu, Kris, Trisu, Lars, Steve, Schäume, Marti, Märe, Geru, Hari, Rämsi, Ludo, Pädu, Flips, Nicku, Ba, Ste, Reto, Joe, Dave. Aus Trainer und natürlich ou usem Vorstand hei mr dene Jungs wöue e Plattform biete wo si a sich chöi "arbeite" und ou do hei mr gloub erfüllt. Merci em Vorstand, Schläppi u em Mono.

Die nöchschte Wuche wärde zeige was für ne Mannschaft nöchscht Saison ufem (u näbem) Platz wird sto. Oder besser gseit z Summertraining wirds de äuä im Detail zeige. :-) Aber vorhär loufe no paar Diskusione damit ou aui Grücht us dr Wäut gschaffet si und me im Juni/Juli wieder cha afoh ufboue!
Mi gseht sich am 17. Mai z Unterramsern ar Abschlussfier. Es isch für au offe und mir hoffe doch das dr eint oder ander dr Wäg iz Täli findet...

Juniorenfinal 1 Sierre (H)

2008-04-30T10:30:00.006+02:00

Dä Blog hät jo eigentlich zum Ziel chli iz Eis ine z gseh für au wos interessiert. Aber mi cha jo zwüsche düre ou chli über d Gränze use luege. Und irgendwie ghörts jo ou chli zu üs, schliesslich trainiere mit em Yannick, Trisu, Fäbu, Römu, Kris und Lars 6 Juniore mit üs mit. Derzue chunnt das meh aus die haubi erschti Mannschaft am Spielfäudrand mitgfanet het. Und es isch dr Hammer gsi (auso nid die wo gfanet hei, nei ;-) ) i meine dr Mätch. E Liedeschaft i de Ouge vo de Jungs woni mängisch vermisst ha bi mine Spiler. Es isch es ungloublich souveräns ufträtte gsi. Mi het zwar sehr viu Ufwand gha, aber mi het jedi Sekunde gwüsst dass es die Spiler wei wüsse. Mit het kämpft, mi het gschwitzt, mi het "Dräcksarbeit" gmacht, isch az Limit gange. Bravo! E chli e fade biegschmack het d Entscheidig im letschte Drittu gha. E Schuss iz Ussenetz wo e einzige im Goal het gseh. Leider für Sierre (jo, i cha em Mutchi si Reaktion nachvollzieh) isch däjenig dr Schiedsrichter gsi und het das Goal gä. Ok, mi cha drüber diskutiere ob z Spiel nid scho vorhär entschide isch gsi. Item. Mir heiss gnosse einisch uf dr gägenüberligende Siete vor Bande chönne z stoh, hei gfachsimplet, hei kommentiert, hei ghornet und hei gjublet. Üsi Juniore hei üs ou aue Grund derzue gä. Ok, isch gloub dr eint oder ander dumm Kommentar derbi gsi, mir si haut de chli i "Flow" cho ;-) aber das si jo d Spiler ou. Juhui! 11:7 isch z Schlussresultat für em Steve/Zäuer sine Jungs! Somit steits 1:0 ir Serie (Best of 3) Nöchscht Samschtig geits uf Sierre. Ahpfiff isch 14:00. Usser Säubschtvertroue chame vo däm Sieg nüme mit näh und ufem Grossfäld im Wallis isch's eh e anderei Sportart. Mir si gspannt und fröie üs uf das Derby.

Oberwil (H) 1/2 Final 2

2008-04-28T11:10:00.005+02:00

Mir hei viu diskutiert die Wuche, z einte oder andere ahpasst, d Linie no einisch dürenand gmischt. Nüt gnützt wetti nid säge, mi het am Samschtig sicher e anderi Mannschaft gseh aus letsch Wuche no z Oberwil. Aber es isch e Vergliech zwüsche David und Goliath gsi. Mir hei üs üsne Stärkine wöue bewusst si und se wöue ihsetze. Doch leider chunnts nid immer so wie i dere Gschicht. Wi uf däm Bild si mr körperlich unterläge gsi. Kräftemässig (nid konditionell) u spilerisch hei mir de Individualstärkine vo de Oberwiler nid chönne z Wasser reiche. Aber mir heis probiert. Es het ou anderthaub Drittu so usgseh aus chönnt e Überraschig drin lige. Z erschte Mou wo mr gäge Zuger chli meh vom Spiu hei gha. Aber leider haut keni Goal gschosse hei und derzue no z einte oder z andere ärgerliche bercho hei. Wie gseit, bis zur Mitti vom Spiu isch nid schlächt gsi und d Spiler chöi sich nüt lo vorwärfe. Jede het kämpft, jede het aus gä: "Nachem Mätch i Spiegu luege und mit sich säuber z fride si" Das isch wieder mou z Motto gsi und i dänke die meischte vo de Jungs chöi das. Z letschte Drittu isch de wieder eis zum vergässe gsi. Mir heis "lo fahre" und es isch meh so chli es "dabein sein ist alles" gsi. Leider. 16:7 isch gloub z Ändresultat gsi. I ha irgendeinisch nüm mitgschribe. Schad für Zueschouer, aber i gloube mi chas ou chli verstoh, es isch e sehr intensivi Zyt gsi für mis junge Team. Alli vom nöchere Umfäud wüsse wie höch dr Druck isch gsi und wie das emotional a eim zerrt. Playoff haut! I bi nid dr Meinig dass das Resultat würklich öpis über z Chräfteverhäutnis usseit, aber mi cha das interpretiere wie me wot. Mir hei e fairi Serie gha und über d Schriris gits ou nid viu z säge: Mi merkt haut ou bi ihne aube wär Favorit isch... aber pssst!
Nachem Spiu si de unter de Spiler wieder "Mönsche" füre cho: Mi müesst äuä mou übernes Sponsoring vore Rasierklinge Firma rede, wiu es si sicher gäg 15 Klinge düre brucht worde. Dr Rückblick uf die ganzi Saison chunnt sicher ou no do im Blog, und d Juniore hei jo ou Mätch gha das Weekend: Härzliche Glückwunsch zum erschte Sieg!!

Oberwil (A) 1/2 Final

2008-04-20T15:03:00.006+02:00

Mi chas chehre wie me wot, aber mi muess niedlos anerkenne: Oberwil het sehr sehr starki Einzuspiler! U we me nes so eifach macht wie mir geschter de chunnts nid guet use aus Gägner... Die Erkenntnis isch nid nöi, aber leider sehr presänt und nume e Wuche bliebt Zyt für nes Mittel dergäge z finde.
Vo Ahfang a: Die letschti Wuche het in Eurphorie ufghört. Mir hei üs im allerletschte Momänt qualifiziert, dämentsprächend isch gfieret worde. D Unihockeyaner vo Wyler-Ersigen heis ou packt (Gratulation!) und das isch füre eint oder ander no e Grund meh gsi chli Gas z gä. Mi söu jo d Fescht fiere wie si faue...(Gäu M!?) ;-)
Aber zrug zu üs: Dr Wucheahfang isch de nid so tolle gsi. Wom Mäntig obe bis Donnstig hets über 3/4 vom Team mit Magedarmgrippe iz Näscht ghoue. Dür das und d Tatsach das mr nach wie vor keni Garderobe und somit ou keni WC chöi bruuche z Gränche i de Schuelferie (Merci...) hei mr nid chönne trainiere am Mittwuch. Das isch nid würklich die ideali Vorbereitig für gäge Schwiezermeischter z spile am Weekend. Z Frititraining isch de aber meh oder weniger normal mit kompleter (21 Nase!!) Mannschaft gsi. Mir hei viu gredet und üs sehr viu vorgno für das Haubfinal. Obwohl "d'Statistik" und alli Onlineforum gäg üs spräche, hei mr z Wunder wöue schaffe Das het me de leider am Samschtig Nomi nüm gseh. Mir hei scho im erchte Drittu ganz schlimmi "Patzer" drin gha. 4:1 isch no es schmiechelnds Resultat gsi derfür. Es isch es typischs Oberwilspiu gsi. Jedes Mou we me meint mi heig z schlimmschte überstande de gits no eis obe druf. Obwohl dr Dave no eine vo de bessere isch gsi i dene 20 Minute het är sis Goal müesse verlo. Mir hei es Zeiche wöue setze fürs zwöite Drittu und hei ghofft dr Joe wachs über sich use und bügli die zahlrieche Fähler wo mr vore mache us. Ou Liniemässig hets paar Änderige gä... Es het leider nid viu gnützt. 9:2 hinge nach 2 Drittu. Niemer me wo dra gloubt. Fasch niemer ämu... Z letschte Drittu no gwinne und no mou 20 Minute Hockey zeige isch z Motto gsi. Aui si zum Ihsatz cho. Gwunne hei mr das Drittu 4:2, aber mir müesse üs nüt ihbiude mit däm. D Gägewehr isch nüm riesig gsi. 11:6 ischs Ändresultat. Aber wie höch spiut eigetnlich ke Rolle. 0:1 hinge ir Serie, das isch z Massgäbende.
Es brucht scho e dütlichi Steigerig nöchscht Samschtig z Gränche für das mr em Sunntig nomou uf Zug chöi. Es isch jedem klar wos gschlage het jetz. A nes Wunder gloube isch z einte, eis umzsetze isch z andere. Mi cha e Troum tröime oder ne läbe... Was mir müesse, isch drus erwache! Aui!
Trotz dr Stärki vo Oberwil si si verletzbar. I ha no nie es Team gseh wo sich nachemne 3:0 Vorsprung uf dr Spilerbank ahhässelet, i ha no nie gseh dass sich e Mannschaft wo 9:2 vore isch gägesietig "Schlämperlige" ahhänkt. Isch schreg gsi das z beobachte. Isch schreg chame so Erfolg ha... oder isch villech grad das z Rezäpt derzue? Individuelli Klass vorem Teamgeischt? Ihsatz vo de einzelne Stärkine ohni Rücksicht ufene Zämehaut? Cha si, dr Erfolg git ne sicher rächt!
Es Novum het sich no uf dr Heimreis abgspiut: Z erschte Mou mit Polizeieskorte dür Zug gfahre ;-) Nei, es isch nid wäge "ufbrachte Fanmasse" gsi ;-) sondern wägem Inlinecup, aber mi darf jo mou chli fantasiere we me hockeymässig süsch grad nüt zum lache het...
Em Samschtig 14:00 z Gränche geits wieter. Dört fot wieder alles bi Null a. U mi wird es anders Team erläbe aus geschter, das isch sicher! I de Playoff isch aus möglich...

Kernenried (H2) 1/4 Final

2008-04-14T10:01:00.011+02:00

HAUBFINAL!! Juhui! "It's my life" tönt usem Outoradio und z ganze isch wieder presänt. Was für ne Serie. Weni a Glück u Päch würd gloube de würdi säge: Schwein gha! Und wie sogar! Mir hätte üs nid dörfe beklage we mr dä Mätch geschter verlore hätte. E Verlängerig isch sicher Glücksach. I gloube aber dass au wo das Spiu hei gseh tüe bestätige: Dä Sieg isch nid unverdient! Aber vo Ahfang a: Die erschte paar Minute hei üs ghört. Mir hei dört chönne ahchnüpfe wo mr letscht Sunntig hei ufghört. Pressing ir gägnerische Häufti. Ca. 5 Minute isch das guet gange und de hets noche glo. Mir hei dr Druck nüm ufs Goal brocht und si defensiv nüm uf de Lüt gstande. Dür ne Standartsituation (Bully Goal) het üs dr Nicku de doch 1:0 i Füehrig brocht. Leider het das aber nid wyt glängt und d Rieder hei mit emne Wytschuss und emne Powerplaygoal chönne 2:1 dervo zieh. Churz vor Schluss vom erschte Drittu het aber dr Geru no zum 2:2 ir Überzahl usglieche. Nach dr Pouse hets de afo bessere. No meh Druck, no besser defensiv und mit no meh Wille hei mr das Drittu dominiert. Kernenried het zwar ou do zwe drei (gueti) Chance gha, aber mindischtens 18 Minute si mr ir gänerische Häufti gsi. Eifach d Chanceuswärtig (wo jo schiens nid soooo unwichtig sig) isch schlächt gsi. Eis Goal het nume usegluegt (dr Schäume breicht ou vo A2 und nid nume mit Schläpper) und d Chance wäre sehr guet gsi. diversi Überzahlmöglichkeite hei mr usse glo! Schlächte Lohn für soviu Arbeit! 3:2 vore nach 40 Minute. Es isch auso für Spannig gsorgt gsi i däm letschte Drittu. Schliesslich hets so usgseh aus wärs z letschte die Saison für eini vo beidne Mannschafte. Nach de Goal vom Geru und Steve hets so usgseh aus chönn Kernenried id Ferie. Doch üses Spiu het drunter glitte! Wieso? Mir hei die letschte 2 Spiu probiert ussschliesslich z Spiu vore z mache. Dass i de Chöpf e Reaktion git so churz vor Schluss mit somne Vorsprung das isch fasch nid z vermiede. Es isch nid eifach Närvosität und scho gar nid d Kondition, do si mr z guet! Es isch Tatsach das me z letschte Risioko nüm ihgeit und dür das es anders Spiu git wo üs haut nüm so ligt. Das het me i aune Spiu gäg Kernenried gseh und mi häts chönne usnütze. Mit ere nume chli aktivere Spielwies vo ihne würds jetz villech anders usgseh. Aber zrug zum Spiu: 5:2 vore im letschte Drittu. Au hei gwüss: Das ischs no nid gsi. Mir hei no 3-4 99% Chance vergä und hei de im Gägezug z 5:3 und z 5:4 bercho... Leider. E unnötigi Strof het de derzu gfüehrt dasses churz vor Schluss no mou Unterzahl git... und jo: Die isch ei Minute vor Schluss mit emne Wytschuss usgnützt worde. E Stich iz Härz. Und zwar z mitts dri. Viu hei nüm dra gloub und hei dänkt: Typisch... Dr Reto wo die Strof gholt het wär fasch zum Sündebock worde vo dere Serie. Tatsach isch aber dass är unverzichtbar isch worde ufem Fäud. Nachem erschte Spiu wo mr verlore hei wiu mr dr Druck ufs Goal eifach nid hei chönne mache isch är eine vo de wichtigschte Gründ gsi wieso mr die Serie hei chönne dräie! Är hets im Training demonstriert und hets im Mätch umgsetzt. Mi cha i jedere Situation uf jedere Position Druck ufenes Goal bringe. Und die andere si däm Bispiu gfolt! So ischs zur Verlängerig cho... Närvosität het sich breit gmacht. Mi cha sone Verlängerig ahgo mit em ne defensive Gedanke oder mi chas dr ander Wäg mache. Es tönt arrogant. Aber z Ziel isch nach wie vor gsi: Füre go, eifach füre go. Ke Gedanke dra mir chönnte das Goal bercho, sondern dr Gedanke: I cha zum Held wärde wenis schiesse. Die Rächnig isch ufgange. Zuegä: "Schwein gha" ;-) Aber dr Lars isch zum Held worde. Dr Schuss sig abglänkt gsi, vo wäm wüsse mr nid, aber dr Lars isch aus 17 jährige Junior zum Mätchwinner worde und het die Serie nach 30 Sekunde für üs entschide. Thank's!!! Ok, es isch e Mannschaftsleischtig gsi. Die zwöi Spiu hei beinhautet was gforderet isch gsi. Es het weh to und es si au Spieler (und Trainer) a ihri Limite gstosse. So wies muess si. Es geit um alles oder nüt, hie, jetz oder nie! Kernenried het zeigt wieso si üs gwält hei. Und i muess zuegä si hei stärker gspiut aus i erwartet hät. Ou das tönt nachemne Sieg villech arrogant. I schriebes aber eher us Respäkt. Wie gseit, mir hätte üs nid dörfe beklage we mr die Serie Geschter verlore hätte. D Rieder hei e ähndlichi Phylosophie wie mir. Z Team steit im Vordergrund. Äuä sogar no meh aus bi üs. Dr Wäg und d Entwiklig vo Spiler wie em Boumi, wo letscht Saison no bi üs gspiut hei zeigt dass das e sehr guete Wäg cha si. Eigentlich schad dass eine vo beidne us dere Serie het müesse gheie!
Z letscht no eis: 300 Zueschouer! Schöns Wätter. Ballön, Transparänt, Musig.... MERCI VIU MOU. Es isch üses liebschte Hobby, und drum mache mrs. Was Dir aber für ne Rahme drum bote heit isch troumhaft gsi. Jede wo sich scho mou hingerfrogt het obs dr Ufwand wärt isch het em Sunntig müesse säge: Jo, genau das si d Momänt für die sekli gärn mini 10km dürs Täli...

Kernenried (A) 1/4 Final

2008-04-07T13:02:00.002+02:00

Ohni gross id Detail z go hei mr d Fähler letscht Wuche schnäu gfunde gha. D Frog isch eigentlich nume gsi ob mrs ire Wuche häre bringe das aues z korrigiere... I zwöine "Spiel"training mit praktisch kompleter Mannschaft hei mr paar Sache probiert und am Sunntig wöue umsetze. E Houptfrog isch ou gsi ob mr em Druck chöi Stand haut. Es isch i de Chöpf nid eifach we mit em Rügge gäg d Wand steisch. Aber lue do: Es het häre ghoue! Z erschte Mou die Saison gäge Kernenried gwunne! Juhui.

Ahgfange het z Spiu mit sehr viu Druck vo üsere Siete. Dr Platz isch üs zwar nid würklich entgäge cho, aber mit däm het jo üse Gägner ou müesse kämpfe. Mir hei üs die einti oder anderi Chance chönne erarbeite bis de dr Ludo Backhand het chönne ihschiebe. Mir hei üs effektiv meh Chance chönne erspile aus no vore Wuche. Das het paar Gründ, aber ou uf die weti nid wieter i go. Ir Überzahl isch üs bewusst gsi das me z Ougemerk ufem Steve het. Und genau so ischs cho. Guet si dür das anderi Spiler frei worde und so het 2 Mou dr Geru und einisch dr Lars chönne provitiere im Powerplay.
3:0 vore im Mittudrittu... Das das nid wird länge das hei mr gwüsst. 3:1 no im zwöite und de e chlini Unufmerksamkeit vor erschte Linie und scho ischs 3:2 im letschte Drittu gstande. D Schiedsrichter hei leider ou das Mou wieder Müeh gha und hei sich chli wöue meh ihbringe aus nötig wär gsi. So ischs cho das mr öffter mou hei Unterzahl gspielt. Dank em Dave, Niku, Steve und Lars hei mr aber aus überstande wos z überstoh git! Respäkt!
I de letschte 10 Minute isch Kernenried de so richtig iz Spiu cho. Aber mit ere (grosse) Portion Glück het dr Niku chönne e Wytschuss am einisch me sehr guet spilend Mischu näbe düre bringe. Z Game Winning Goal zum 5:2 wie me so schön seit.
Z Spiu het de 6:4 gändet. Dr Geru u dr Lars mit je 2 Goal si die beschter Torschütze gsi. Aber genau gliech viu Wärt het die sehr gueti Defensivarbeit vo aune Spiler gha!

Dä Sieg het e chli e schlächte Biegschmack: I ha säuber gseit Playoff sig nüt für Weicheier. Und weiss, dass Trashtalk für gwüssi Lüt "die Kunst der Beleidigung" isch und grad i so Phase sehr hüfig aus taktischs Mittel brucht wird. Ou mini Emotione gö mängisch düre mit mr. Aber ou im ne Derby wos um aues geit chame gwüsse Ahstand wahre und mi muess enang nid grad mit "Abstäche" drohe oder no schlimmer: Emne Gägner a Chopf spöie! Sorry, das isch unger dr unterschte Schublade gsi! Weni je einisch gseh wie das e Spiler vo mir äxtra macht, de hets sicher "heftigi" Konseqänze für däjenig...

Wieter geits nöchscht Sunntig z Gränche. Em zwöi im Eichholz. Wär schön we dr üs bi däm sehr wichtige Spiu würdet unterstütze. Mir bruche nid nume ufem Fäud jede, sondern ou dernäbe! Merci!

Solothurner Tagblatt

2008-04-01T09:44:00.001+02:00

Hie dr Bricht usem Solothurner Tagblatt:

Kernenried (H) 1/4 Final

2008-03-31T09:56:00.002+02:00

I ha mr die letschte drü Wuche intensiver Gedanke gmacht über das fählende Puzzleteil. D Ergäbnis drus isch, dass es nid nume eis Teili brucht sondern e ganz e grosse Huufe chlini. So hei mr auso ahgfange die lääri Flächi nadisna z fülle. Leider si mr nid fertig worde dermit ufe wichtigsch Mätch die Saison.
Mir si am Sunntig am 2 i de Chöpf parat gsi, do dervo bini überzoge. Aber mi muess niedlos anerkenne das Kernenried die spilerisch besseri Mannschaft isch gsi geschter. Mir hei zwar z Spiu vo A-Z müesse mache, aber d Goalchancene hei mr üs nid chönne erspile. D Rieder hei sich uf z zerstöre vo üsem Spiu und z Kontere beschränkt. Dass das ihri Stärki isch hei mr gwüsst. D Effiziänz isch aber sehr höch gsi geschter, zu höch für üs. Und bi üs isch z Gägeteil dr Fau gsi offensiv, d Uslösige si nid ahcho, mir si bliebe hange ir Mittuzone, und und und. Defensiv hei mr zwar guet stüret, aber hei gliech nüt drus chönne mache... E 3:8 Niederlag isch z Resultat drus.
Es sehr schwirigs Rückspil ufemne sehr schwirige Platz steit nöchscht Sunntig ufem Programm. Aber mir müesse reagiere, spötischtens jetz geits um aues oder nüt!

Playoff
Mir müesse anders spile das isch klar. Playoff si anders, do muess jede einzelne Spiler viu meh Verantwortig übernäh. Das isch nüt für Weicheier. Mi spiut sini Stärkine us, ohni über sini Schwächine oder die vo de Mitspiler noche z dänke. Es darf ruhig mou weh tue im ne Zwöikampf, es chönt jo jedes Spiu z letschte si. Zrug sto und verstecke gits nüm, z jammere vor während und nachem Spiu isch Tabu. Di einzige Diskusione söue dr optimierig vom Spiu diene, vom EIGENE Spiu. Z Team steit i dere Phase vor Saison über auem. Z Ego chame für die Wuchene irgendwo vergrabe und de im Früehlig wieder go sueche. Was isch im Sinn vor Mannschaft? Das isch dr Houptgedanke! Ihsatz für Ihsatz, über d Bande gumpe und a Ahschlag cho i dene 30 Sekunde, Borg 20! Säubschtmileid gits nüm während em Spiu, mi machts haut eifach besser bim nöchscht Ihsatz! Es cha schmärze am Sunntig obe oder em Mäntig. Es muess sogar schmärze, ersch denn isch me az Limit gange. Us Liebi zum Spiel, zum Team, zu sine Mitspiler, zu de Fans, zu sine beschte Kollege zu sich säuber. Für das isches dr Wärt!!! Em Sunntig obe i Spiegu luege und dänke: I ha aues gä woni cha!! Ohni z überlege, aber dr ander het nid...! Das muess z Ziel si.

Wär eine vo dene Pünkt nid erfüllt dä isch zum jetzige Zytpunkt am fautsche Platz!

Märztraining

2008-03-13T10:51:00.004+01:00

Leider z spät, aber gliech e chline Liechtblick im Mittwuchtraining. Borg Wärte vo 17 bis 20 (Maximum) si z Ergäbniss usemne intermittierende Training inklusiv Yoyo Tescht gsi. Und dä Tescht isch guet usgfalle, sehr guet zum Teil! Im Gägeteil zu andere Loufüebige söue die Teschte nid e Strof si für das Debakel vo letscht Sunntig. Viumeh söus mir diene aus Reflexion vor Trainingsplanig und für Ahpassige vo dä kurzfrischtige Schwärpünkt. Äbeso söus Ufschluss überne zuekünftigi Saisonplanig gä und de Spiler zeige wie das si Fortschritte mache und e Vergliech zu de Mitspiler gä. D Uswärtig vo 11 Spiler gseht wie fougt us:
Do derfzue gits no zäge das dr Märe und Lars ihri Teschte am Samschtig bim U20 Natizämezug gloffe si und das dr Schäume nöie Vereinsinterne Rekord gloffe isch. Gratulation! Mit emne Schnitt vo 2200 Meter isch ungefähr e Schutt-NLB Referänzwärt erreicht worde.
Do derzue giuts z säge das me das nid mit nume 2 Training ir Wuche erreicht. Dr Vergliech zum Tescht im Herbscht zeigt aber einisch me dass me es Leischtigniveau wome düre Summer erreicht het mit 3-4 Reize/Woche wo nümme speziell uf Usduurtraining ufboue si(2 Teamtraining, 1 Mätch, u eis individuells Training) durchus cha bis i Früehlig haute! Es brucht aber sicher die individuelle Trainings dür d Saison zum sich nachemne intensive Summertraining no würklich z verbessere wärend dr Saison.

Oberwil (H)

2008-03-10T07:35:00.005+01:00

E Houptprob für Playoff, e Überprüefig vor taktische Usrichtig, e Formtescht, luege wo mr stö... So hei mrs vorem Spiu gseh. U de? 3:14 Verlore!!
Mir chöi nid die ganzi Saison jetz uf das Spiu reduziere. So hei mr nachem Spiu gred. Vorwäg: Merci au dene wo 60 Minute am Spiufäudrand si gstande und das über sich hei lo ergo. Und es riesegrosses "Sorry" vom ganze Team!
Das Spiu isch nid 2 Minute gange bises gloffe isch. Mir si vonanggheit wienis säute gseh ha. Positivs drus?
...mir si säuber tschuld. Warum söu das Positiv si? Jede het si Teil derzue bietreit. E Summe vo Einzufähler, vo falscher Usrichtig, vo taktische Mängel. Mir hei üs kollektiv i das Eländ gspiut... aus Team... süsch Positivs? Es isch nüm um Pünkt gange i däm Mätch. D Ranglischte isch gstande und somit hets effektiv nume Teschcharakter gha. Aber äbe, dä Tescht isch gründlich id Hose! U mir hei eigentlich meh wöue, viu meh. Das wäre mr aune Lüt schuldig gsi, u üs säuber o. Z einzige wo a däm Tag würklich fröid het gmacht si drei Juniore wo mit em Ba zäme e Linie bildet hei wo kämpft het. Kämpft us fröid am Spiu, kämpft wiu si no nid so viu derzue si cho weder im eis no bi de Juniore, kämpft wiu ihne d Zuekunft ghört. Dr Trisu, dr Römu u dr Fäbu si z chline Highlight gsi a däm Sunntig.
Es heisst jo us jedere Niederlag chönn me Positivs use näh. Sigs ou nume d Chance für Veränderige. Z Wüsse jetz muess öpis go. E nöie Ufbruch zum richtige Momänt ir Saison. 3 Wuche Zyt hei mr für das... Nid für aues z hingerfroge sondern fürs reagiere. Mir wei die Niderlag aber nid vergässe i dere Zyt, sondern drus lehre!
Das wird dä Mittwuch mit em nöchscht Yoyo Tescht los go. Nei, dasch nid e Strof, dä isch ahkündet gsi. Aber i go dervo us dass das nid die einzige Meter wärde si wo mr ir nöchschte Zyt loufe...
Aus Gägner für d Playoff het üs Kernenried usgläse. I bi sehr froh über die Wahl. Nid öpe wiui si schwächer ihstuefe aus Bonstetten. Im Gägeteil. 2 Niederlage u eis Unentschide spräche für sich. Aber es wird es Derby gä, und was für eis! Juhui, Playoff!

Solothurner Tagblatt

2008-03-04T10:03:00.002+01:00

Hie dr Bricht usem Solothurner Tagblatt:

Kernenried (A)

2008-03-03T14:12:00.005+01:00

Ou im dritte Ahlouf hei mrs nid gschaft die Saison. 4:4 z Zauggenried... I weiss nid obi eifach viu z höchi Erwartige gha ha nach dene guete Training voletscht oder was süsch z Probmlem isch gsi. Durchs Band düre si mr nume bereit gsi 80-90% z gä. U dass das nid längt im Derby sötte mr jo mittlerwiele wüsse.
Derzue chöme 2 Schiedsrichter wo einisch me sich gärn im Mittelpunkt gseh hei. Das Spiu isch sehr eifach gsi zum leite, aber ou so bringt mes häre Regle nöi z interpretiere und Sache z pfieffe wo niemer uf und näbem Fäud cha nachvollzieh. Auii vier Goal hei mr i Unterzahl bercho. Z letschte ei Minute vor Schluss mit 4:5 Fäudspiler. Dr Pädu, Niku, Rämsi u Geru si d Torschütze gsi. 4 Goal länge aber schlicht u eifach nid. Ou we dr schlächt Platz fasch keni Päss u Drippling zuelot und me z Gfüehl het mi het mit de Schiedsrichter no 2 Gägespiler meh muess meh useluege i somne Spiel. Viu meh! Z Rad müesse mr aber sicher nid nöi erfinde die Wuche. Mit Oberwil chunnt am Weekend e Gägner zu üs wo mr üs sehr seriös wärde vorbereite. Besser als die Wuche sicher. Ok, es geit um nümme für üs, usser drum wieder "chli z hockeyle". Jo, und wieter wärs natürlich schön z luege wo mr gäg eine vo de "2 Grosse" stö. Aber do derfür müesse mr sicher me ufe Bitz bringe aus letscht Sunntig. Kernenried chönt ou üse Playoffgägner heisse. 3 Spiu hei mr die Saison gäg se gha. 2 Niederlage und das Unentschide... Spricht eigentlich aues für d Rieder. Isch mr aber ehrlich gseit egal gäg wär mr spile. Mir wei e Rundi wieter und do söu cho wär wot! I fröie mi ufene gueti Serie.

Tenero

2008-02-26T15:09:00.016+01:00

Mi cha spielfreii Wuchenänd bruche zum wieder mou chli Abstand z gwinne oder mi cha se bruche für "chli" z hockeyle.
Woni vor öpe 6-7 Wuche z Team mou mit dr Idee vom ne Trainingsweekend konfrontiert ha hätti mr nie ertröimt das es so cha wärde. Di erschti Überraschig: Inklusiv Juniore KEI Absag! (Ok, e churzfrischtigi hets de gliech no gä.) So si mr auso komplett am Samschtig iz Tessin greist. Die einte wos scho chli kenne hei sich dämenstprächend usgrüschtet: Beidi wiederspiegle eigentlich dr "Geischt vo Tenero". Mir hei z Wätter gnosse, z zäme si, aber ou d Arbeit isch nid z churz cho. Viu Teorie: Aber ou viu Praxis: Nei im ärnscht, es isch viu garbeitet worde. Sehr viu sogar. Und ou sehr viu het usegluegt. Mir hei ändlich mou Diskusione chönne füehre wo süsch niene Platz hei. 2 Tag üs intensiv mit Hockey beschäftige. Für das Pensum z bewältige wo mr vom Samschtig ufe Sunntig gschaft hei würde mr süsch 1 bis 1 1/2 Monet Training dra gä. Ohni Witz. Und das het e sehr höche Wärt für üs. Ou wes vom einte oder ander wieder aus Sietehieb dargsteut wird: Jede het das Lager 100% säuber müesse zahle. Isch scho no schreg. Aber für mi umso schöner das jede zuegseit het. Dr teamcharakter stimmt eidütig. D Infrastruktur isch natürlich ou absoluti Klasse. Und d Lüt vom CST hei üs dr Ufenthaut sehr fründlich gstautet! Merci faus es öper list! Jo, was hei mr aues gmacht? Ahgfange hets mit emne chline "Usrütschter" zum Handball. Jo und gändet hets mit ere churzfassig vom WM Final Dütschland - Polen letscht Johr z Köln. I ha mi "liecht" lo mitriesse haut. U we nid au usegloffe wäre de wäri no hüt am schwärme im Theoriezimmer ;-) Aber i bi jo zum Glück nid dr einzig. Wie eifach dass Basketball würd go het üs de dr Flips em Obe demonstriert. I chas nid verkneife: Es isch dr Hammer gsi was dä Ma mit em "virtuelle" Bäueli cha mache! (Nei, z Video tueni nid i Blog) Villech chöme mr jo im Verlouf vor wietere Saison au mou zum Gnuss vo dere Showihlag. I ha so öpis no nie gseh, und jo, es si haut so Detail wo es sympatischs Team no mou chli symatischer macht. Aber wieter zum Thema. Was hei mr süsch no gmacht? Sicher si d Goali's chli z churz cho: Aber ou si hei d Usrüschtig müesse ahschnaue: Es si Houptsächlich scho d Spiler gforderet gsi. Dr Kreativität si fasch keini Gränze gsetzt gsi und dämentsprächen isch ou viu gred worde und teil Spiler si richtig ufgange i dene Diskusione. Ou hie giuts wieder mou z erwähne: Isch schön z gseh was bi de Juniore noche chunnt! "Ohne viele Worte" weti doch no paar Föteli ine hänke. Sigs eis wome doch wieder einisch dütlich gseht das Goaline haut doch chli andersch si (ou wes nume bir Wahl vo Schueh isch):
Oder hie dr Bewies das es "gmeinsam" haut doch viu besser geit aus "allei":
U z letscht no e Theorielektion us dr Voguperspektive: Last but not least no e Erkenntnis us mim Lieblingsbild. Es isch nid nume bi de eigene Chind z schönschte we si lache u fröid hei, sondern ou bim eigene Team: Merci a au wo si derbi gsi und hei mitgmacht für das schöne Weekend. E chline Troum isch mit däm i Erfüllig gange. Z 5te mou Tenero, aber z erschte mou mit "üsem Team"! Isch scho ganz öpis Speziells gsi! Thank's!

Sierre (H) Nachtrag

2008-02-20T10:19:00.012+01:00

Da dr Verein nid so viu zahlt, oder besser gseit (zum Glück) gar nüt, hani em Mäntig no mim "ander" Job müesse noche go und nid so Zyt gfunde füre Mätchbricht. Mittlerwiele si aber paar Bildli uftoucht und die wete mr nech doch nid vorenthaute. Aus erschts Mou e "intime" Ihblick id Kabine. Und d Erkentniss drus: Dr Dave deckt nid nume im Goal fasch aus ab ;-)
Aber nomou zum Spiu: Es isch irgendwie e sehr intensive Match gsi. Auso es git Spiu do berchunnsch aus mit wo däbebi louft ums Fäud. Und es git die Spiu wo am ander Tag eim wotsch öpis verzeue und är de seit: I bi ou dört gsi! Und du frogsch di: Hä? Warum hani dä nid gseh? Dasch sone Mätch gsi wo dr eint oder ander meh aus süsch dr "Tunnelblick" bercho het. Jo, sogar mir Trainer. Das isch jo eigentlich ou Ziel vore Matchvorbereitig. Und äbe gliech isch das immer wieder e intensivi Erfahrig. Entgäge andere Grücht wo vom ne "schlächte Spilniveau" rede bini nach wie vor dr Meinig es isch es klasse Spiu gsi. Nid z "Perfect Game" isch klar. Do derfür het dr eint oder ander z grobi Schnitzer drin gha. Aber es isch hochstehend gsi. Schön hei mrs uf Video und chöis am Weekend no mou gniesse! Mir hei teilwies chli naiv gspiut. Üses Unterzahlspiu isch aber sicher nid soooo schlächt wies usgseh het. Mir hei e riese Ufwand tribe zum 2:0 und si de aber sehr ring 2:3 hinge gsi. Dasch öpis wo mr müesse i Griff bercho. D Nachwehe vore 4:0 Füehrig und em ne trotdäm verlorene Match gäg Kernenried lässt grüssen. Aber wie scho im vorder Bricht erwähnt. Trotz Niederlag überwiegt z Positive us däm Spiu. Es het Säubschtvertroue gä. Sehr viu sogar. Chunnt derzue das mit em Geru und em Ste no zwöi gfäut hei vom Stammkader. I gloube dr Wäg stimmt. Z Ziel isch griefbar: I de nöchschte 2 Spiu bruche mr no eis Punkt. Kernenried uswärt und Oberwil deheim si d Gägner. Wär schön we nomou dr eint oder ander chäm cho luege, es isch e Troum vor soviu Lüt dörfe z spile und i gloube mini Jungs hättes nach dere Leischtig verdient :-) Öpis Nöis hets no am Rand vom Spiufäud gä. D Sponsore und Ehremitglieder si ihglade gsi zum ne Raclettässe. Bi dere Glägeheit es Merci ad Organisatore!! Es sig schiens fein gsi hani mr lo säge. Für mi hets leider kes glängt, i ha dr Usgang vo mim Tunnel irgendwie ersch am Mäntig Morge wieder gfunde ;-) Hie no es Gruppebild vo au dene Lüt: Thanks a au!! Und natürlich ou a die wo nid hei chönne cho oder chli me im "Hintergrund" für üs schaffe. I hoffe es isch öich aune bewusst das mir ohni öich üse Troum nid chönte läbe!

Und zum Abschluss nomou e intime Blick iz Vereinsläbe. Nach em Mätch wird nid nume rege über Glück und Päch diskutiert ;-) Wie mr wüsse rächne d Goaline zwüsch düre ou mit einzelne Spiler ab:

Solothurner Tagblatt

2008-02-19T08:15:00.003+01:00

Hie dr Bricht vom Solothurner Tagblatt:
U weni grad derbi bi hie no öpis anders usem gliech Verlag: Jo, mi het d Ziel doch chli ufe gschrubet im Gürbetal...

Sierre (H)

2008-02-18T12:55:00.002+01:00

Es isch aues gä gsi geschter für nes Hockeyfescht. Z Beschte Wätter, e gueti Vorbereitig, viu Lüt (MERCI VIU MOU!!), und mit Sierre dr richtig Gradmässer. Mir hei üs sehr viu vorgno für dä Mätch. Hei nid nume de ihgladne Ehremitglieder und Sponsore öpis wöue biete, sondern üs säuber wöue bewiese das mir 60 Minute es höchs Tempo chöi düresto. Und z Tempo isch würklich höch gsi. Extrem sogar. 2 Lüt si aber mit däm zimli heftig überforderet gsi. Was jo eigentlich im ne Mannschaftssport nid so tragisch wär. Aber i däm Fall sis d Schiedsrichter gsi. Vor erschte Sekunde a hei si kei klari Linie gha und das isch bi ihne z einzige gsi wo sich 3 Drittu dürezoge het. Sehr schlächt für sones Spiu haut...
Aber zum Spiu: D Motivation isch würklich riesig gsi. Z Ziel isch gsi das jede uf sini 100% chunnt und nachem Spiu cha säge: "i did it my way". Das hei mr trotz dr Niederlag erreicht und das isch das wo mr mitnä. Mi brucht ke Usländer im Team, mi brucht es Team wo a sich gloubt, wo enang hiuft, wo eine mit sine Stärkine em andere sini Schwächine usbüglet. Dr Rämsi hets am Fritig ir Teambesprächig ufe Punkt brocht: Genau das macht es starks Team us!
2:0 vore im erschte Drittu. Bis denn isch fasch nüt Pfiffe worde. 3 Pfiffe, 3 Powerplay und scho ischs 2:3 gstande zur Pouse. So schnäu chas go. Vier gäg vier si mr die besseri Mannschaft gsi, hei üs aber naiv ume Lohn vo däm Ihsatz brocht. Symtomatisch die wenige Fähler im Mittudrittu wo aber verherend si gsi! 3:5 ischs nach dene 2 "Lapsuse" gstande. Das isch scho fasch d Vorentscheidig gsi. Mit em 4:5 het zwar dr Ludo nomou lo Hoffnig ufcho, aber es het leider nid glängt. 6:8 verlore, so gsehts ufem Papier us. Aber was mr us däm Spiu mitnäh isch unbezahlbar. Mir hei nid nume e gueti Offensive, sondern chöi ou Defensiv besto. Zudäm macht sich z Konditionstraining einisch me bezahlt. Was im Summer isch hert ahtrainiert worde zieht me haut eifach wieter, d Teschte und das Spiu belege das ihdrücklich.
Vor üs ligt es spiufreis Weekend. Haut nid ganz ohni Hockey, im Gägeteil: Z Tenero erwartet üs e sehr intensivi Zyt. Z Team isch zum erschte mou komplet. I fröie mi uf z Ergäbniss us dene 2 Tag!

Einschiessen

2008-02-15T10:46:00.003+01:00

Wie wichtig das mr z Ufwärme und z Ischiesse voremne Spiu isch wüsse gloub mitlerwiele au mini Spiler. Ansonste gäbs nach wi vor Dokumänt dervo ir Buvette ;-). Es isch die letschti Glägeheit für jede persönlich si ILZ ufe Zenit z bringe. Wär das häre bringt dä isch bereit 100% vo sire Leischtig abzrüefe. Au andere spile russischs Roulet mi ihrem Potential! Und das isch gloub i keim sim Interässe.
Das allei wär aber gloub no kei Ihtrag im Blog wärt...
...nei, es het mi eine ahzündet (Name dem Blogger bekannt ;-) ) es sig scho lang nüm do inne gstande. Us däm Grund hie schnäu paar Impressione vom Ihschiesse und nachträglich no dr Bewies zum Matchbricht vom Seetal Spiu: I ha jede Spieler gfötelet und ha meh oder weniger gliechzytig abdrückt. Jo, haut eifach dört wo d Schussabgab öppe grad chönt cho. Das isch ou bi aune sehr guet glunge. Bi aune? Nei, es git äbe Usnahme (Name dem Blogger bekannt) wo dr Stock jewiels scho wieder ir Rückwärtsbewegig isch, dr Ball no an Ort unds haut nume es Näggi meh am Bode het gä: Aber Spass beiseite. Ou bi ihm bini Froh spiut är bi üs. Zu Wichtig si sini Goal fürs Team!! Merci Schäume ;-)

Seetal (A)

2008-02-11T10:51:00.000+01:00

Ahgfange het aues die Wuche im Training. Ok, obwohl 5 Absage si cho si mr no 18 Stück gsi am Mittwuch. Isch guet trainiert dr eint oder ander "Ehemalig" no chli mit zum sich fit z haute. Em Friti isch de aber z Moto "Defensivi Taktik" vou id Hose.
Ir Hoffnig ufene Reeaktion us däm schlächte Training si mr uf Lenzburg. Es isch leider nid ganz so cho wie erhofft.
Viu Spiler heis nid für nötig gfunde "Dräcksarbeit" z mache. Dräcksarbeit? Jo, die Löif wo am ne ballfüehrend Spiler dr Wäg ufmache, dr Louf zum immer ahspiubar z si, dr Louf zrug mit em Gedanke: "Dä verwütschi no" u nid mit em Dänke: "Dr Dave het dä scho", dr Louf i anger Egge zum ne Ball uszgrabe usw. Z guete dran? Das isch zum Glück nume im erschte Drittu so gsi. Und no öpis Guets dran? Mir si trotzdäm 2:0 vore gsi nach dene 20 Minute!
Gweckt si mr ersch im Mittudrittu worde. E Stockschlag id Bei vom ne Gägner het zure sehr (z)herte Matchstrof gfüehrt. 5 Minute Unterzahl cha eingentlich ere Mannschaft dr Match choschte. Bi üs ischs aber Geschter dr Startschuss gsi ändlich chli meh z mache. Ufs Mou het me kämpft, ufs Mou isch kei Wäg me gnue wyt gsi. Jo und 5 Minute sis de ou nid worde. Irgendwie hei mr 10 Minute Unterzahl, Überzahl, 2:2, 4:2, 3:2 usw. gspiut. Aus Zueschouer ischs äuä nid so dr Hammer gsi. Für üs ischs no gange. Schliesslich hei mr jo ou uf 6:0 chönne dervo zieh :-)
I de Chöpf ischs de langsam aber sicher presänt worde: Dr Dave het üs im erschte Drittu am Läbe ghaute, auso tüe mr öpis für si Shotout... Und wies so muess cho mit däm Dänke hets natürlich z 6:1 gä... Schad! Ok, nach däm Fritigtraining und au dene Seikergoal a däm Obe hät ou niemer mit nume eim Gägegoal grächnet z Lenzburg. Är isch ire Topform im Momänt. Beniedenswärt!! Und vore hei mr ändlich wieder mou gueti Schütze! Dr Ludo het 3 Mou breicht. Irgendwo hani gloub mou gläse dä längi nid ir NLA?? Schön wie me sich cha tüsche. U jo, i bi froh spiut är i mim Team und nid im ne anger NLA ;-). Ändlichs gits vom Lars: Dr bescht 90er ir Schwiez. Ohni Zwiefel! Mit em Steve ar Siete eh immer gfährlich gäg füre. Är het sini Leischtig mit 2 Goal krönt. Und de si no 4 Spiler mit eim Goal: Dr Nicku (Wietschuss), dr Märe (Pfannefertig vom Rämsi), dr Schäume (Wie chönt anders si: Schläpper ir Überzahl... 08/15 haut) Ah jo, het scho mou öper e Schläpper vom Schäume wöue fötele? Auso i meine nid eine im Usgang, sondern ufem Spiufäud? I has probiert bim Ihschiesse: Bi 5 Föteli isch 4 Mou z pöpperle druf und no nid dr Schuss... Jojo, är brucht haut eifach si Zyt bis dr Bau vorwärts geit ;-) Sorry Schäume aber du muesch eifach persönlich erwähnt wärde, schliesslich bisch mi tröischt Läser (wenigschtens einisch wo em Trainer zuelosisch ;-) )
Ei Torschütz fählt no: Mit em Trisu het sich e wietere 90er chönne id Torschützelischte ihtrage. Es isch nid Zuefall das är breicht. Är drängt sich mit sehr viu Trainingsfliess uf. Är wot spile und är hout ou i de Spiu z Optimum use. Es isch schön aus Trainer z gseh was für gueti Juniore hinge noche chöme. I bi froh hei mr dä Staf und die Jungs wo dä Ufwand triebe. Drum hie ou mou es Merci ad Lüt voni Schlussändlich im Eis eifach mitprofitiere: Löpu, Geru, Steve, Zäuer, Ba, LP, Thömu....
Es geit jetz wieter. Eis vo de wichtigschte Spiu steit a. Leider müesse mr i däm Mätch ufe eint oder ander verzichte. I bi aber zueversichtlich das mr es guets Team wärde steue. I dä Trainings gits ou nume ei usrichtig im Momänt: ....! Nei, do weti lieber nid zviu derzue säge :-) Nähr gö mr jo de uf Tenero und hei ändlich mou Zyt es paar Sache ahzluege wo mr scho lang vor üs häre schiebe. I fröue mi!

Solothurner Tagblatt

2008-01-29T07:21:00.000+01:00

Ir beschte Tageszytig vor Wält isch hüt folgende Bricht:

Bettlach (A)

2008-01-27T20:43:00.000+01:00

Vorwäg schnäu öpis "off topic": Z Belp wird schienbar dä Blog ou überfloge. Sorry wes dr eint oder ander persönlich nimmt. Isch nid z Ziel gsi vo däm Ihtrag. I wets ou nume am Rand nochelifer: Mi stört dä Transfer sehr aber jo, uf die sportlichi Verstärkig bini ihversüchtig und jo Belp isch nach wie vor eine vo de bescht gfüehrte Vereine (zeigt d Erfolge vo dr Juniorbewegig) und jo, i hät dr eint oder ander Spiler us Belp sehr gärn i mine Reihe! Mi cha mi Hüchler nenne oder nid, die wos kenne die wüsse was Sach isch... I wet drzue nümme säge, isch nid so mis Ding anderi Blogs z kommentiere.

So, zum Mätch gäge Bettach:
Derby hei eigeni Gsetz heissts so schön. Mir si gwahrnt gsi und hei üs vor Tabälle nid wöue lo beiflusse. Aber z Spiel het sehr schwach ahgfange. Mir hei schlächt gspiut, sehr sogar. Warum? Bettlach het das gspiut wo si chöi: Manndeckig ohni e Milimeter Platz z lo. Do dermit si mr lang nid z Schlag cho und hei praktisch jede Zwöikampf verlore. Die logischi Folg drus: Es sehr schön usegspiuts 1:0 vo Bettlach. Das mr de gliech 2:1 si vore gsi, do derfür het es sehr guets Powerplay gfüehrt. Im Mittudrittu hei mr praktisch 10 Minute Unterzahl gspiut. Das si die Zwöi Manko gsi vor Heimmannschaft: Powerplay und Unterzahl. Während mir 5 vo 6 Überzahlsituatione usgnützt hei, isch bi ihne nüt gloffe und aus negative Höhepunkt hei si sogar e Shorthander vom Geru zum 3:1 kassiert. Mir si aber nach wie vor nid besser iz Spiu cho. Dr 3:2 Ahschlussträffer het nomou Hoffnig lo ufcho bi Bettlach, aber naivi Strofe hei e Ufholjagt verunmöglicht. Acht Goal gschosse im ne Mätch. 5 dervo i Überzahl und eis dervo i Unterzahl. Dr Ba u dr Geru hei de zäme no zwöi gmacht bi 4 gäge 4. Es het gloub beidne guet to. Dr Geru het e sehr gueti Leistig hüt wieder mou mit Goal untermalt. 4 Stück ar Zahl!! Dr Lars mit 2 im Powerplay het zeigt dass är ou us dr Distanz trifft. Es witers Fazit wo nid darf fähle: Dr Schäume "pöpperlet" mängisch ou vergäbe und pässlet de gliech lieber ;-)
Isch guet hei mr die 2 Pünkt gholt. Süsch häts äuä Problem gä mit däm avisiert 3. Platz. Z Niveau isch aber nid so höch gsi wie no nachem Belperspiel gmeint. Mir müesse wieterschaffe die 2 Wuche, dasch klar. Für's taktische hei mr jo im Februar de z Tenero no chli Zyt, aber anderi Sache müesse sofort ahpackt wärde. Bettlach het überrascht und zeigt dass si zu unrächt so wiet hinge si. Z Problem isch eidütig dr Abschluss. Kämpferisch und läuferisch si si sicher bi de beschte vor Liga derbi und wärde em eint oder ander Gägner no dermit Angscht ihjage!
Nöchscht Weekend isch Spiufrei "Cup sei Dank". Aber i 14 Tag geits zum ne genau gliech unagnähme Gägner uf Lenzburg. I hoffe ufenes breiters, gsund Kader und das üs villecht dr eint oder ander ou nach dene letschte 60 Minute no chunt cho unterstütze.

Off Topic: Persönlichi Gedanke

2008-01-25T10:02:00.000+01:00

Mir heis nach em Belperspiu ghört: E Kanadier söu d Gürbetaler verstärke füre Räscht vor Saison. Jo und i gibe zue, i bi chli ihversüchtig. Warum? Sone Spiler cha ere Mannschaft extrem viu bringe. Dass Usländer churzfrischtig dr richtig Wäg si hei Sierre und Oberwil mit irne Philosophie jo bewiese.
So, dasch aus gsi woni derfür säge. Es git für mi zviu wo drgäge spricht. Sierre het damals ir NLB dr Ufstieg kouft, das weiss jede. Dr Verband het de reagiert und d Limite uf ei Usländer reduziert. D Meischtertitel si aber vo denn a nume no a verstärkti Teams gange.
Was Sierre damals gmacht het, het sich jetz Belp als Biespiu gno. Mit dr Begründig das sig Wärbig für üse Sport. Bravo! Mi Dank hie geit richtig Bärn für die super Büetz! Es tuet mr leid, aber für mi wird do d Ethik mit de Füess träte. Es geit chli i gliech Bereich ine wie bi gwüsse Doppingfäu: Isch dr Jan Ullrich schuldig? Nei, solang är nid verwütscht wird nid oder? Was nid verbote isch und was me nid cha noche wiese isch erloupt im Sport. Ischs nid so? Mi nützt d Lücke im Reglemänt für sich e Vorteil z verschaffe. Belp machts jetzt mit däm Transfer während dr Saison. Jo und es tuet mr leid. E Spiler wo ire andere ISBHF Meischterschaft spiut und wieder wird spile söt eifach nid dörfe wächsle.
Mir hei vor öpe 3 Johr mou ar Präsidentesitzig gfrogt ob me nid chönn e Regle ihfüehre dass e Spiler wo Playoff spiut mindischtens 4 Spiel i däm Team muess gmacht ha.... isch leider nid düre cho, warum ou immer :-(
Jo mi cha hie säge d Ihversucht spiu mit bi mine Sätz, das isch sicher chli so, schliesslich hei mr 3 mou i Folg e Playofffinal verlore gägenen mit Eishockeyspiler verstäkti Walliser Mannschaft. Jo u wes vor Verbandssiete heisst das sig gueti Wärbig füre Sport de müesse mr das akzeptiere. I hoffe ou mini junge Spiler und die paar vo Sierre wo damals wäge däm hei müesse zueluege gloube das.
Letscht Johr wo mr hei unge düre müesse het di ganzi Streethockeyschwiez gloubt mir verstärke üs de ufs Ändi vor Saison. Zur Überraschig vo allne hei mini Spiler aber das wöue säuber usbade was mir üs ihbrockt hei. Damals wäre Spiler wie Schneider, Züri, Mono sicher e Hiuf gsi. Mir si dere Verlockig aber usem Wäg. Mir hei wöue dr Charakter vom Team bhaute: Durch dick und dünn. Respäkt vor so junge Spiler wo sone Entscheid träffe!

I hoffe vo Härze dass dä Fall z Belp kei Schuel wird mache. Es tuet mr leid, i ha süsch nüt gäge Belp, i ha immer gmeint das sig eine vo wenige Vereine wo z Härz no am richtige Fläck het: So chame sich tüsche! D Streethockeyschwiez wir uf Bärn luege und wird schadefröid ha bi jedem Punkteverluscht, das muess me sich bewusst si! We drs nid gloubet de dänket doch nomou wieviel Fröid d nid Bieler heit gha das dr EHC Biel nid ufgstige isch nachdäm si sich ("legitim") verstäkt hei... Was isch dr Unterschid jetz?

D Zyt wird irgendeinisch noche si für "Profis". Z Model vom Hossa imponiert ou mir! Das ermöglich sicher sehr viu nöii Sache im Juniorebereich. Im "Täli" ischs aber no nid sowiet! Jede zahlt ganz altmodisch si Klubbietrag, jede wo wot derbi si spuelet sini Kilometer am Limpach noche ab düre Summer. Mi wot eifach hockeyle, fröid ha, zäme si. Klar, mi wot a sich arbeite! Aber d betonig ligt bim "a SICH arbeite" u we jede sis Potential usgschöpft het de isch jede mit sich z friede und i bis ou aus Trainer. Ou we mr verliere. Wie singt dr Sinatra so schön: "I DID IT MY WAY"! Klar, i ha ou mini Tröim, aber die gö im Sport bestimmt nid übers Gäut, do derfür hani mis Team z gärn! Do dermit vertritti hoffentlich d Meinig vo üsem Fanclub, vo de Eutere vo mine Juniore und vo üsem Vorstand. Und das dä Wäg nid soooooo schlächt isch bewiesst doch öpis woni gliech wieder mou gärn würd schriebe:

-17 ganzi Saison NLA (Rekord)
-4 x NLA Schwiezermeischter (Rekord)
-5 x NLA Vizemeischter (Rekord)
-3 x Junioren A Schwiezermeischter (Rekord)
-2 x Junioren B Schwiezermeischter
-1 x Cupsieger
-1 x Seniore Schwiezermeischter ;-)

Solothurner Tagblatt / BZ

2008-01-22T08:19:00.000+01:00

Hie dr Bricht usem Solothurner Tagblatt vom Zystig 22. Januar:
U hie no paar Ziele us dr Berner Zeitung vom 22. Januar:

Belp (H)

2008-01-21T14:40:00.000+01:00

I gloube es isch 8:2 oder äch scho 9:2 gsi und es si öpe no 2 Minute z spile gsi i däm Mätch: E Frou (i nenne jetz mou keni Näme) vis-a-vis vor Spilerbank rüeft bim ne Bully ine: „Allez Gränche, super Leistig gsi!!“ Jo i weiss, i ha ab wenig fröid. Aber dä Satz isch so us nüt use cho und het mi irgendwie im „Flow“ erreicht. E churzi „Hüehnerhutattacke“ isch d Folg dervo gsi und jo, si hets ufe Punkt brocht. Es isch e Klasse Leistig gsi vo de Jungs. Respäkt!

Belp isch e Gägner woni sehr gärn ha. Es si spezielli Spiu wie süsch keni. Belp isch es Stimmigsteam wie Martigny ou. Dr Unterschid isch, dass bi Belp im ne Mätch die Stimmig immer wieder vo 0 uf 100 und vo 100 uf 0 schwankt. Desse bewusst isch üses Ziel gsi die Töifpunkt i dene Schwankige usznütze und d Höheflüg z überstoh oder gar nid zuezlo. Tönt eifach, isch aber mit sehr viu Disziplin und herter Arbeit verbunde.
Jo, mit cha es Spiu immer us mindischtens 2 Sichte ahluege. Belp het z Spiu gmacht im erschte Drittu. Do wird niemer wiederspräche. Und e "schlächte" Trainer/Beobachter wird derzue säge: „Si hei z Glück eifach nid uf ihrer Siete gha und drum d Goal nid gschosse…“ D Sicht us üsere Perspektive isch natürlich anders: Mir hei defensiv wöue spile und si souverän gstande. Mir hei nid viu Chance zueglo und wenns eini gä het de isch e Dave (ir Form seines Lebens) im Goal gstande und het se zunichte gmacht. Würklich gueti Chance het Belp aber praktisch keini gha i däm Drittu. Us däm Grund wetti i däm Spiu eigentlich ou nid d Torschütze erwähne. Es isch e devensivi Meischterleischtig gsi. Z mingscht i däm erschte Drittu.
Z 3:1 Gägegoal im Popwerplay het im Mittudrittu nid ganz d Wändi bracht für Belp. Vo däm Momänt a hei mir de z Spiu avo mache. Leider isch de aber Belp guet gstande und so ischs cho das si dr Spiess umdräit hei und das Drittu de 2:1 gwunne hei. Dasch aber ou aues gsi. Wie gseit, d Hoffnig zur Wändi hei mr chönne im Keim ersticke. Mir hei das 5te Goal wöue im letschte Drittu, um jede Pries! Es isch aune bewusst gsi dass das dr Killer wird si. Mir si aber ou ufe Bitz mit dr Ihstellig: Mir mache z Spiu nüm, besinne üs uf die defensivi Leistig vom erschte Drittu. Die Rächnig isch de schliesslich voll und ganz ufgange. E sehr gueti Chanceuswärtig het sicher ou derzue bietreit.Wie gseit, i wet d Torschütze nid hervorhäbe. D Defensivleisch isch zu gut gsi! Es git aber sehr viu Erkenntnis us däm Spiu. Ahgfange villech bi däm Fan wo mi usem Flow gweckt het, wieter z Wüsse das dr Schäume ou im dräie cha 2 mou "pöpperle" ;-) dr Ludo wo ou e verstoglete Ball no ufs Filet cha gä, usw. Nei Seich! Dass si Details! Sicher nid unwichtigi. Wiu d Fröid muess jo do si, schliesslich mache mrs aui freiwillig. Z Ziel vo däm Spiu isch jo gsi dass mr z fride si mit üs säuber nach 60 Minute, u das hei mr erreicht! Ahfangs Saison hei mr 5 Spiu gwunne. Aui mit ere offensive Usrichtig. Üses Mango isch eidütig Rückwärts gsi. A däm hei mr gschaffet und wärdes wieter mache. Z Spiu z Martigny und das jetz gäg Belp heis zeigt. Mir chöi Spiu ou andersume mache. I ha säuber no nid ganz dra gloubt das mr das scho chöi umsetze ir Meischterschaft, aber d Jungs hei mi "des Besseren belernt". So Überraschige nimi sehr gärn a: Merci!

Solothurner Tagblatt

2008-01-15T07:30:00.000+01:00

Hie dr Bricht usem Solothurner Tagblatt vom Zystig 15. Januar:

Martigny (A)

2008-01-14T10:28:00.000+01:00

Es geit gloub mängem so i mim Team. Dr Mäntig Morge isch eifach um z viufache schöner nach emne Sieg ;-) Z "grüble" faut wäg, d Schmärze si erträglich und mi het es Grinse uf de Lippe wo sich eifach guet läbe lot dermit.

Mir hei 4 Punkt wöue us dene zwöi Martigny Spiu! Und dr Ufwand für die erschte 2 isch extrem gross gsi. Mir hei gwüsst dases nid immer so viu wird bruche wie deheim z Gränche und so isch ou gsi geschter. "Dr Start verschlofe" isch zwar nume dr Vorname vo däm wo mr gspiut hei, aber zum Glück isch dr Dave uf dr Höchi gsi. Es Klasse Spiu vo ihm het üs z nötige Säubschtvertroue gä. Zur Entschuldigung vo de Spiler muess me aber säge dasses haut eifach es grosses Umgwöhne isch uf däm Grossfäud. Für mi persönlich ischs us taktischer Sicht e ganz andere Sport und dä trainiere mr haut nid würklich heftig!
Dr Mono het mr vorem Spiu erklärt das es doch guet wär we mr i Egge würd ir Unterzahl, so chönn me 20-30 Sekunde gwinne... Jo, tönt eifach und logisch... Dr Steve und dr Lars hei das zäme ou umgsetzt. Zum allgemeine Erstune si si de aber im Egge nid agriffe worde und so het dr Steve Pfannefertig vorbereitet zum 1:0 i Unterzahl chönne ihschiebe. Dr Ludo (Konter) und dr Rämsi (Schläpper) hei üs zum 3:0 lo dervo zieh.
Mir hei defesiv kämpft, aber offensiv isch dr Ufwand sehr chli gsi. Jo es het öpe nume 5 Chance gä für üs bis zu däm 3:0. Ärgerlich de aber 3:1 no churz vor dr Pouse. Z Zwöite Drittu het aber wieder guet ahgfange. I chönnt jetz bluffe und vom ne "Schachzug" rede bir Ihwächslig vom Fäbu. Wiu, är het i sim erschte Ihsatz mit em 4:1 sis erschte Goal ir NLA gschosse. Aber i muess ehrlich zugä dass d Überlegig füre Wächsu eigentlich eher defensiver Natur isch gsi. Är wär defensive- und dr Hari aus Verteidiger wär offensive Flügu gsi. So si i dere Linie 3 (nominelli) Verteidiger ufem Bitz gsi. Aber so Gschänk näme mr gärn, verdient het är sichs und z letschte ischs sicher ou nid gsi!
I däm Mittudrittu isch de ou em Schäume si gross Uftritt cho. E klassische Hattrick! 3 Goal i Überzahl. Das heisst bi ihm: Total ca. 18 Mou (i nennes jetz bim Name) "pöpperle" und de chlepfe. Bim 6:2 hei mr doppleti Überzahl gha und bösi Zunge hei uf dr Bank gfrogt wiso är scho schiessi, är hät jo no 12 Sekunde dörfe wieter chlöpferle vorhär... I weiss, isch chli arrogant aber ou das Goal hei mr dankend gno. Wiu: Martigny het ou 2 gschosse i däm Drittu. 7:3 und no 20 Minute. Mi kennt üs gnue guet zum wüsse: Das ischs no nid gsi, leider....
Dr Rämsi het aber mit em 8:3 z Schlussdrittu sehr schön eröffnet. I gloube är spiut jetz die vierti Saison bi üs. Das heiss i hane i über 300 Training und i über 70 Spiu gseh. Backhand kennt ne jede, wenigi kenne ne Vorhand. Aber vo links ine zieh und de no uf d Vorhand zieh???? Premiere! Respäkt!! Är überrascht immer wieder ;-)
2 Gägegoal im Powerplay hei de d Walliser 8:5 lo ane cho, aber mir hei z Spiu 4:4 kontrolliert. Dr Ludo mit sim zwöite und dr Steve mit em 10:5 (merci!) hei das ou Goalmässig umgsetzt. Bim Ludo zeigts sigs zruggwunne Säubschtvertroue. Jo, mit em Liniewächsu isch är sich ou sire defensive Pflichte bewusst worde und das är cha Goal schiesse wüsse mr jo. Zum Steve muess me nid viu säge, är isch u bliebt eine vo de beschte Spiler mit schwiezer Pass. Das Goal hets einisch meh bewiese. E Milimeter höcher oder e Milimeter wieter links und är wär nid ine... Aus Guete no für die Wuche ;-)

10:6 ischs am Schluss gstande. Es isch nid aues guet gsi i däm Mätch, vorallem am Ahfang nid. Aber mir si bereit füre nöchscht Gägner! Mit Belp chunnt sicher dr richtig Gradmässer füre Kampf ume dritt Platz uf Gränche. Es wieters "Vierpunktespiu" wo aus wird abverlange. Mir fröie üs druf und wärde üs dämensprächend die Wuche ou vorbereite. Mir hoffe dr eint oder ander wärd das Spiu am Sunntig verfouge :-)

Martigny (H)

2008-01-07T07:39:00.000+01:00

Vorerscht: Es guets Nöis!
Mir hei üs Gedanke gmacht über die Täg, viu sogar. Bi mängem isch z Hockey z Thema Nummer 1 gsi a de Wiehnachtsässe. Guet ok, über was chönnt me ou süsch rede ;-)
Item. Z einte oder andere hei mr de im Team ou no besproche. Z Spiu gäg Kernenried isch zwar e Momänt här, aber so Mätche chame nid eifach still schwiege, do muess me druss lehre! Schliesslich hets Wunde hinterlo und die wei mr wieder verheile!

D Ihstimmig uf dä sehr wichtig Match gäge Martigny isch "chli" speziel gsi. Für einisch hei mr e Polka über üs lo ergo fürs Ihstimme. Isch no luschtig gsi id Ouge vo de Spiler z luege. Die Einte heis gschafft sich z konzentriere u die andere hei kämpft und probiert nid use z lache. Voilà. Die wo das Spiu hei gseh müesse zuegä: Mir si wach gsi!! Und wie sogar. Lars, Schäume, Ludo: 3:0! Mir wüsse jo aber leider wies cha go. Jo, und so ischs ou cho. E Konter, e Unterzahl und scho ischs 3:2 gsi zur Pouse. Martigny het mit wenig, jo fasch mit keim Ufwand chönne ufhole. Mir hei z Spiel gmacht vo A-Z über 60 Minute! Eifach d Goal si nid gfalle! A däm Sunntig si d Spieler aber gwiut gsi dä Ufwand z triebe. Ou we si nid ahhänke, de schaffe mr haut no meh isch z Motto worde. Und mit dere Ihstellig si mr ou iz zwöite Drittu. 5:2 vore, 6:3 vore, 7:5 vore und de ufs Mou ischs aber 7:7 gstande. Wie seit me aube so schön: "Auf Messers Schneide". Mir hei dr Druck aber ufrächt chönne haute. Es het Phase gä i däm Spiu wo Martigny über2-3 Ihsätz nid i üsi Häufti isch cho! Und so isch mit em Schäume sim Schläpper z erlösende 8:7 für üs cho. "wie viu mou muess dä no chlöpferle bis är schiesst?" hei böi Zunge klagt uf dr Bank... u de ändlich het sich dä Schuss glöst, "Het öper gseh wo dä ine isch? I has nid gseh, aber dr Goali isch nid so guet gstande" ischs vom Torschütz kommentiert worde. Dr Märe und dr Geru hei dä Vorsprung no verdient chönne usboue. Em Geru sis Goal isch eigentlich symtomatisch gsi für üses Spiu. Är het sich sehr viu, sehr gueti Chance erkämpft über die erschte 40 Minute, leider aber kes Goal gschosse, und de aber äbe e Schuss im letschte Drittel zum 10te, unhaltbar abglänkt...

...U de gliech hei mr nomou müesse zittere. 4:2 Überzahl churz vor Schluss: 10:8 (nei, mi cha bim beschte Wille nid hohe Stock pfieffe we sich e Spiler mit sim eigene Stock verletzt, söt gloub ou im Wältsche so si...) und de die nöchschti Überzahl: 10:9. Mir hei üs aber über d Zyt grettet!

Fazit: E riese grosse Ufwand für 2 Punkt. 9 Gägegoal si sehr viu. I bhoupte aber das si Goal wo me cha bercho. 4 dervo si Überzahl gsi, eis es Bully Goal und drü Konter. Was mr müesse isch: Viu meh Goal schiesse us dene Chance!! Do derfür hei mr aber nöchscht Wuche hoffentlich im Wallis no Zyt ;-)
Dr Dave het e hervorragende Match gspiut! Jo, eigentlich ischs rundum e sehr gueti Leischtig gsi! Uf das chame ufboue und wieter schaffe!!

Kernenried (Cup)

2007-12-24T12:21:00.000+01:00

E Tag danach cha me nüchtern säge: Es isch cho, wies cho mues... Jo, mi muess für ne Sieg schaffe, mi muess renne, mi muess kämpfe, für enand. Das aus hei üs d Jungs us Kernenried-Zauggenried einisch meh zeigt. Es 4:0 längt no nid zum ne Sieg hei z bringe. Ou das e Lehr us däm Spiu.
Dä verschänkt Sieg würd mr sehr weh tue ir Meischterschaft! So Punkt abzgäh isch schwär z verdoue. Glücklicherwies isch Cup gsi... Viu Spiler gseh das sicher anders. Jo, mir hei wöue gwinne, ganz klar, aber es muess sich jede säuber bir Nase näh. Mir hei Gschänk gmacht und die si dankbar ahgnoh worde. Sone Match muess me eifach gwinne we me im Cup öpis wot erreiche. Es isch jedem bewusst gsi dases nüt nütz im Nachhinein z philosophiere "mi hätt söue...". Schad für alli Lüt wo üs i dere Chäuti hei d Düme drückt. Schad fürs Derby. Schad für d Moral. Mir wärde hoffentlich üsi Lehre zieh us dere ganz schlächte Vorstellig und üs es paar Gedanke i dr Wiehnachtspouse mache.
Mit Martigny chunnt im Januar e Gägner wo z genau glieche Spiu spiut wie Kernenried. Es bliebt üs nume eis Training bis denn. Es Training wo sicher z einte oder andere ahgsproche muess wärde... Mir hei no viu vor bis im Früehlig, und das beginnt hüt u jetz!

Bonstetten (A)

2007-12-16T11:25:00.000+01:00

Es isch schwirig z Bonstetten z punkte. Sehr schwirig sogar. Dr Platz isch unäbe wie süsch niene me ir Schwiez. Dr Gägner isch starch und weiss (mittlerwiele) wie me e gsundi Herti erfolgriech cha spile. Dr Goali isch schlicht "Wäutklass". Chunnt derzue das d Zueschouer (dr chliner Teil) dr Ufenthalt für ne Gastmannschaft nid grad würklich ahgnähmer mache. Item, ufem Wäg vom Breite- zum Leistigssport nimmt me leider ou die Sache i chouf, wos us mire Sicht nid brüchti. I muess aber ehrlich gseit säge dass die Lüt mit ihrne Zwüscheruef im Mittudrittu äuä dr eigene Mannschaft eher gschadet hei aus ghulfe. I go dervo us dass d Zürcher dr Sack hätte zue gmacht i däm Drittu we si sich ufs Spiu u nid ufe (sehr chlinlich, aber konsequänt und sehr guet pfieffend) Mathias hätte chönne konzenriere.

Item, zum Spiu: 1:0 dür nes Powerplaygoal vom Steve... aber de 1:4 hinge nachem erschte Drittu!! Ir Zytig liss me doch aube: "Sie spielten mit angezogener Handbremse!" Jo, es isch eso. Do isch vor jedem e unsichtbare Hemmschueh gsi. Verunsicherig, Närvosität, Angscht, i weiss ou nid was aus. Mir hei z schlimmschte befürchtet füre wieter verlouf vom Spiu. Was chasch mache aus Trainer? D Spiler vö afoh hadere, afoh hässele... jo, es tritt z "Worst-Case-Szenario" i.

D Handbräms ganz zieh hei mir üs gseit. Es isch immer schwirig uf 2 Linie umzsteue. Jo es sticht sogar iz Härz. Du hesch die beschte Kollege ufem Fäud und dr Bank und muesch ne i re Situation inne, wo si süsch scho a sich säuber zwiefle, säge: "los du spiusch nüm/nid..." Mischt. 8 Lüt spile no und 10 hocke uf dr Bank was für nes Bild... Wie wichtig dass si immer no si fürs Team isch ihne äuä nie bewusst. Aber a däm Samschtig hei si ihre Job gmacht. Ahführe, Muet mache, Spass ha! Eifacher gseit aus gmacht. Aber mänge vo de "letschte 8" het dür das dr zuesätzlich Kick bercho do öpis chönne z bewege i däm Spiu. Was gits schöner für ne (spilende) Junior wo vom ne ("bänkelnde") Natispiler ghört: "Starch gsi, wieter so..."? Jo, das isch Golad wärt!

I gloube i bi liecht "abdrifftet". Zrug zum Mätch! Mit hei gwüsst do ligt no öpis drin. Bonstetten isch die besseri Mannschaft gsi zuegäh, aber mir heis o gseh: 2 vo 4 Goal si (sorry füre Usdruck) inegstolperet gsi. Was hei mr z verliere?
"1000 mou trainiert und z erschte Mou ghänkt": Dr Geru het sich "dr Louf" gönnt und het mit emne wunderschöne Goal dr 2:4 Ahschluss gschafft. Jo, jetz isch früsche Wind im Spiu gsi. Nachdäm de dr Nicku ou zeigt het das är 20cm tiefer cha schiesse aus i de letschte Spiu ischs so richtig los gange. Ir zwöite Pouse isch de ou nume eis Thema gsi: "Das Goal muess häre!!"
Jo, mir hei ufs Goal gschosse, hei 3 Lateschüss gha. 3 mou het dr Jerome mit em Chopf abgwehrt. Mir hei aus probiert, aber ou Bonstetten het d Chance gha im letschte Drittu. Wie scho i de vordere 20 Minute hets wieder sehr viu Über- und Unterzahlsituatione gä. Es isch nid e riese Vorteil uf somne unäbne Bitz chönne Powerplay z spile, es chunnt fasch ke Pass. Auso probiert mes mit Wytschüss.U jo, so eine het de (Abglänkt vom Geru) zum 4:4 gfüehrt. E offne Schlagabtusch und es Powerplay 3 Minute vor Schluss het de nümme a dere Punkteteilig gänderet. I dänke mir chöi z fride si mit däm einte, obwohl a däm Tag meh wär drinne gläge. Das hei mr üs aber einisch meh im erschte Drittu säuber verbockt!

Es geit wieter am 23. Dezämber z Zauggenried im Cup. Jo, i stoh nach wie vor zu mire Meinig: Vo mir us bruchts ke Cup, u scho gar nid 2 Tag vor Wiehnacht. Aber i bi no nie a nä Match zum wöue z verliere und warum nid gäge Kernenried e Rächnig us dr Meischterschaft beglieche und mit emne Sieg id "Winterpouse"? Es würd üs fröie we üs dr eint oder ander i däm Derby würd unterstütze! Bis em drüezwänzigscht auso!?

Aegerten (H)

2007-12-10T10:24:00.000+01:00

Auso eis vorwäg: D Mätchnachbearbeitig, bzw. z blogge faut um einiges liechter nach em ne Sieg. U da mr jo voletscht nid so verwöhnt si worde mit Punkt, gniessis um so meh.
Mir müesse aber ou grad wieder relativiere. Es isch e schlächte Mätch gsi. Ämu über wieti Teile. Het aber durchus ou gueti Sache drin gha.
Aus erschts giuts z erwähne das sich üsi Goaline mit nöier Verteidigungsintrumänt hei usgrüschtet. Liecht schockiert hei mr vo dere Tatsach Kenntnis gno. Wo dr Fifi no 2 Johr i Training het e nöie Gägestand usprobiert und nähr über Top oder Flop entschide het, würke dr Joe und dr Dave doch scho chli übermüetig mit ihrne Ihchöif. Früsch usem Terminatorfilm (oder hei sis doch vom Wüethrich?) schmücke si sich füre Mätch mit somne Teil:

Mi somne Aparat söt jo eigentlich nümme schief loufe oder? Bösi Zunge säge, es sig fasch schad es Dress drüber ahzlege! (...u vergässes deheim)

....mir hei üs vorgno z Spiel z mache. Offensiv z spile. Eigentlich üs uf die Sache z beschränke wo üs die erschte 10 Punkt us 5 Spiu brocht het. Zum chli es Zeiche z setze het derzue aber de ou nöii Liniekonstelatione ghört. Ufgange ischs nid würklich. Mir hei sicher i de erschte Minute meh vom Spiel gha. Hei üsi Chance gha, aber d Uswärtig isch schlächt gsi. Das het de zure Verunsicherig gfüehrt und so ischs cho das mr nach em erschte Drittu 1:2 hinge si gsi. Jo, dr Mono het im Gägeteil zue mir gloub klari Wort gredet ir Pouse. Mi isch ämu wach worde ;-) Nid nume das, dür ernöiti Umstellige i de Linie hets de nomou chli e Ruck gä und so hets de ändlich besseret. 6:4 vore im letschte Drittu und ufem Fäld offensiv liecht überläge. Do söt eigentlich nümme passiere. Leider hei üs wie im erschte Drittu scho unnötigi Wietschussgoal e Strich dür d Rächnig gmacht. 12 Minute vor Schluss de z Timeout und d Umstellig uf 2 Linie... Nei, ou denn isch nid viu besser worde. Individuelli Leistige hei de aber zu de entscheidende Goal gfüehrt und zum positivschte vom Tag: 2 (ganz wichtige) Pünkt!!

Es git anders Postitivs und Negativs... E Schwächi isch sicher d Unterzahl gsi, dr Räscht vom Negative berchunnt de nume d Mannschaft z ghöre ;-) Zum Postive ghört d Leischtig vom Fäbu. I sim (gloub) zwöite Spiu het är zeigt wases heisst Madeckig z spile. Do chöi sich ou äuteri Spiler e Bitz abluege und umsetze. Ansonste wüsse mr jo jetz das mr mit ihm Alternative hei. Dr Römu het einisch meh ou wieder mit guete Offensivszene glänzt. I gloube är het d Kurve gschafft und es geit wieder i die richtigi Richtig! Es zeiche het ou dr Geru gsetzt im Mittudrittel. Und i erwähnes nomou gärn: Mi cha super Spiu spile ohni es Goal z schiesse. I hoffe das sig jedem klar. I weiss, i däm Sinn sötti ou dr nöchscht Satz wäglo, i wet aber vollständigkeitshauber gliech no erwähne: Dr Steve und Lars hei z erschte Mou zäme als Sturmpaar gspiut: 10 Skorepünkt hei usegluegt :-) Whow! Jo, ou dr Schäume trifft wieder i entscheidende Situatione und si Brüetsch dr Ste het ou bewise dass är aus Verteidiger äuä ums vielfache wohler isch aus im Sturm. Wieter so!

Wie gseit: D Matchnachbearbeitig fallt eifacher nachemne Sieg. So het dr eint oder ander no ire gmüetlichere Atmosphäre z taktische chönne nache spile und analisiere:

Jo und dr Goali het de mit sine Verteidiger (oder umgekehrt ;-) )ou no chönne abrächne wie sichs so ghört nachemne Spiel:
i weiss nid ob si sich si einig worde oder ob si gäng no im Pflueg "diskutiere". Die 2 Punkt ghöre uf au Fäu beidne und jo: So macht haut eifach aus chli meh Spass.... Bis am Mittwuch! ;-)

Oberwil (A)

2007-12-03T09:29:00.000+01:00

D Gschicht vo däm Mätch isch schnäu verzeut: Mi cha Oberwil schlo am ne Tag wo jede einzeln si Optimalleischtig bringt. Do dervo bini überzoge. D Betonig ligt aber uf "jede". Mir hei üs i däm Spiu ufene solidi Defensitvarbeit wöue konzentriere... "Manndeckung" ohni Kompromiss, so wies no um 1848 vor ganze Liga isch praktiziert worde. Altmodisch aber Effektiv. Leider het das nid funktioniert. Mal für Mal si mr nid bi üsne Lüt gstande. Mal für Mal si mr bim Kontere scho bim erscht Pass (oder Drippler!!!) bliebe hange. Nid chlini, sondern riese grossi Fähler hei sich ihgschliche und so isch schnäu mou 3:1 gstande. 3 Goal wies eigentlich ir NLA nid darf gä. U we z Oberwil wotsch gwinne, de scho gar nid. Jo, es het sich denn scho abzeichnet: Mir gö unter!
Oberwil isch stark gsi, sehr sehr stark sogar. Aues wo si probiert hei isch glunge a däm Tag. Respäkt!
100% Leistig vo jedem si gforderet gsi uf üsere Siete. I bhoupte es isch usnahmslos keine uf 75% cho! Ideenlos gäg Vorwärts, schlächt im Powerplay, und äbe: Madeckig wär eigentlich we me si Ma kontrolliert...

Vorwärtsluege!
Jo, es git ou Positivs. Mit em Fäbu und em Römu hei mindeschtens 2 Juniore zeigt dass si durchus "äutere" Spiler chöi Paroli biete. Dr Dave het sich ou no wöue zeige. Ou das isch es guets Zeiche das eine bi somne Spiustand no iz Goal wot zum Spiupraxis z hole. Är wird die ou gäg Aegerten chönne ahwände.
Es wird Änderige gä i üsem Team die Wuche das isch sicher. I weli Richtig wird me spötischtens am Sunntig z Gränche gäg Aegerten gseh. 4 Punkt us 2 Spiu si gforderet, nume so chöi mir üs wieterhin gäge vore orientiere!

Spielfrei

2007-11-26T08:33:00.000+01:00

Z Weekend isch spielfrei gsi. Jedoch isch praktisch z ganze Team sit em Donnschtig im Ihsatz gsi füre Güggelitag z Limpach.

Derzue si no zwöi Feschtli cho: Dr Flips und dr Ba hei jo ihri 20igschte chönne nachfiere (nomou härzliche Glückwunsch! Ohni öich würd i üsem Team viu fähle!). Die 20 Johr si dr Grund gsi mou im Archiv ume z blättere und es isch erstundlichs zum vorschien cho. Auso jo, erstundlichs nid würklich, es isch jo d "Vereinsphilosophie" wo mir probiere umzsetze.

Das hie isch z Meischterteam vo de Juniore B vom Johr 2002:

Vo de 10 Spiler spile hüt, 6 Johr spöter, sage und schreibe 8 Stück im eis!!

Uf ihrem Wäg hei si zäme es Johr spöter dr Viezemeischter bi de Juniore A gholt: Uf däm Bild vom Früehlig 2003 si 11 (!!) Spiler wo hüt im Eis spile.
Quintessenz: Mir hätte hüt kes Team ir NLA we nid vor Jahre scho für Zuekunft planet wär worde. Härzliche Dank a au die Jungs, Eutere und Junioretrainer wo die "Kids" sowiet brocht hei.

Kernenried (H)

2007-11-19T09:57:00.000+01:00

E Reaktion uf z Sierrespiu hei mr wöue zeige. Bewiese dass das nume e Usrütscher isch gsi. Üses beschte Hockey hät üs em Samschtig söue 2 Pünkt bringe. Leider ischs "chli" anders cho.
Eis isch sicher: Mir hei besser gspiut aus vorere Wuche im Wallis. Es isch ou ganz es anders Spiu gsi. Dr Gägner us Kernenried het sich wöue ufs kontere beschränke. Mir hei wöüe z Spiu mache und hei das ou. Leider nid mit letschter Konsequänz. Zwar het üs dr Steve mit 2 Energieahfäll 2:0 i Füehrig brocht doch das het nid emou fürs erschte Drittu z gwinne glängt. Nid das mr üs z sicher gfüellt hei. Mir wüsse wie gfährlich das z Spiu vo Kernenried isch, aber es het eifach nümm söue si. Mou für Mou hei mr im Slot gsündiget. Dört wo no die erschte paar Spiu richtig hert garbeitet isch worde isch em Samschtig nüt me glunge. Entweder si mr a dr sehr guete Mahdeckig bliebe hange, oder a üsem Unvermöge mou haut e "Seiker" ufs Goal z bringe (jo ou Cremeschnittene chöi Goal gä...), oder de isch dr Mischu d Ändstation gsi für üsi Schüss. Schad we so viu zäm chunnt, aber das isch Sport und do muess me reeagiere. Derzue chunnt ou no e schlächtli Unter- und Überzahl. Jo wes nid wot, de wots nid. Und uf däm Niveau wirsch derfür gstroft. 2:3 hinge nach em erschte Drittu....
Leider hets nid viu besseret i de räschtliche 40 Minute. Nöie Spiler, gändereti Linie, Reduktion uf 8 Lüt, Timeout, Goali use, etc. Nüt het gnützt a däm Tag.
Mir hätte eidütig meh Goal chönne mache. Schlussändlich chöi mr üs aber bim Dave, wo sis erschte Spiu gmacht het die Saison, derfür bedanke, dass är sich ine Rusch gspiut het und üs im letschte Drittu no so lang het ufene Punkt lo hoffe. Gfäut hei i däm Spiu (nume) dr Lars (gueti Besserig!!), dr Kris, dr Schürch und dr Cédu.

So si mr au dene Lüt, wo i dere Chäuti uf Gränche si cho, die erwarteti Reaktion schuldig blibe. Mir wärde dran schaffe i de nöchschte 3 Training! Es geit ke Wäg über meh Kampf i de Spiu, i de Training. Liedeschaft, Ehrgiez und Wille oder churz zämegfasst: D Liebi zum Spiel!! Die muess zrug erkämpft wärde.

Es Highlight hets näbem Fäud gä. Z erschte Mou hei d Zueschouer und nachem Mätch ou Spiler chönne i Gnuss cho vom ne feine Raclett. Härzliche Dank ad Organisatore und d Umsetzer vo dere Idee. Natürlich ou em Buvetteteam wo desswäge paar Überstunde het müesse leischte. "Isch fein gsi"!

Novembertrainings

2007-11-15T09:17:00.000+01:00

Da mr doch gärn die volli Bandbreiti vor Borgskala verwände hets es paar Ahpassige gä ir Trainings"grob"planig. Aber zersch hei mr vor 2 Wuche no e würdige Nachfolger vom Märe und vom Dave gsuecht. Mit em Trisu isch de dä ou gfunde worde und somit isch"d Füdlehose" nüm usschliesslich für Fankhuser's do. Hie schnäu d Uswärtig vo dere (sehr knappe) Machtablösig: U hie no e chlini Impression usem Training:
Es si natürlich nid aui Training so. Wie gseit d Wärte uf dr Borgskala si ufegange. Ämu die vo de Fäldspiler. Grund isch e verschiebig i Richtig intermittierendi Usduur. Was nach Fachchinesisch tönt gseht z Gränche so us:

Das isch e Art Intervalltraining. Es git aber keni Pouse zwüsch drin. Dr Rhytmus isch 5-10 Sekunde Üebig i "höchschter" Qualität und de ca. 30 Sekunde bäuele zum Usruhe. Z ganze duuret "herti" 20 Minute.

Natürlich chunnt aber dr Räschte ou nid z churz i de Training:

oder aber ou:
;-) nei, i ha nid das gmeint. Auso natürlch ghöre ou die obligatorische "Rumpfüebige" derzue. I ha aber eher az Mätchle dänkt. Schliesslich probiere mr jo d J+S Philosophie vom GAG z läbe...

Sierre (A)

2007-11-12T10:44:00.000+01:00

Gniesses so lang die Siegesserie ahautet... Hei mr gmacht! Und was passiert we dr z erschte Spiu verlieret? "Isch haub so schlimm, we nachem Spiu jede cha säge är heig sis Beschte gä". Uszug ussere Diskusion woni gfüerhrt ha voremne zytli. Was denn so eifach tönt het, isch i Würklichkeit viu herter. Es cha aber leider gloub nach däm Spiu keine säge är heig sis Beschte gä. Das isch z schlimme dra.
I ha Lüt aube bewunderet wo nachem ne Spiu im Interview hei gseit dr Gägner sig schlicht u eifach besser gsi. Guet, "bewunderet" isch villech dr fautsch Usdruck. I ha einersiets dänkt, das chönti nie säuber zuegä u andersiets hani immer dänkt die schiebe jetz eifach d Verantwortig ab. D Verantwortig, e Fähler bi sich säuber z sueche.
Aber dr Reihe no: Das Spiu het em 2 Ahgfange und mir hei vor erschte Sekunde a nid dr Huch vore Chance gha. Spile mir so schlächt oder isch Sierre so starch? Beides? I dänke es isch beides gsi. I muess zuegäg i ha i mine 6 Johr aus Trainer no nie so ne starche Gägner gseh (sorry a Oberwil und sorry a d Meischterteam vo Sierre) aber was geschter i däm erschte Drittu isch abgange isch e anderi Dimension vo Hockey gsi. Dr Hossa het däm Team sini Handschrift ufdrückt. I dere Mannschaft gits eis grosses Vorbild und däm folgt me ohni Säubschtinterässe. Respäkt vor dere Ihstellig!! Respäkt vorem Trainer, vor de Spiler wo das mittmache. Dr Erfolg git däm System 100% rächt.

Zum Spiu: 2 wichtigi Pünkt hei mr probiert umzsetze: Keni Strofe, u z Spiu i üsi Hang z näh. D Strofe hei mr de leider gholt und d Goal derfür kassiert und d Spiu hei mr kei Sekunde i üsne Häng gha. E naive Coachingfähler? Ischs Arrogant uf Sierre z go und wöue es Spiel mache? Söt me nid eifach hinge ihne stoh so wie das zum Biespiu Bettlach oder Kernenried sehr guet praktiziert? Im nachhinein: Jo, e Coachingfähler vom gröbere wo uf mim Mischt gwachse isch. Mi muess es Team defensiv ihsteue dört unge und nüt anders. Spötischtens nach em Sieg gäg Oberwil hät ou mir das söue klar si. Gring abe, Mahdeckig und uf Konter spile. Mi Tip a aui wo no iz Wallis müesse. 3:1 isch nachem erschte Drittu gstande 3 Powerplaygoal. Es isch ungloublich gsi. Ersch nach ungefäht 15 Minute hei mr z erschte mou über d Mittulinie möge. D Angscht dervor, uf däm grosse Fäud "im Schilf" z stoh, het üs sichtlich ghemmt. Und die Hemmig het derzu gfüehrt das mir no schlimmer si gstande. Ahzogni Handbräms wär dr richtig Usdruck derfür. I verzichte druf im Detail z schriebe was aues nid klappet het i dene 60 Minute. Tatsach isch das mr kei Zug ufs Goal hei gha, keini Päss si ahcho und d Schüss hei z Ziel mehrmals um Meter verfählt! I gloube z Ändresultat vo 10:3 isch no schmiechelnd für das was passiert isch. I gloube mir hei scho 11:1 verlore im Wallis und hei no besser gspiut aus geschter!
Es giut jetz dä Match nomou ohni Emotione z analysiere. Nid uf Panik mache, sondern z wäsendliche useznäh, id Training lo ihfliesse und de nöchscht Weekend afo umzsetze. I erwarte e Reaktion und hoffe die trätti i. Mir wüsse das mr meh chöi und wärde d Kurve näh!

Jo u no es (obligatorischs) Wort zu de Schiedsrichter. We e Spiler ei Meter vo dr Bande i Rügge checket wird. De darf me ruhig e Strof gä. Mi muess nid unbedingt warte bis dä Spiler nidergstreckt mit ere Hirnerschütterig am Bode winslet und e Bluetlake unter sim Chopf füre fliesst. Und no es Wort zu mim Trainerkolleg uf Sierre. I dere Situation muess me nid unbedingt 10 Minute so lut "Skandal" rüefe das mes bis uf Martigny ghört het ( i ha übrigens scho chlini Bankstrofe bercho wo mr nume z Wort "Sch..." usegrütscht isch)! I dere Situation muesch e Spiler (Sorry Zubi) zur Siete nä und ihm mou zum Thema Respäkt vor dr Gsundheit vom Gägespiler e predig ha und nüt anders! Mit so Foul cha me schnäu mou emne Gägespiler bliebendi Schäde zuefüehre. Drum z nöchschte mou villecht: psssssst, das hesch nid nötig aus Trainer. Bi dere Glägeheit: Gueti Besserig Steve!

Em Samschtig geits deheim gäge Kernenried wieter. Es wird es nöis Spiu mit em ne völlig andere Gägner. Es giut das Weekend z vergässe und vorwärts z luege. Z Positive usenäh und säubschtkritisch die 2 Training nutze. Übrigens hei mr ou füre Cup vo änds Dezember Kernenried zuglost bercho. Es chönt nid anders si: Natürlich uswärts.

Solothurner Tagblatt

2007-11-06T11:04:00.000+01:00

Hie no dr Bricht us dr beschte Tageszytig wos git:

Seetal (H)

2007-11-05T13:34:00.001+01:00

Es git Prolbemli im Läbe vo Trainer mit dene schlot me sich chli länger usenang aus mit andere. Letsch Johr no hei mr üs mou für mou hingerfrogt und tüftlet und stundelang gred wie u was u wo das mr die Mannschaft u üs chöi wieter bringe. Guet, die Diskusione füehre mr jo hüt gäng no (und sehr gärn derzue ;-) ), aber aues isch chli weniger verchlemmt worde. Aber zrug zum Thema:
Es git Problemli wo langfristigi, schwärwiegendi "Prozässänderige" aus Lösig mit sich zieh und es git de äbe chlineri "Sörgeli" wie letsch Sunntig: Wie motiviersch e Mannschaft gäge ne Gägner wo letsch Johr 6 Mou gwunne hesch?
Mir hei üs vorgno vo erschter Minute a wöue z Spieldiktat übernäh. Em Gägner üses Spiu ufdränge heisst das so schön! Das isch üs ou glunge... ....vom Startbully bis öpe zur 15. Sekunde. ;-) Was nähr isch cho füre Räscht vom erschte Drittu isch enttüschend gsi. Vor zwöite Minute a hani mi nach jedem Ihsatz gfrogt ob me äch es Timout brucht für das Team z wecke. Nidemou dr 1:1 Usgliech het öpis gänderet und mir hei es Tempo und mit ere Luschtlosigkeit gspiut dasi mi würklich gschämt ha vor soviu Lüt mit sore Leischtig z spile. Guet, z Positive am Drittu isch de doch z Resultat gsi: 3:1 vore. Es isch aber ir Kabine jedem besusst worde dases so nid cha wieter go. Seetal het nid schlächti Spiler. Und jo, entweder wärde si besser iz Spiu cho und mir müesse de reagiere, oder mir tüe agiere und setze jetz ändlich das um wo mr üs hei vorgno!
Jo, zu üsem Glück ischs de so cho wie dr Mono und ig üs das vorgsteut hei. Dr Steve het aus erschts d Verantwortig überno und het mit emne Wäutklassegoal si Hattrick komplet gmacht.

Grücht si zwar ume gange das är d Goal nume vo "A3" chönn schiesse, doch mit däm Meischterschuss het är üs vo anderem überzoge! Nid nume vo wieter wäg, sondern ou vor andere Siete. Nume z "Filet" isch z glieche blibe ;-)
Was de isch gloffe i däm Drittu isch schnäu verzeut. Dr Troum vo üs Trainer... D Mannschaft het sich ine Rusch gspiut und het Goal um Goal gschosse. Do chasch mache was wotsch, chasch nöii Spiler bringe, chasch umsteue, es louft eifach. Mängisch wärsch froh du chönntisch sone Louf gfriere und de wieder bruche im ne andere Spiu. Aber äbe. Mir heis uf au Fäu gnosse. 8:0 aus Drittusresultat gits jo schliesslich ou nid jede Tag. Näbscht em Steve sine 3 Goal het bis zu däm Zytpunkt dr Römu (2), dr Lars (2), dr Märe, Hari, Marti, Rämsi (1) no Goal gschosse.
Z letschte Drittu isch de schnäu verzeut: Dr Märe het sini sehr gueti Leischtig no mit sim zwöite Goal gkrönt und het dermit unterstriche das är sich "Pudelwohl" füehlt vorem Lars. Dr Flips het nachdäm dr Steve ihn ufem Platz zu re offensiveegoistische Aktion zwunge (gschroue ;-) ) het, ou no sis "obligate" Seetalgoal gschosse. Und was für eis!! Flips, we wotsch nimi dr Marti no öfter mit nachem Training... Dr Schlusspunkt zum 14:2 het de dr Rämsi erzeilt. Jo, är cha haut mitlerwiele Vorhand, Rückhand und Schläpper. Juhui! Es giut hie villech ou no z erwähne wär aus gfäut het: Ba, Cedu, Geru, Pädu, Schäume, Ste, Schürch, This...

Jo, irgend nöime düre het mr Seetal leid to. Mir hei das letscht Johr ou düre gmacht. Es louft eifach nid und mi hingerfrogt Wuche für Wuche aues wo me macht. Es si Spiler do wo meh aus nume z Potential hei. Es wird es Spiu gspiut wo nid nume uf defensivs betoniere ufbout isch. U gliech längts nid ganz. I hoffe das Team wird no paar Punkt hole und die rabeschwarze Tag wie geschter ghöri doch eher zur Säuteheit die Saison. I mögt nechs gönne.

Bi dere Glägeheit muessi gloub ou einisch es Schiripaar lobe (guet, mou abseh vo teilne Stroofe ;-) ): Mi cha Iceing pfieffe nach Artikel XY oder mi cha z ganze Spiu mit nume chlei Fingerspitzegfüehl flüssig haute. Was die Herre Moillen und Cartagena pfiffe hei isch würklich Klasse gsi und mir hoffe es chönne sich im Interässe vom Sport es paar Lüt e Bitz dervo abschniede.

Goalis

"Haben Torhüter einen Knacks? Nein, aber es hilft...." Em Rämsi si Ihleitig i die "Problematik" Torhüter! Ischs eso? Die Frog cha me äuä nie definitiv beantworte. Goaline ticke anders, das isch zwiefulos so, do git mr sicher ou jede Rächt. I bi säuber ou 8 Johr zwüsche de Pföschte im Handball gstande und jo... i säge mou: Es isch es speziells Gfüehl uf dere Position ;-) Wasi aber eigentlich ha wöue säge: Mir probiere im Summer e Plattform z biete wo sich lüt chöi e Grundlageusduur ahtrainiere. Wär das nid wot oder verletzigsmässig nid cha, dä chunnt drum ume. Wär das wot und no chli fasziniert isch vor Materie was eigentlich bi so Training im ne Körper vorgeit dä cha das ou. Mir hei mit em Joe e Goali wos het wöue wüsse die Saison und i gloube es isch nid untertribe z säge är isch dür das ir "Form seines Lebens". I dänke d Basis für die Form isch z Resulat us herte Training wo ihm (fasch) kei andere cha d Stange haute. Talänt allei längt hüt nümm. "E guete Tag mit chli Glück" scho gar nid. Är het das mit herter Arbeit und dr nötige Riefi i di eigene Händ gno. Trainiert viu, guet, und läbt füre Sport. Sache aus woni bi paarne vermisst ha letsch Johr, oder zum Teil immer no vermisse. Dr Joe wär eigentlich z Biespiu derfür wies geit. Und z schöne dran isch das hinge dran nid irgend eine isch, sondern dr Dave ou langsam aber sicher fot afoh dergäge drücke.

Erlinsbach (Cup)

2007-10-29T10:18:00.000+01:00

"Cup het anderi Gsetz"... jo das isch e so. Mir hei das Moto zum Ahlass gno, es paar Veränderige im Team z mache. I mache nid es grosses Gheimniss drus. Dr Cup het für mi ke grossi Gwichtig ir Saisonplanig. Vo mir us bruchts die Weekend nid und chönnte zum Biespiu für d Regionaluswahle sinnvoller gnutzt wärde. I ha mi aber lo belehre das es für die unterklassige Teams sehr guet sig wiu si de so mou am ne "Grosse" chöi es Bei steue. Ok, loni lo gäute. Und dr eint oder ander Spiler het jo schliesslich ou i mim Team Ambitione im Cup mou öpis z erreiche.
Es söu mr aber kene säge das Weekend sigi gliech wie bim ne Meisterschaftsspiu ;-) Aber fö mr vore a:
Z Zwöi het ganz klar Priorität gha. Bis ufe Trisu, woni im Eis ha wöue ha, hei fasch aui spielberächtigte Spiler z Gränche im Zwöi ghulfe. So ischs cho das mr no 11 Spiler si gsi für bi üs.... Das längt irgenwie nid ganz hei mr gseit und so ischs usere Idee im Pflueg z Unterramsere (übrigens z beschte und z fründlichschte Restaurant schwiezwyt, zum chli Wärbig z mache...) uf dr Cheigubahn cho, dass dr Dave und ig hei gseit mir würd süsch ou mou gärn no spile wes grad so gäbig göng. Guet, d Schmärze si vorprogrammiert gsi, aber d Luscht isch natürlich gross gsi zwe drei Ihsätz dörfe z mache im eigene Team. D Verletzig vom Schäume, u dr Ste wo chrank isch gsi hei de derzue gfüehrt das mr mit üs zwöi gliech nume 11 si gsi und mr somit zu äuä chli meh Ihsätz chöme. Jo, und da dr Mono im zwöi gspiut het hets ou ar Bande e Wächsu gä. Dr Schläppi wo süsch scho fasch aus macht a de Mätche het ufs mou dr Räschte ou no müesse übernäh. Mit Hilf vom Schäume isch das aber doch ganz guet über d Bühni. Und gnosse heis die Zwöi gloub ou:

Zums Vorwäg näh: D Grücht vore definitive Rochade isch aber abglehnt worde. I ha mi Trainerjob z gärn. I ha paar Johr nüm gspiut und es isch mr am Sunntig nach paarne Checks, Stockändi und Schläg id Rügge bewusst worde dasi eifach z naiv ufem Platz stoh. Isch aber scho no es speziells Gfüehl we dr grad eine het e Stockschufle i die operierte Chnöi jaggt obwohl wyt u breit ke Ball ir nöchi isch und de am Bode ligend wom glieche Spiler ghörsch was fürnes "Tussi" sigsch... Item. D Schiris hei schliesslich dene "herte Type" meischtens rächt gä und jo... i bruche die Erfahrig ou nid unbedingt. So stoni "Aus Liebe zur Gesundheit" haut wieder uf die anderi Siete vor Bande ;-)

Cup isch speziell
Abfahrt Deitingen 12:00. Würd bedinge das me öpe 10 Minute eher dört wär we me no öpis wet trinke. Und es würd bedinge das me e Platz würd finge wo aus Mannschaft am ne Tisch uffausch und nid 15 Minute muesch warte bis öpis chasch bsteue. Egal, isch jo Cup... ;-) Viertu ab 12i de die erschte Gedanke: "Du, woisch dä Platz?" Mi verloht sich jo uf d Mitspiler das dies kenne. Ok, ou die hei sich druf verloh ;-) Die fründlichi Frou usem Navigationssystem hets de schliesslich müesse richte. I ha se so richtig gärn die Stimm wo z Aarau ir Stadt seit mi söu links abbiege. Leider gits 3 Spure wo links gö... We si nid so schön würd töne hätti re mou wüescht gseit, aber was söus. Mir hei de schliesslich Erlinsbach gfunde. "Das cha jo nümm wyt si vo hie" das het äuä jede dänkt. Guet, die liebschti Stimm isch anderer Meinig gsi und het afoh Strichli iz Display zeichnen wo mi scho chli irritiert hei. Jo, es isch de no paar Minute gange vo Erlinsbach. Für die wo dr besser Wäg über Sissach hei gno, hie schnäu es Bild das dr wüsst vo was mr rede:

Isch mr scho klar. Für Spiler wo sich drü mou ir Wuche vom Täli düre Buechibärg uf Gränche verfahre isch das nüt speziells. I bi aber es "Stadtchind". Zu mire Zyt si d Uswärtsspiu z Agerten, z Nidau, z Jens, z Schüüre, z Schwadernou, im Mühlifäud oder im Sahliguet gsi. Sprich: Im Umkreis vo 10km ;-)
Mir heis de aber au gschafft, sogar dr Joe het häre gfunde im Verlouf vom Ufwärme. Em 20 vor 2 de es churzes, aber intensivs Ihschiesse und mir si parat gsi. Guet vo de Stockschuflene isch nume no d Häufti parat gsi, dr Räscht hets uf däm Acker abgrafflet gha. Leider isch de aber ou üse Gägner parat gsi. D Erlinsbacher hei sehr ufsässig gspiut. E sehr gueti Mahdeckig mit em ne eifache Konterspiu het eigentlich im erschte Drittu druf higwiese dass do durchus e Überraschig würd drin lige. U näbscht em Goali wo mr üs eis um z andere mou d Zähn usbisse hei, hets scho no paar Spiler (Fischer, ...) wo doch z Niveau und d Ihstellig hätte, für paar Ligene höcher chönne z spile. Mit 3:1 si mr de i die erschti Pouse und hei üs vorgno, eifacher z spile und chli weniger Risiko ihzgo. Es isch uf däm unäbne Platz fasch kei Pass ahcho und a dripple hesch grad gar nid müesse dänke. Guet ihgsteut und konditionell parat hets de vorem Erlinsbacher Goal afoh brönne. 3 Goal us 3 Ihsätz isch de ou scho d Entscheidig gsi a däm Tag.
Z letschte Drittu isch de chli es "spielen und spielen lassen" worde. Die einte hei konditionell nüm möge und die ander nüm wöue. So hets no z einte oder andere schöne Goal gä. Dr Abschluss zum 12:5 het dr Erlinsbacher Richner gmacht mit emne Schuss us ca. 20m vor Bande usse diräkt ufe i Egge. Respäkt, dä het passt! Ok, dr Joe het sich entschuldigt: Är het überleit ob är äch mit dr Fanghand zu Stockhandsiete über söu zum dä z näh... I gloube für ihn isch dr Cup gliech wichtig wie für mi ;-)

Erföilichs hets ir Torschützelischte gä: Dr Trisu het (i sim erschte Spiu spiu bi üs) mit em Dave zäme 4 Goal gschosse. Auso ob jede 2 oder dr Trisu 3 und dr Dave nume eis gmacht het isch no gäng nid klar. Grücht gö ume dass z 10te vo beidne abgstritte wird (Warum ou immer ;-) ) Hie no es chlises "Archivbild" wo üse Goali mou ohni Maske zeigt -->

D Meischterschaft geit wieter am Sunntig 14:00 z Grenchen gäge Seetal. Für das wichtige Spiu wird es anders Team ufem Platz sto aus no das Weekend im Cup. Es muess sicher ou ganz anders gspiut wärde. Do derfür hei mr aber no 2 Training und de fot jo bekanntlich aues wieder bi 0:0 a. Mir fröie üs uf dä Mätch und hoffe dr eint oder ander chöm villech schnäu im Eichholz verbi!

PS dr Eint oder ander het die Tag e runde Geburtstag gfieret. Mir wete bi dere Glägeheit nomou härlich gratuliere: Nicku (em Friti 20gi worde)!! Geru (am Samschtig 30gi worde)!! Ba (wird hüt 20gi)!! Bliebet gsund, bliebet so wie dr sit und bliebet hoffentlich no lang i üsem Team, mir bruche nech! Merci für aues!

Solothurner Tagblatt

2007-10-24T07:40:00.000+02:00

I weiss zwar nid ob sich dr Geru het lo umbenenne ;-) hie dr Bricht usem Solothurner Tagblatt vom Zystig 23. Okt:

Bettlach (H)

2007-10-22T10:17:00.001+02:00

"Derby hei ihri eigene Gsetz" heissts so schön... Mir si bi jedere Glägeheit vo Siete Bettlach id Favoriterolle gsteut worde. Nach em glungne Saisonstart isch üs das ou rächt gsi. Mir kenne aber d Stärkine vom Nachbar sehr guet und hei üs druf Vorbereitet das Spiel säuber id Hand z näh und zwar vor erschte bis i die letschi Sekunde. Vorwäg: Glunge ischs üs nid ganz, aber es het guet Ahgfange:

D Vorgab isch klar gsi: 14:00 dr ILZ (ideal Leistigstuestand) ufem Zenit! Mir wei nid zersch luege wie Bettlach spiut, mir si üs ou üsere Stärki bewusst und hei die wöue chönne abrüefe. Dr Start isch de ou würklich ihdrückklich gsi. I gloube mir si 5-7 Minute nume ir gägnerische Häufti gsi. Leider (für üs) isch aber nid eifach e Goali im Goal gstande sondern mi hets bi de Bettlacher vorzoge das Goal zue z mure! Ungloublech was dr PG (pege) über die 60 Minute het gha. Guet, das isch ou nid würklich e Überrachig gsi. Mir hei üs jo im Frühlig z Tenero es Bild vo ihm chönne mache und hei gwüsst das är zu eine vo de Beschte ir Schwiez ghört. Hie wär süsch nomou e chline Ihdruck vo dere Wuche Leiterkurs (mit beschtem Dank nomou a aui Teilnähmer und Experte). Achtung: Die erschte 1:13 si chli für "Insider" vom Kurs, die andere söue haut chli wägluege oder spuele ;-) )

Aber zrug zum Spiu. Dr Ste (z erschte Goal i de Farbe vo Gränche Limpachtal) und dr Lars (schön bisch wieder do ;-) ) hei de gliech es Loch gfunde i dere Mur und hei üs 2:0 i Füehrig brocht.
Ire Überzahlsituation het de dr Hari gäg si ehemalig Verein z erschte vo sine 2 persönliche Goal zum 3:0 chönne erziele. 4:1 ischs zur Pouse gstande. Mir (Trainer) si nid würklich mit auem z friede gsi i däm Drittu. I muess aber zuegä dass d Gägewehr vo Bettlach extrem hartnäckig isch gsi. Z Spiu isch ou eigentlich sehr fair gsi. I wot jetz ou nid über ne Schiedsrichter här zie. Aber es tuet mr leid. We me 2 -3 Training ir Wuche und es Ziel vor Ouge het, de röits eim scho chli we eine z Gfüehl het är müess e "Onemanshow" abzieh. I meine d Tatsach das d Trainer und Spiler vo üs u vo Bettlach zäme nachem Spiu eis chöi trinke und beidi Teams sich einig si das eigentlich nume eis gstört het a däm Tag spricht nid würklich für ne Schirileischtig. Item. Mir hei probiert z beschte drus z mache und de zahlrieche Lüt wieterhin Streethockey wöue biete. I gloube glunge ischs üs nüm so heftig und i wet mi bi dere Glägeheit ou entschuldige das mr üs dür die willkürliche, üs nid bekannte Regeluslegige "chli" usem Konzept hei lo bringe. Über so Sache söte mr mitlerwiele stoh! Sorry!

Z Spiu isch jo no einisch richtig Spannend worde. Üses zwöite Eigegegoal het dr Joe zum 4:2 bezwunge... Aber d Chance für Goal het Bettlach i dere Situation gha. Dr Pfoste und die bländendi Form vom Michu het aber jewiels grettet.

5:2 Nach zwöine Drittu ischs gstande. E andere Rhythmus mit de Liniereduktion het wäge de Strofe und wägem eigene "Unvermöge" leider nid gfruchtet. Ersch wo me sich im letschte Drittu nomou vorgno het sich würklich ufe Sport z konzentriere hets de wieder besseret. So si de dr Fäbu und dr Trisu ou no zu ihre erschte Ihsätz ir NLA cho. Es wärde ou bi ihne sicher nid die letschte gsi si. Dr Trisu het dür sis hervorragende Stelligsspiu sogar 2 (sogenannt) 100prozäntigi ufem Stock gha. Leider het dr Pege öpis gäg sis erschte NLA Goal gha und so ischs de churz vor Schluss am Geru gläge sini Leistig mit em 7:2 z chröne. Öps do derfür Goal brucht oder nid sei mou dahingestellt. Es git Spiler i däm Team wo fählerfreii Spiu zeige und sehr weni Punkt ir Statistik hole. Ok, de Stürmer hani gseit si wärde a Goal gmässe und nid a Chance ;-) Es het aber jede si Ufgab im Team und treit es Puzzleteil mit sich ume. D Summe ergit de z Bild wo useluegt am Schluss. Schön stimmt das im Momänt. Und mir hoffe es bliebi no es Zytli so. Wieso? -->
Jo, i muess zuegä das ou ig i däm Momänt uf d Statistik schile. I bi nid würklich Fan dervo. Für mi zeut eigentlich aus einzigi Statistik d Tabäue vo änds Johr. . Aber i müesst lüge weni würd säge das mi e Blick uf d Tabäue zum jetzige Zytpunkt chaut lot. 11 Gägegoal.... 2. Platz.... Mit 8 Punkt us 4 Spiu hei mr nume 4 weniger aus letscht Johr us 18 Spiu... Do chame nach ere verkorkste Saison wie dr letschte, womr nume ungedüre si, scho Hüehnerhut bercho. Mir vergässe aber ou nid das mr doch es ganz es anders Startprogramm hei gha aus letscht Johr. Mi chönnt jetz säge "Glück und Päch liege noch zäme" Loni aber nach wie vor nid lo gäute. Mir heis verbote letscht Johr vo Päch z rede. Mir si schliesslich aui zäme säuber tschuld gsi!! Auso ischs ou nid arrogant we mr jetz nid vo Glück rede...

Aber jetz nomou zum Spiu: E Rekord vo 17 Fäudspiler und 2 Goaline si ufem Matchraport gsi. Gspiut hei bis ufe Ba und Dave (Sorry...) aui churz. Goal gschosse hei: Hari (2), Ste, Lars, Steve, Schäume, Geru. Jo ok, dr Geru und dr Ludo hei no je eis derzue gmacht, oder ämu abglänkt, leider iz falsche Goal. Aber Eigegoal gäbs jo nid im Hockey ;-)
Vollständigkeitshauber hie ou no d Abwäseheitslischte: Cédu, Schürch, Reto und This si nid ufem Matchraport gsi. Es wird ou langsam äng uf däm chli Zettu ;-)

Nöchscht Wuchenänd isch Cup: Z Eis spiut am Sunntig z Erlinsbach (1. Liga), u z Zwöi deheim gäge Seetal (NLA). Und wie ir Ihleitig scho erwähnt giut ou hie "Cup het sini eigene Gsetz" Mir fröie üs uf zwöi spannendi Mätche mit überraschende Mannschaftsufstellige ;-) !

Vorschou Bettlach

2007-10-16T07:52:00.000+02:00

Fürs Spiu am Sunntig 21. Oktober 14:00 z Grächne isch hie e Vorschou usem Solothurner Tagblatt:

Belp (A)

2007-10-15T09:31:00.000+02:00

Das es guets Abschlusstraining vom Fritig nid d Garantie isch für ne guete Mätchstart hei mr spätischtens dä Samstig erfahre...
Zwar hei mir üs vorgno vo Ahfang a z Spiu i üsi Häng z näh doch leider isch dä Gedanke im Chopf blibe und nid uf d Füess übertreit worde. Das mr trotdäm im erschte Drittu si 3:0 vore gsi isch zwöine Sache z verdanke: E Joe im Goal wo im Moment d "Form seines Lebens" het, und e Abschlussstärki vo üsen "Flügu" wo besser nid hät chönne si i dene 20 Minute. Dr Rämsi, Schäume u Flips si verantwortlich gsi für die 3 Goal. Mit ere Minimalleistig si mr zu däm Vorsprung cho und i de Chöpf isch me dür das blockiert gsi überhoupt meh für z Spiu z mache. Die diverse Weckrüef vom Joe hei nid gnütz und so ischs ufs mou 3:2 gsstande.

Z zwöite Drittu het gliech ahgfange wie z erschte ufghört het und bau mou isch 3:3 stande. Ou hie si mr gäng no nid erwachet. Während üsere Trainerberatig wi das mr e Momänt chönnte mit 2 Linie wieter spile het de dr Kris sis erschte NLA Goal gschosse. Nid irgend eis, sondern äuä z wichtigschte Goal i däm Mätch... Ir Hoffnig dases so wieter geit hei mr üsi Wächsuplän wieder uf d Siete do. Leider isch aber üses Spiu dür das Goal nid besser worde! Zum dr Rhythmus z ändere hei mr du doch uf 8 Spiler reduziert. Ir Hoffnig, das mr 10 Minute Powerhockey chöi spile und das Spiu vorzytig für üs chöi entscheide. Mit em Goal vom Steve und däm vom Geru isch die Rächnig voll ufgange :-)

Bim Stand vo 6:3 im Mittudrittu het de e unglückliche Check gäge Nicku und dr drus vollgende 5 + Spiuduur zur ändgültige Entscheidig gfüehrt. 2 Überzahlgoal no vor dr Pouse zum 8:3 heis müglich gmacht, im letschte Drittu wieder e Gang zrug z fahre.

Mittlerwiele wieder mit drei Linie isch dr Ba, wo sich immer no ir RS befindet ou no zu 20 Minute ihsatz cho. Erfröilich i däm Spiu sicher die super Leischtig vom Joe. Nähr dr Kris wo i sim erschte Spiu sis erschte Goal gschosse het (mir hoffe es sig nid z letschte gsi ;-) ). Dr Flips wo scho gäg Aagerte zeigt het das är nid nume gäge Seetal cha Goal schiesse. Dr Rämsi wo langsam aber sicher sim XXL Stock zeigt het wie är bim schläppere muess abe schwinge (Vorhand, nid öpe Backhand!). Dr Steve wo mit 2 Goal und mit sire "omnipresänz" sini Linie hervorragend füehrt (Grücht säge, dört chönn är äbe no Chef si ;-) Guet, mir si froh isch ärs...). Dr Ludo wo doch no mou bewiese het das är ar Siete vom loufstarche Geru ou ir NLA eine vo de bschte Stürmer isch (ok, das mit em Penalty luege mr no a).

Guet, es isch nid e hochstehende Mätch gsi. Und i wage z bhoupte das mr no letscht Saison mit dene Zwiefu hätte das Spiu verlore. Es git aber näb em nöi gwunnene Säubstvertroue und dr nöi endeckte Fröid am Sport viu Sache wo sich gänderet hei uf das Johr. So giut hie ou no d Integration vo aune nöie Spiler z erwähne. Si si zum Teil us langjährige Engagement i ihrne vordere Vereine usgstige und si bi üs i ne unsicheri Zuekunft gstartet. I bi froh übernäme die Lüt Verantwortig und mache mit de Juniore und de Routiniers di sehr interessanti Mischig us.
Nid z vergässe giut aber zum Schluss no d Abwäseheitslischte wo i däm Fau fasch länger isch aus d Spilerlischte: Cedu, Lars, Pädu, Reto, Schürch, This (verletzt oder abwäsend) Fäbu, Römu, Trisu (wäge "Derbyangsch" vo de Trainer nid ufbote oder im zwöi). Do si doch no paar Spiler drunger wo im einte oder andere Mätch de wieder chönnte wichtigi Rolle spile.

Es paar Bildli hets no hie: http://picasaweb.google.com/greli90/Belp131007